ASO FA’APITOA O TINA O SAMOA 2015

01 May 2016, 12:00AM

O tina ma tamaitai Samoa, o feagaiga tausi o aiga, o fai’oa latou te limalimaina measina e fa’amama’i iai so’o se Samoa. O tina ma tamaitai e fa’alagolago iai le atina’eina o itu uma o le soifuaga o aiga, nu’u ma le atunu’u ma ekalesia.

O le a fa’atinoina e le Matagaluega o Tina ma Tamaitai, Atinae o Nuu, Afioaga ma Agafeso’otai le Fuataga o le Ie Samoa ma le Faaleleina o Siapo e fa’amanatuina ai le Aso Fa’apitoa mo Tina 2016.

O lenei polokalame e fa’atinoina i tausaga taitasi ma ose polokalame e faamanatuina ai le Aso Faapitoa mo Tina o Samoa e amanaia ai ma saga fa’atauaina ai le sao taua o tina ile fa’atumauina o nei measina e ala I lona lalagaina aemaise lona gaosiaina. 

O nei measina ua avea ma se tasi o alagaoa e tua iai nisi o tina ma tamaitai aua le atina’eina o le tamaoaiga o Samoa. O lenei fa’amoemoe o lo’o u’unaia ai le fa’atauaina ai le faaauau pea ona lalagaina o le Ie Samoa ma le Mamanuina o le Siapo ina ia fa’atumauina pea le oa o nei measina a si o tatou atunuu faapea foi ma le faatauaina o faiva alofilima o tina ma tamaitai e fesoasoani malosi i le tamaoaiga o o latou aiga, nu’u ma le atunu’u.

O le fa’aauauina o le lalagaina o le Ie Samoa ma le mamanuina o siapo o loo u’unaia e tauala atu i le galuega a le Komiti o le Ie Samoa, o loo taitaifono ai le Afioga i le Alii Palemia, sui o Matagaluega a le Malo, sui o le Fa’alapotopotoga Tumaoti a Tamaitai Faipisinisi ma Sui o le Atunuu.

O le faatinoina o lenei polokalame o lo’o taulamua ai le mamalu o komiti a tina ma tamaitai faapea tamaitai talavou ua le toe auai i aoaoga, tamaitai e iai manaoga faapitoa ae le gata I lea ua molimauina foi le lagolagosua a le itupa o tama.

E taua tele le pitolaau a alii ile lalagaina o le ie sae ma le gaosiaina o le siapo aemaise ole lagolagosua ile unaia o le faatinoina ma le faaauauina o lenei polokalame taua. O le toe fafaguina o nei measina, ose taumafaiga a le Malo ina ia toe faafoi tu ma aganuu a Samoa ile fa’aaogaina o le Ie e tasi ae afe, e onomea mo fa’aaloaloga.

O le maualuga o le fa’aeaea ma le fa’aaloalo o loo atagia ile fa’aaogaina o nei measina i fa’aaloaloga fa’aleaganu’u i aso fa’ailogaina e pei o le fa’amanatuina ole Tutoa’atasi, Tu’umalo ma fa’alavelave fa’ale-aiga. Ua avea foi nei measina ma alagaoa mo nisi o tina ma tamaitai o loo faatinoina fefa’atauaiga o nei measina ile mamalu o le atunuu e le gata i Samoa nei ae faapea foi atunuu mamao. 

O le fa’atauaina o le fa’aauauina o lenei polokalame ina ia faatumauina le mamalu o measina a Samoa aemaise o alagatupe o loo manuia ai tina ma tamaitai.  

E tatala le avanoa mo le mamalu o le atunu’u e auai fa’atasi ai e molimauina le Fuataga o le Ie Samoa ma Siapo i le aso 5 o Me 2016 ile itula e 7:00taeao I luma Maota o Fiame Mataafa Faumuina Mulinuu II, Eleele- Fou Apia.

Ia manuia tele le fa’amanatuina o le Aso Fa’apitoa mo tinā ma tama’ta’i uma o Samoa mai le Matagaluega o Tina ma Tama’ta’i, Atina’e o Nu’u Afioaga ma Agafeso’ota’i.

01 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>