Ave le fa’amuamua i lona tina
O le faatalatalanoaga a le Fofoga o Samoa ma Saimua Pelasio ile aso ananafi, sa maitauina ai o Saimua o se tagata e faamuamua i lona tina.
E 43 le matua o lona soifua ma e sau mai Leauvaa.
“O le ma fale, e filemu lava aua na’o maua lava.
“Ou te tausi faamaoni lava i lou tina; o ia o se tina o lo’o tele pea lona malosi.
“Soo se taimi a la ae ou te lei alu ese atu ma le fale, ia e fai muamua a lana meaai ou te lei alu ese atu.
“O au foi e leo se tagata faalagolago i sesi e faia ou au ia tiute.
“Aua foi na ou ola mai a au ia o lou tina a na vaaia au.”
O le olaga tatau lava lou faalagolago lava oe i galuega a ou lima.
O Saimua ma lona tina, e leo se aiga e u’u ini tupe se tele ae e leai se popolega aua o loo ola lava laua mai le faatoaga.
“E faamoemoe lava ile faatoaga, ia ma o loo fafaga foi puaa ma moa, o se galuega tele lava.”
Sa taua foi e ia e faatau atu meamata i lesi taimi pea manaomia se seleni.
“O faamanuiga uma mea lena mai le Atua, e toatele a o loo faapalapala ile galuega faifaatoaga ae o se tamaoaiga lelei lea.”
O Saimua e le o sesi e ola faalagolago, o loo tausi pea e ia lona tina i galuega a ona lima ma e leai lava se faigata ia te ia.