18 masina ua falepuipui ai se alii

By Deidre Tautua – Fanene 02 February 2018, 12:00AM

E 18 masina ua fa’afalepuipui a se alii e 22 tausaga mai afioaga o Lepa, Aleipata ma Apia.

O lenei ali’i o Agasii Fuimaono.

O le fa’aiuga a le fa’amasinoga na tu’uina mai e le Afioga i le Fa’amasino Sili, le Afioga i a Patu Tiavasu’e Falefatu Sapolu.

O le tama’ita’i loia i a Lealofioamoa Mamaia sa tula’i mo le itu a leoleo.

I le tolaulauga o le fa’aiuga a le fa’amsinoga i le Aso Gafua na se’i mavae atu nei sa ta’ua ai o Agasii o lo’o molia mai i se moliaga e tasi o le talepe fale ua le tusa ai ma le fuaiupu 174 o le Tulafono Soligatulafono 2013 o lona fa’asalaga aupito i maualuga e 10 tausaga i le falepuipui.

Ma se moliaga e tasi o le gaoi ua le tusa ai ma le fuaiupu 161 o le tulafono o lona fa’asalaga aupito i maualuga e 7 tausaga i le falepuipui.

I nei moliaga uma e lua na  ioeina e lē o lo’o molia i le avanoa muamua lava.

Sa fa’aalia e le afioga i a Patu e pei ona fa’aalia mai e le tolaulauga a le itu a leoleo o le aso 23 o Setema 2017, pe tusa o le 2 i le vaveao na outou o atu ai ma ni au uo se to’atolu i le faleaiga lea o le Rendezvous e i Maluafou a’o le taimi lea ua tapuni le faleaiga.

“O le to’alua o au uo ia na tou o sa fa’apea ona agai atu loa i laua ma ave’esea ni luva o le faleaiga ma o loa i totonu.

“A’o oe lea e tulai mai ma se tasi o au uo sa oulua fa’atali atu i fafo o fa’amalama o le faleaiga.

“Sa outou gaoia ai se Samsung Sound System, Projector, Sonic Stereo, o se pusa plastic e i ai ni uaea ma o le pusa lea e fa’aaogaina e le faleaiga e tu’u ai le latou karaoke ma se sefe e fa'aaoga ai tomai fa’aonapo nei, ma le tele o fagu pia ma fagu malolosi.

“O le tau aofai o nei meatotino na outou gaoia e $11, 879.00.

“E pei ona fa’aalia mai e le lipoti a le ofisa o fa’anofo va’ava’aia na e ta’ua ai e lua aso mulimuli ane ai mai le fa’atinoga o lenei soligatulafono na e faalogo ai i fa’amatalaga o lea ua agai atu leoleo e sue po’o ai tagata ia na osofaia le faleaiga lea o Rendezvous.

“O lea la na outou omai ai ma au uo ma aumai uma meatotino ia na outou gaoia pe tusa o le 2-3 i le vaveao ma outou tu’u i lalo o se pa la’au poo se pa aute i tafatafa o le faleaiga e fa’atali ai le taimi talafeagai tou te toe aga’i atu ai ma toe fa’afo’i mea totino ia i totonu o le faleaiga.

“Sa faapea ona tou agai mai loa i le taligalu lea e i Apia.

“Ae ina ua outou toe fo’i atu i le nofoaga lea na outou tu’uina ai meatotino nei na outou gaoia ua leai ni mea o i ai e leiloa po’o ai na ia avea.

“Ina ua fesiligia oe e le fa’amasinoga e fa’atatau i le itu lea e pei ona ta’ua e le Ofisa o fa’anofo va’ava’aia sa le talitonuina e le fa’amasinoga au tali na tu’uina mai.

“O lea la e le talitonuina e le fa’amasinoga ia lau faa’matalaga lea na ave i le ofisa o fa’anofo va’ava’aia.

“Na e ta’ua foi i le ofisa o fa’anofo va’ava’aia na e toe fa’afoia ni fagu malolosi se lima I lē e ana le faleaiga ae ina ua fesiligia oe e le fa’amasinoga i le itu lea sa e ta’ua ina ua oatu leoleo e fesiligia oe na e tago tuu i leoleo ia ni fagu malolosi se lima.”

Sa fa’ailoa fo’i e le fa’amasinoga o lē o lo’o molia e i ai ona moliaga muamua.

“E pei foi ona fa’aalia mai e le lipoti a le Ofisa faa’nofo vaavaaia o oe ua 22 ou tausaga e lei faia se toalua ma o le taimi nei ua e le’o toe faigaluega.

“Na e tuua le aoga i le Yr 12 ma sa faapea ona e faigaluega mulimuliane i se kamupani Rental Car mo le 3 tausaga ae sa toe fa’amutaina lau galuega lea.

“I le taimi la o le soligatulafono lenei o loo e galue i le fa’atoaga a le tou aiga.

“O loo ta’ua mai foi e le lipoti a le fa’anofo va’ava’aia e i ai ou moliaga muamua ma o le ituaiga soligatulafono lava lenei e tasi.

“O le Aso 20 Setema, 2017 sa e nofo va’ava’aia ai ma poloaiga oe e le fa’amasinoga e te fa’atino ni itula se 80 e fai ai ni galuega mo le lelei lautele o le atunuu.

“Ae peitai 3 aso mulimuli ane ai Aso 23 Setema, 2017 na e fa’atinoina ai ma au uo ia soligatulafono lea ua e toe tulai mai ai i le aso i luma o le fa’amasinoga.”

Na tau’a e le afioga i le Fa’amasino Sili le talia gatā e le fa’amasinoga o le fa’amatalaga sa tu’uina atu e le tinā o lē o lo’o molia i le ofisa o fa’anofo va’ava’aia.

“E faigata i le faamasinoga ona talia ia le faamatalaga a lou tina na ave i le ofisa faanofo vaavaaia e faapea o oe o se tagata e lelei lou tagataaga,” o le saunoaga lea a Patu.

“E faigata foi i le fa’amasinoga ona talia e fa’apea o oe ua e matua’i e salamo lava, mafua lea ona e aliali mai i lou tulai mai i luma o le fa’amsinoga e leai se salamo e leai foi sau fa’amatalaga i le faamasinoga o oe ua e salamo i nei mea na tupu.

“O lē na a’afia i lenei mataupu o ia lea e ona le faleaiga lea na outou talepeina ma au uo.

“Ole vaega autu lea o lana alagatupe autu lea.

“Talu mai le soligatulafono lenei ua tapuni le faleaiga talu ai o meatotino ia e faaaogaina i le pisinisi lea ua outou gaoia ma au uo ma o le tau fuafua i le tupe ua le toe maua mai i le faleaiga lenei mai le taimi o le soligatulafono e oo mai i le taimi nei e tusa ma le $50,000.

“O au uo ia na outou o fa’atasi e fa’atino le soligatulafono lenei e tusa ai ma fa’amaumauga o lo’o i luma o le fa’amasinoga i le taimi nei e na o le toalua o au uo lea ua molia fa’atasi ma oe ae talu ai o au uo ia e tai 16 o la matutua o lea ua tu’uina atu ai laua i le fa’amasinoga o tupulaga talavou.”

O itu nei e ogaoga ai le soligatulafono lenei:

1. O le tau aofai o meatotino na gaoia

2. O le a’afiaga o le e ana le pisinisi poo le faleaiga lenei ona o lea ua tapuni le faleaiga ma ua le toe maua foi ni tupe na masani ona maua mai i lana faleaiga.

3. O le itu lea o nei soligatulafono na faatino a lea faatoa tolu aso na tuanai atu ai ona faasalaina ai foi I ituaiga soligatulafono lava nei e tasi.

“E leai se itu e tau faamamaina ai le soligatulafono lenei.

“A’o itu nei e ono avea ma ila o oe o le itu lea e uiga i au soligatulafono i le aso 20 Setema, 2017.

“Ao le itu e mafai ona avea ma ou lelei e na o le tasi lava o le itu lea e faatatau i lou ioeina o moliaga e faasaga i a te oe i le avanoa muamua lava.

‘A fuafua la i itu e ogaoga ai le soligatulafono lenei manatu le fa’amasinoga o lana faasalaga amata e 2 tausaga ona faaopoopo lea I ai o le 3 masina mo ou moliaga muamua ona taunuu ai lea i le 2 tausaga ma le 3 masina.

“Ona toese ai lea o masina e 9 mo lau ioe i moliaga nei e faasaga i a te oe i le avanoa muamua lava ona totoe ai lea o le 18 masina.

“O le faaiuga a le faamasinoga e faapenei ua faamaonia moliaga e faasaga i a te oe ma faasalaina oe i le 18 masina i le falepuipui i moliaga taitasi e tuli faatasi lou faasalaga i moliaga uma nei e lua.”

By Deidre Tautua – Fanene 02 February 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>