Fia maua se galuega

Tusia Deidre Tautua-Fanene ,

33 Hits

Toma Tuilata.

Toma Tuilata.

O le tamā i a Toma Tuilata mai le afioaga o Leauva’a e to’alua nai ona alo ma o lo’o fia maua sana galuega i se taimi vave lava.

O lenei tamā ua 47 le matua o lona soifua.

I le fa’atalatalanoaga ma le Fofoga o Samoa sa ia fa’ailoa ai lona naunautaiga ina ia maua sana galuega e tausi ai lana fanau ma fai ai ā latou aoga.

“Sa i ai la’u galuega muamua o le ave ta’avale la’ititi ae peita’i ua ou le toe alu ai ona, e tele atu le tupe alu nai lo le tupe maua,” o lana saunoaga lea.

“Tele mea totogi i le itu tau laisene ma le tupe e toe ave i totonu i lē e onaina le ta’avale e uma ane le vaiaso ua ova ma le $300 tupe alu.

“E pei o le ala lea ua ou le toe faia ai lenei galuega, ma o le ala fo’i lea ua toe taumafai ai e su’e sesi galuega fou.”

Sa ia ta’ua le faigata o le tulaga ua i ai ona e to’alua nai ona alo o lo’o ao’oga.

“O le taimi nei o lea e tau su’e se tupe e fa’atau ai mea e mana’omia e le fanau i le aoga.

“O si o’u to’alua fo’i sa faigaluega i le Yazaki ae pe’ita’i o lea ua tapunia o le ala lea ua le toe faigaluega ai fo’i.

“Ua faigata ona maua ni galuega i le vaitau lenei ma o lo’o tau sa’ilia fo’i se galuega a le tināo le aiga.

“E pei lava o le fanau ma latou aoga le auga ma le fa’amoemoe o le ausulusulu solo e su’e se galuega ina ia fai ai aoga a tamaiti aemaise o pili aoga ma latou mea’ai.

“Sa matou nonofo i Samata, i Savai’i ae peita’i ua matou omai iinei e su’e ai se lumana’I manuia o le fanau.”

Sa ia ta’ua fo’i le tulaga o lo’o i ai le nofoaga o lo’o nonof ai.

‘“E o’o fo’i i le matou fale ua le mafai ona fa’auma ona ua utiuti le tala i le tupe,” o lana saunoaga lea.

“Sa lelei lava i le taimi a’o faigaluega uma ma’ua ma le tinā e i ai lava mea e mafai ona fa’atau mai e fonofono ai le fale.

“E ui e le’i telē ni totogi sa maua ae sa mafai lava sefe se vaega o le tupe e fa’atau ai mea o lo’o mana’omia.

“A’o le vaitau lenei ua o’o lava i le fale le ta’ua ua le gafatia ona fai ona o le leai o se tupe.

“Toe fa’aopoopo mai ai ma le tau o le soifuaga ua atili ai ona faigata le olaga.

“So’o se galuega lava e maua e talia ma le fa’afetai pau lava le naunautaiga ia maua se tupe e fa’aleleia ai nofoaga ma tausi ai le fanau.”

Mo so’o se tasi o lo’o fia fesoasoani i le tamā i a Tuilata faafeso’ota’i le numera 7237823.

© Samoa Observer 2016

Developed by Samoa Observer in Apia