O pasi laupapa o lo’o feoa’i i luga o auala ua tatau ona aveese.

O le manatu lea o le Ofisa Sili o Pulega o le Pulega o Fela'uaiga i le Laueleele, Leasi John Galuvao i le tali faitau mai ai i fesili sa fesiligia ai e le Samoa Observer.

Sa fesiligia le Ofisa Sili e tusa ai ma le fa’alavelave mata’utia sa tula’i mai i le fa’aiuga o le vaiaso na se’i mavae atu nei lea na ma’imau ai soifua e to’atolu e aofia ai ma lē na fa’afoeina le pasi.

Sa fa’aalia e Leasi o lenei manatu ina ia aveesea pasi laupapa e le’o se manatu fou.

“I le tausaga e 2000 sa fai ai se fuafuaga a le malo ina ia aveesea pasi laupapa,” o lana saunoaga lea.

“E o’o fo’i i le faigāmalo i luma atu sa latou manana’o ina ia aveesea le toe fa’aaogaina o pasi laupapa.

“Ae i lea lava taimi sa siitia ai le tausaga fa’atulafonoina o pasi mai le 8 tausaga i le 12 tausaga fa’atoa mafai lea ona agava’a e fealua’i I luga o le auala.

“I le taimi fo’i lea o pasi ua uma ma’ea ona fausia sa mafai ona aumai i totonu e 12 tausaga ma e na o le pau fo’i ia o pasi ua mafai e’i latou e onaina pasi ona gafatia le tau, ma o le tele o nei pasi ua le toe aogā.”

A’o o latou e onaina pasi sa ave le latou talosaga i le malo ina ia tu’uina atu se avanoa mo i latou e fa’amaonia ai le sefe atu o le pasi laupapa.

“Sa talosagaina e mafai ona latou suia le fausaga mai le laupapa i le u’amea ina ia malosi ai le fa’avae o le pasi,” o le fa’amatalaga lea a Leasi.

“Sa i ai fo’i le manatu e fa’apea o pasi laupapa o nisi nei o fausaga a Samoa e mafai ai ona tosina mai ai turisi tafafao mai fafo.

“E pei o le mafuaaga lena na ala ai ona filifili le malo e fa’ataga pea le fa’aaogaina o pasi laupapa, ae i ai aiaiga.”

Ae peita’i o le fa’alavelave na tula’i mai i le vaiaso na te’a nei sa fa’aalia e Leasi o ii lea na toe to manatu ai loa ua tatau loa ona aveese tumau pasi laupapa.

Sa ia fa’aailoa mai fo’i o loli ia e mafolafola le fausaga o le pito i luma ae ua fau fa’apasi e le to’atele e le tatau ona avea ma pasi.

“Ona o fausaga ia e mafolafola luma e fai si maualuga, ma o le mamafa o le ogatotonu e fai lava si maualuga, ma o le a avea ma ala e faigofie ai ona mafuli le pasi.

“A tatou silasila i pasi ua uma ona fausiaina mai fafo e maualalo ona e a faigofie o tauave le mamafa o le pasi.

“Ae a maualuga le fausaga o le telē fo’i lena o le avanoa e faigofie ai lava ona mafuli le pasi.”

Sa ave fo’i le lapataiga a le ofisa sili i a i latou o lo’o onaina pasi a fia fausia ni pasi fou e tatau ona pasia muamua e le pulega le saogalemu o le pasi i luga o le auala.

“E tatau ona i ai se sui o le pulega e pasiina le fausaga o le pasi.

“O loo i ai faiga faavae ua uma ona faata’atia i le fausiaina o pasi e tatau ona i ai ni laina ufi laupapa e faamalosia le pasi.”