Fia fa’aleleia auala

By Fetalai Tuiluluu 02 March 2017, 12:00AM

O le lelei o auala e faigofie ai galuega ma feau fai. 

O Alapati Leo, 63 le mātua le soifua o lo’o nonofo nei ma lona aiga i Vailele. 

Sa ia fa’ailoa i le Fofoga o Samoa le aso ananafi o le fa’afitauli lava o lo’o gafa nei ma latou o le auala. 

“Ua tou taga’i atu o le auala mai lava le na ua fia sefulu nei tausaga o iai na e iai a.

“Ua ou leiloa po fea o iai sui na fa’atū atu nei i le palota?

“Ao fea foi le pulenu’u aua o mea uma ia sa tatau na titilo iai. 

“O le uiga o la’u tala o lenei auala ua fai lava sina umi o leaga ma o lenei lava e le faia. 

“Aisea ua le faia ai ae ua leva tele na fa’aletonu?

“O le faigata o le leaga o le auala o le tulaga e tau i le feuiaiga, aua foi tele lava le fia ave ata meamata i le makeki ae faigata na la’u atu i uta i gatai e fa’atali ia le pasi. 

“O le isi tulaga ua tele foi na le toe o’o mai ni pasi ma ni ta’avale la’u pasese uta ia o le alofi i le leaga lenei auala. 

“O le isi ona popolega o le itu tau le fanau aoga, o le tele lava o le fanau e savavali le aoga, a o’o i aso timuga ua fa’apopoina le leaga le auala ma i’u ai na le o tamaiti le aoga, o le isi ona itu leaga ai o le mūgālā e le pefu ma mama’i ai le fanau. 

“Ou te ta’u tino atu o lenei auala ua leva na leaga ma ua leva foi ona feagai matou  ma lea fa’aletonu. 

“E le’o se mea tatau ea le faia loa ma foia loa le fa’afitauli?

“Tele o taimi e fia ave ai taro, fa’i ma isi lava fua o fa’atoaga ae peitai ua fai lenei auala ma faigata. 

“Mo le silafia, o tagata feola foi o lo’o nonofo i nei. E manaomia foi e i matou le ola saogalemu ma le ola fiafia mai le tele o fa’ama’i. 

“Pau lava le popolega o le fanau ina ia aua nei āfāina i le fa;atitauli tau auala.

“Ma avatua ai se talosaga ma le loto maulalo ina ia mafai ona faia mai lo matou auala i gauta nei i Vailele. 

“Aua tele foi o aiga po le a le fou i fea o latou ta’avale ae a uia mai lenei auala ia Talofa e, ua toe lau foi nisi tupe se tele le faia o o ta’avale malelepe ona o le auala. 

“Talosia ia ae utagia mai le talosaga ina ia faia le auala si o matou nu’u nei.

By Fetalai Tuiluluu 02 March 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>