O LE TUUGAMAU O TUSITALA

By Fuimaono Na’oia Fasavalu Touli F. Tupua 02 July 2016, 12:00AM

O Vailima e ta’oto i le auvae-mauga o le Mauga o Vaea. E te amata savali atu i tua o le Fale o Tusitala, ona e alu ai lea i se ala savali ta’amilomilo. Ona e tau atu lea i se ala laupapa u’amea tuai ua ‘elea e sopo’ai ai se vaitafe manino, ma pe tusa o le lima minute e  te savali ai, ona e tau lea i le pi’oga e aga’i i luga o le mauga.

Na ‘ou savalia lea ala e aunoa ma se tasi na ia faasino mai ia te a’u, ae sa ‘ou tausisi pea i le faasinoga na tuuina mai. E leai ni laupapa faasino ala e faatonu ai la’u savaliga, Na ‘ou vaaia se ala savali va-iti e aga’i i luga o le mauga ma savali ai. A’o le’i mamao tele atu la’u savaliga, sa ‘ou toe tu.

Masalo e le o le ala lenei i le tuugamau o Tusitala, ona ua itiiti se tulaga tau le toe faaleleia na fai ai, ma ua sili atu ai i lo le ala o mamoe. Ae ui o lea, sa ‘ou vaaia pea lona fepi’opi’oa’i solo, ona ‘ou manatua ai lea, ua na o se ala savali lava na sasa e tagata Samoa i luga o le mauga i le taeao po o le aso 4 o Tesema 1894, mo le solo o le maliu i lea lava aoauli. Ona faaauau ai lea o la’u savaliga.

E le taumate o se taumafaiga aupito i sili lea ona faigata, o le a’ea lea o le mauga e ta’oto ai Tusitala. O le upu moni, sa faailoa mai ia i matou e matua fitǎ le ala; i nisi vaega o le ala, e pau o le mea sa mafai e i latou sa fataina Tusitala ona fai, o le taofi mau lea o lona pusa maliu, ae tafusi maea i o latou tino, ae toso i luga e nisi o a latou ‘aumea, se’ia pa’ia le tumutumu o le mauga.

Sa ‘ou  malolo i nisi vaega o lea ala, ma ‘ou iloa ai, ua ‘ou lotolotoi i le mafiafia o le vaomatua o le teropika, ma tau saili le mea tonu o faaauau ai le ala. O nisi taimi, ou te iloa ai le ala, ae o le tele lava o taimi, ou te le iloa ai. 

Ona ‘ou taumafai lea e pipi’i i la’au ma ‘a’e i luga se’ia o’o lava ina ‘ou maua le avanoa e iloa ai le ala. O le tele o isi vaega o le ala e faalalava solo ai ogǎla’au, ona ‘ou tamafai lea e oso ai lauga poo le ui ese mai ai.

O laula’au pula ua tu’ulu e pei o lau o laau i le taumafanafana o VaHombross. E uiga ese lea vaaiga; ua amata ona ;pogisa ma sǎō mea uma; ua lē vaaia le mata o le La. Sa ‘ou faalogoina le pa’ō o lau laau, ma ‘ou vaaia se pili uliuli o faataalise ane i tua o se laau. Sa faigata ia te a’u ona ‘ou ui faataamilo i la’au, ma faamoega o apogaleveleve, ma ua lilo lo’u tino i anufe ma fetolofi solo i lo’u ua.

E faatolu ona ‘ou malolo ma faapea ifo i lo’u loto, ailoga o le ala lenei i le tuugamau o Tusitala, ona e leai ma se faasino ala e tasi, ma ua tanumia le ala i laulaau. Ua amata nei ona oso mai le lagona o le toe fia fo’i, ae faafuase’i lava ona toe aliali mai foliga o le La.

Ona ‘ou iloa ai lea, ou te lē o toe maomao mai le tumutumu o le mauga. Ona toe amata loa lea ona ‘ou savali, ae o le mea ua ‘ou te’i ai, pe o le 20 i le 30 iata ua sili ai la’u savali, ae faafuase’i loa ona ‘ou vaaia le tumutumu o le mauga, ua ma faafesaga’i, ma ua manino lelei i la’u vaai.

O si a’u taumafaiga mulimuli lava i luga, na ‘ou tula’i ai i luma o le tuugamau o Tusitala. Na ‘ou toe solomuli teisi i tua-ua ‘ou le fiafia ona o le mamao o le ala na ‘ou a’e mai ai, ae o lenei ua 1,300 futu ua ‘ou maualuga ai i lo le sami.

Ua ‘ou le maua le mea sa ‘ou faananau i ai, ona ua manumalo o’u mafaufauga ia te a’u. E leai se Ma’a Faamanatu e tusa ma le tuugamau o Tusitala; o lona faataamilosaga e ufitia i le mutia lanu lauava.

By Fuimaono Na’oia Fasavalu Touli F. Tupua 02 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>