Galue mo le lumana’i
Na maua le fa’atalatalanoaga a le Fofoga o Samoa ma Vitali Mikaele mai Siumu ma o lona manatu fa’aalia e ala lea i le faigofie o le olaga pe a galue a le tagata ia mo lona soifuaga.
E 25 le matua o lona soifua ma o lo’o galue o ia o se faifa’ato’aga ma o lo’o fesoasoani e le gata mo ia ae o lona aiga.
“O a’u ou te faifa’ato’aga ma o le taimi nei o lo’o atina’eina fa’i, talo.” O lana saunoaga lea.
“Ia o le taimi a e tatau ai ona fafai le ma’umaga ia ona sauni fo’i lea e fa’atau atu i le maketi aua se seleni le tausiga oo fanau aemaise foi se fesoasoani mo nisi o aiga i totonu o Samoa.
“Ia ae le gata fo’i lena aua le totogiina o le suavai ma le eletise ma e pei o itu lava nei e ao lava ona ave I ai le fa’amuamua pe a o’o le taimi e maua ai sina tupe.
Sa ta’ua e Vitali na o ia lava lona aiga ae o le mafua’aga fo’i lena o lo’o galue malosi ai o ia aua o le lalolagi nei ua ola lava le tagata ia.
“O lo’o sologa lelei a mea uma i lo matou aiga aemaise fo’i le nu’u e moni lava e i ai fa’afitauli ae o mea lava e tutupu le olaga lenei olo’o ola ma soifua ai.
“O le taimi fo’i nei o lo’o faigofie a mea uma aua e leai se aiga po’o se fanau le taimi nei ia o lo’o tapena lava i ai le lumana’i lea lava e le’i taitai.
“O le taumafaiga a lea e iai; o le tau atina’eina o le fa’ato’aga ina ia maua ai pea se seleni aua le fa’ataunu’uina o mea e mana’omia.
“O aso uma a la ou te usu ai le ma’umaga ia a ma’ea fo’i ua toe tau savali fo’i le fale aua se malologa.
“E leai lava se mea e faigata i lo’u olaga i le taimi nei aua na’o a’u ma e pau a le mea e fai ia fa’amalosi ae aua le fa’avaivai i taimi e o’o mai ai puapuagatia ma mafatiaga.”