Lauga - “Faauta, o le lalolagi fou” (Ken.8:13)

03 January 2016, 12:00AM

O upu a Paulo i le ekalesia i Korinito, ua mavae mea tuai, faauta, ua faafouina mea uma (2 Kori.5:17). A o le tuleiga mai le nofoalii o le Alii, Faauta, ou te faia ia fou mea uma lava. (Faaliga 21:5).

O le mau a le Tusi nei o Kenese, o le atoaga o le tausaga o le lolo, o le tausaga e ono selau ma le tasi, i le aso muamua o le uluai masina, na mate ai le vai i le laueleele. Ona to ese lea e Noa le ufi o le vaa ma ua vaai atu, faauta, ua mātūtū le fogaeleele. O le lalolagi fou.

E tausaga atoa o faaopeopea Noa ma lona aiga i luga o le vasa tele sa lofia ai le lalolagi atoa. Sa le i mafai ona vaai atu i fafo i matagi ma auma fafati. O galu ua faamalumalu mai ma fetafeaiga o le au. O leo o le mafatia ma le tau alaga o le fia ola.

O le toasa o le Atua ma lana faamasinoga. O Noa ma lona aiga i totonu o le vaa, a o fafo i le lalolagi ma ona malosi faale natura, o le pisinisi lena a le Atua. I le, ua fetafeaiina solo le vaa o Noa i luga o le fogavai ma le le iloa poo fea e agai iai, auā ua liloia le lalolagi atoa ma ona mauga maualuluga i le vai.

Ua leai se faamoemoe o le tagata. A o le Atua, e ana ia le fuafuaga.

Ua na faaumatia mea uma ua iai le mānava, ae tapena le tagata ua tofia mo se isi amataga. O le tala, ua maūi  le lolo, ma saga maūi pea seia oo ina tuta’ia le vaa o Noa i le mauga o Ararata. O le mau a le tusitala, ua mate le vai. Ona to ese ai lea e Noa o le ufi o le vaa ma vaai atu, faauta, o le lalolagi fou. O mea fou ua saunia e le Atua mo le amataga fou. Ua fou mea uma. 

Ua to’a le vaa o Noa i lona lalolagi fou. E ui ina sa faaloaloa le tausaga o tau peau i le vasa, a o le ata a le Atua, e iai lona toomaga. O le lalolagi fou lona taulaga.

Lo’u atunuu e, malo le folau. Malo tau! Pagā lena tausaga! Sa felafoaiina i tatou i tiga tutui ma le ogaoga o lu’i ma faigata o le olaga a o iai i luga o le vasa. Tausaga o le fememea’i ma le atuatuvale. O le le mautonu ma le faaletonu. O le oi ma le oono.

O le tagi talatala ma le fasa solo. O loimata o faanoanoaga ma le pulapulavale ua le mau taga. O le ola masalosalo ma le fetōtōa’i i le tatalo! La lea ua e pale! Malo onosai! Faafetai faatoatoa! Ua to’a lou sa Samoa. Ua tatou iai i taulaga o le 2016. Viia le Atua! Ioe, fai mai Tavita, Pe ana le o le Atua….(Sala.124:1-5)

O fea fili o le lalolagi ma puapuaga? Poo fea matagi malolosi ma afā? Samoa, God’s  endless love is greater and bigger over the forces of nature. Praise God! Fai mai le tusitala o le Kenese, ua mātūtū le fogāeleele.

Ae le i iai se tumutumu mauga o le lalolagi na onoono a’e i luga ina ua ufitia e le lolo! A o lea fai mai, ua mātūtū! Ioe, na onoono a’e i luga sou poto, sou malosi, sou faatuatua i taimi o ou tigā? I itu aso o lou pogisa?

Pe le o tatou manatu ea ma mafaufauga sa malelemo uma i lologa  o lena tausaga? Ae faafetai i le Atua e laualuga lona alofa ia te oe ma lou aiga; ia Samoa ma i tatou uma. Sa fetafeaa’iina i tatou i tigā ma puapuaga; i mafatiaga ma to’atuga; a o le polokalame a le Atua ma lana ata, e tuta i Taga lo tatou sa. Ua mātūtū le fogāeleele!  O le faailoga o le pule aoao a le Atua ma lona silisili ese.

Ua tafiesea faafitauli ma vaivaiga. Ua lōfia le faasausili ma le ola i togafiti; auā ua mavae mea tuai, faauta, ua faafouina mea uma. Ua malo le alofa o le Atua. A o ai na te faamatalaina le alofa o le Atua? Pe se a foi la lea alofa ia te oe ma tatou uma?

Samoa e, ua le  namalelāina le aao faaola o le Atua i lou aiga ma o tatou faiva. Ua le tauilo foi lana pule tausi ma lana taitaiga saogalemu i lo tatou ola. Ua mate malosi o le lalolagi. Ua laolao peau o le sami. Ua mātūtū le atamai na ati; auā ua tu le pule tasi a le Atua poto, tatou te a’ea laufanua o le 2016. O le alofa lea o le Atua. Ua tatou a’e maloloina i lona filemu. Ua tatou tuta saogalemu i lona mana. Ua to’a le folauga a le atunuu i lana Tōfā Poto.

Ua tatou pale i lona onosai ma lona faapalepale. Samoa, e ofoofogia le alofa o le Atua! Ua to’afilemu mea uma. O le fefe, popole, faanoanoa,  ua mou atu ua leiloloa! E moni lava; ua fou mea uma ua faia e le Atua. Ua tatou aulia lenei tausaga fou, Aleluia! Ua tatou iai i faamanuiaga o so tatou lalolagi fou.

Samoa e, tulai mai. E le tali gūgū e i tatou le alofa o lo tatou Matai. Se i o tatou fai le faafetai. Auā o la Tavita, e tatau ia te ia le viiga (Sala.96:4). Se a sau upu i le Atua? E faapefea ona e tali atu i Le o tu pea i matagi’olo? 

Pe tauia i se a fofoga alofa i le ao ma le po o Le ua fai ma Atimalala o lau folauga i lena tausaga?  Fai mai le Tusi nei, ua faia e Noa le fata faitaulaga ia Ieova (f.20). A o oe, se a lau tali faaaloalo?  O fea e fai ai lau tali lumāfale?  Fai mai Tavita, e sili le loto ua momomo (Sala.51:17), ma le agaga o mea uma ua i lou loto (Sala.103:1-2). Ae le mafai foi ona tuua faale  leoa e le aganuu le agaga mimita ma le faaviivii, e faailo ai le maualuga o le alofa o le Atua e ala ai ona sula:

Pale e, ua pale!

Titi e, ua titi!

Ula e, ua ula!

Samoa e, e tāua lo tatou  laasia o lenei foi tausaga fou.  Peitai, ua silisili ona tāua lou tagata fou, ua faafouina  i  mea uma ina ua e a’e malo mai lologa o lena tausaga ua mavae atu. Auā o lou tagata fou, e amata ai e le Atua le isi lalolagi fou o le 2016.

Ia manuia tele le Tausaga  Fou.

                               

Amene.


7737063/7783782

E-mail: [email protected]

 

03 January 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>