Fa’aalia le agaga alofa o tinā

Tusia Deidre Tautua – Fanene ,

41 Hits

MAFUTAGA MALOSI: Mafutaga a Tinā o le Ekalesia Fa’apotopotoga a le Atua i Taga i Savai’i ma le latou fa’afeagaiga o Rev. Simalau Kovati.

MAFUTAGA MALOSI: Mafutaga a Tinā o le Ekalesia Fa’apotopotoga a le Atua i Taga i Savai’i ma le latou fa’afeagaiga o Rev. Simalau Kovati.

O le mafuataga a tinā mai Taga i Savai’i ua mafai ona latou tu’u atu lo latou tauau e ala lea i lo latou fa’atupeina atoa o aoga mo ni tamaiti se to’aono o le a a’otauina i le Univesite Aoao o Samoa, Le Papaigalagala.

I lalo o le ta’ita’iga a le susuga i le fa’afeagaiga i a Simalau ma Nefunefu Kovati, ua mafai ai e le Mafutaga a Tinā ona latou fa’atupeina lea fa’amoemoe.

I le finagalo fa’aalia a se tasi o tinā, Fetuao Elu Tama, o lenei fesoasoani ua fai ma fa’amāmā avega i a te ia.

“E to’aono tamaiti ua mafai ona latou ausia maka i luga o le tausaga fa’avae a le Univesite aoao o Samoa.

“Ma o nei tamaiti uma ua mafai ona latou mauaina lea meaalofa tāua.

“Ma o lenei meaalofa ua mafai ai ona maua e nai a matou fanau lenei avanoa e aunoa ma se popole o matou matua i le fa’atupeina.

“Ma o se lagona fa’agae’etia ona o se finagalo fo’i ua ae’a i le Mafutaga a Tinā ina ia fa’amuamua le fanau ma le latou lumanai e ala lea i a’oa’oga.”

Sa ia fa’afetaia galuega lelei a le faletua i a Nefunefu Kovati ona o lona mata’itūina lea o le manaomiaga tele i le itu tau a’oa’oga a le fanau.

Sa fa’aalia fo’i le loto fiafia o le faletua ona o taumafaiga a alo ma fanau o le afioaga.

“Sa maitauina le i nai taimi ua mavae nisi o le fanau sa le mafai ona fa’ai’uina a latou taumafaiga ona e le’i gafatia e matua ona fa’atupeina,” o le saunoaga lea a Nefunefu.

“O le ala lena ua ae’a ai se finagalo i lenei tausaga, o le matou matāfaioi ina ia tu’u atu matou tau’au e fesoasoani ai i le fa’atupeina o a’oa’oga a nai fanau.

“Ae o le a se isi itu pito sili ona taua nai lo le matou fesoasoani i nai a matou fanau ua fa’amanuiaina i lenei tausaga.

“O le matou tiute lea o le matou mautinoaina lea o lo’o maua e matou fanau avanoa e mafai ai ona fa’ai’uina ma le manuia a latou taumafaiga e ala i latou a’oa’oga.”

E $9,000 le tinoitupe sa tu’uina atu i le fanau e to’aono ma e $1,500 a le tamaititi e to’atasi.

O nei fanau o Teuila ma Oliva Tagaloa, Fuapepe Maresa, Talaleleiovaipouli Tamala, Sine Fegauiai ma Ioelu Lealofi Simi.

Sa fa’ailoa mai e le faletua e le’o mautinoa lelei po’o le a faia pea lenei agaga fesoasoani i tausaga uma.

Ae ui i lea sa fa’aalia e Tamala le loto fa’afetai ma o lana saunoaga ia aogā lenei galuega lelei ua amatalia e le mafutaga a tinā mai Taga e tosina ai le tele o isi fa’alapotopotoga laiti e fesoasoani i fanau aoga.

© Samoa Observer 2016

Developed by Samoa Observer in Apia