Fia maua e Sefo se galuega e fesoasoani ai i lona tamā

Tusia Deidre Tautua – Fanene ,

16 Hits

Sefo Fuiavailili, 37, mai le afioaga o Sale’imoa.

Sefo Fuiavailili, 37, mai le afioaga o Sale’imoa. (Photo: Misiona Simo)

O le toa’tele o tagata I le vaitau lenei ua sili ai le faigaluega nai lo le alu I le ma’umaga.

O le manatu foi lea a le alii i a Sefo Fuiavailili, 37, mai le afioaga o Sale’imoa.

O lenei alii e leai sona aiga ae o lana galuega i aso uma o le usu lea i le ma’umaga e galue ai ma tausi ai lona aiga.

“Ua ou va’aia le mafatia o lo’u aiga i le itu tau seleni,” o lana saunoaga lea i le Fofoga o Samoa i le aso ananafi.

 O lo’o ola le eletise i le matou fale ae peita’I e tasi lava le moli e ola ona e le gafatia ona i ai nisi moli e sili atu nai lo le tasi.

“E matou te fa’alagolago i le fa’atoaga ma le matou tama’i togāla’auaina o lo’o i autafa o le fale.

“O le ala lena ua ou mana’o ai lava ia maua se galuega ina ia mafai ai ona ou fesoasoani i lo’u aiga i le itu tau seleni.”

O le manatu fo’i o lea taule’ale’a e le gafatia e le fa’atoaga le olaga o lo’o ua i ai nei Samoa.

“E ese le faigata o le olaga lea ua i ai nei,” o lana saunoaga lea.

“A tatou fa’alagolago e na o le fa’atoaga e le mafai ona gafatia ona e le fa’apea a totō atu nei ona ola mai lea taeao.

“E tatau lava ona i ai se tasi vaega e lua ma le fa’atoaga ina ia afai ai ona tausi aiga.”

O le augani a lea taule’ale’a e ala ona ia mana’omia se galuega e fesoasoani lea i lona tamā ma lona gasegase.

“Ua leva ona ma’i si o’u tamā ma o le tau fo’i o ana togafitiga e fai lava si taugata.

“E mamao foi le nofoaga lea matou te i ai ma le falemai ma o esi tupe alu lena.

“O lo’u vaavaai atu i le mafatia o lo’u aiga o le ala lea ua ou manaomia ai lava soo se galuega ina ia ou fesoaosani ai.”

© Samoa Observer 2016

Developed by Samoa Observer in Apia