Fuafuaina o le a i ai ni suiga

42 Hits

Papalii John Taimalelagi.

Papalii John Taimalelagi. (Photo: Samoa Observer)

O le fuafuaaga lea ua iai o le a iai ni suiga i le faatinoina o Soalaupulega (mediation) mo le Faamasinoga o Fanua ma Suafa.  

E pei ona silafia o soalaupulega o lo o faatino i le taimi nei, o lo o faatino lava e le Resitara ma lona Ofisa.  

O soalaupulega mo le Faamasinoga o Aitalafu (Civil) a le Faamasinoga Maualuga ma le Faamasinoga Faaitumalo o lo o faatinoina e Accredited Mediatiors mai le Accredited Mediators of Samoa (AMSA).  

O lea ua aé se finagalo o le Afioga i le Minisita ma le Afioga i le Faamasino Sili, e faalautele mai lenei auaunaga mo le faatinoina o soalaupulega mo le Faamasinoga o Fanua ma Suafa.  

Ma ua o gatasi lea ma le finagalo o le Palemene, e pei ona pasia ai le le lipoti a le Komiti Faapitoa a le Palemene mo Faamasino o le Faamasinoga o Fanua ma Suafa, ma le tali atu a le Faamasinoga i lea lipoti.  

O se tasi lea o vaega taua sa agai iai le sailiiliga a le Komiti, o le faatinoina o soalaupulega o mataupu tau fanua faaleaganuu ma suafa matai.  

Ona e iai le sootaga feteenai (conflict of interest) o le faatautaia e le Resitara ma lona Ofisa o nei soalaupulega.  

Ona o le Resitara ma lona Ofisa o lo o faia le auaunaga i le atunuu pe a faatoai mai se mataupu i le amataga.  

Ma e le o talafeagai le faatino e le Resitara ma lona Ofisa o le auaunaga i le atunuu i mataupu faatoai mai, ae mulimuli ane toe saofafai le Resitara ma lona Ofisa i le faatinoina o le soalaupulega.  

O lea ua tatau ai ona faamatuu atu lea auaunaga i tua (private) e faatino e nisi ua iai le tomai ma agavaa faapitoa i le faatinoina o soalaupulega.  

O lea la ua mafua ai le faiga paaga lea a le Matagaluega ma le Vaega a le AMSA, o lo o iai mediators ua maea ona aoaoina faapitoa e faatinoina lea auaunaga.  

Ma e na o solaupulega ua maea ona faauluina talosaga ua fuafua e agai i le Faamasinoga mo sana faaiuga, o le a faatautaia lea e le AMSA.  

Ua faataoto foi la le faiga faavae ma taiala e mulimulitai ai le faatinoina o le galuega, ma o le a gafa lava itu auai o se mataupu ma le totogiina o le Tufuga o le Faatofalaiga (mediators).  

E pei foi ona silafia le ave a le faataua a le Faamasinoga ma le Malo i le faatinoina o soalaupulega lenei a le Faamasinoga o Fanua ma Suafa.  

E ala lea i le faataua faaletulafono, e pei ona taoto ai nei le Tulafono Teuteu o Fanua ma Suafa 2012, lea ua le mafai ai ona tagofia e le Faamasinoga o Fanua ma Suafa se mataupu, e aunoa ma le soalaupuleina muamua.

Ua iai le faamoemoe o le masina o Mati o le tausaga nei, o le a faapea ai ona amata lea suiga i soalaupulega o mataupu fanua faaleaganuu ma suafa matai mo le faamasinoga o Fanua ma Suafa.

© Samoa Observer 2016

Developed by Samoa Observer in Apia