O LA’U TALA FO’I

03 July 2016, 12:00AM

1.Matauina i Tala Fou le maliu o se tama’ita’i e faapea na oso ese mai se taavale ona e faapea le tala sa i ai se mea sa le fiafia ai…! O le pogai la lea ua tuuina mai ai se lapata’iga-a’o faaauau pea su’esu’ega i ia faalavelave. O lea la o loo faapea mai ua molia ai se alii e 25 tausaga le matua- ona o le avetaavale faatamala ua tupu ai lea faalavelave.

O le tala e faapea o lea ulugalii sa malaga mai Lefaga i Apia i le Aso To’ana’i talu ai-ma o le taimi lea na oso ese ai lea tamaitai mai le taavale i Aleisa! Fai mai na avatu le tamaitai i le falema’i ma maliu ai I le aso na soso’o ai-ona o le matuiā o manu’a i lona ao!. O le isi faalavelave o se tamaitiiti e tasi le tausaga i Falealili- fai mai o lea ua molia ai se alii e 45 tausaga le matua-ona o le avetaavale faatamala…!

E i ai foi ma se isi alii e 83 tausaga le matua-ina ua le mafai ona ia faafoeina le taavale ma i’u ina lavea ai i se Pou molī…! Ia-afai la tatou te tilotilo lelei i nei faalavelave-o le fesili ua tula’i mai-o le a le pogai? Afai o se tasi na oso ese ma le taavale a’o alu-poo se taavale na lavea-o le fesili-o le a le pogai? E faapefea ona tutupu nei faalavelave pe afai o ni avetaavale ua laiseneina? Faamata o le le faia o ni su’ega e pei ona masani ai mo avetaavale uma-le pogai?

O le upu moni ua fau ma soloi le anoano o taavale i totonu o Samoa i le taimi nei-ma afai o lea- faamata e le o se mea tatau le toe fai o su’ega mo tagata uma e fia avea ma avetaavale-ina ia mafai ai ona latou iloa tulafono uma tau auala-le saoasaoa e malaga ai i lea auala ma lea auala? Afai la ua tau le ‘asa se aso ma tulai mai nei faafitauli-e mafua ona ua le gata ina faateleina taavale i totonu o le atunuu-ae ua sili atu ai ona toatele avetaavale latou te le iloa ni tulafono tau feoa’iga i luga o alatetele?

Afai foi la e le o lea le faafitauli-a faapefea la avetaavale ia e feoa’i solo i le po-ae onanā? O ai tonu le Ofisa poo le Faalapotopotoga e gafa ma lea matafaioi? O le a sou taofi?

2.Matauina foi i Tala Fou fai mai e lagolagoina e le Palemia le matafaioi a Samoa i le avea ma nofoaga e teu ai tupe o lafoga i fafo-fai mai o tupe mo polokalame a tamaiti e ono mafai ona faaaogaina mo fualaau faasaina. Afai la e pei ona taua e le Palemia o tupe totogi ia e maua mai le kamupani o le Panama Papers a le Mossack Fonseca ma isi-e maua mai ai tupe maua taua mo Samoa. Afai la o lea-o gafea o faailoa mai ai ia tupe maua e ta’ua-i le atunuu.

O faaalia ia tupe maua i le Tala o Tupe lea na pasia talu ai nei pe leai?Afai la o loo auai Samoa  i le avea ma nofoaga e teu ai ia lafoga-e i ai sona ofisa i Samoa nei? O le isi fesili taua- “O anafea na aveaai Ofisa Amapasa a Samoa i fafo ma nofoaga mo isi fuafuaga? Afai la o maua mai ai ni tupe a Samoa e ala i ia faiga-faamata e mafai ona faailoa mai i le atunuu pe fia ni miliona ua maua ae o fea o teu ai? O le a sou taofi?

3.Ua matauina foi finagalo faaali o le Sui Peresetene muamua o le Faamasinoga o Fanua ma Suafa o Anae Pita Anae=e tusa ai ma le faatuina o se Komisi Su’esu’e e iloiloina le faatinoina o galuega a Faamasino o le Faamasinoga o Fanua ma Suafa! O le finagalo la o Anae-e i ai faaseā a tagata-e faapea na te teena le valaau a le Palemia-ae leai. E lagolago e Anae le valaau a le Palemia! Ae ia manatua foi-e matua leai, leai lava se mea e igoa o se mea sa’o i le lalolagi nei-ma e le tau sailia se faamaoniga o lea mau.

Ae afai la tatou te tilotilo i le Malo atoa-faamagalo mai a’u pe a ‘ou fai atu- e matua leai-leai lava se mea e igoa o se mea moni! A toe faamalamalama lo’u manatu-ona faapea lea-e matua leai-leai lava se mea e igoa o se mea tonu ma le sa’o-o i totonu o le Malo. E mafua- ona o le fai atu o le isi o le a ma le a-ae galo ai ia te ia le anoano o mea na ia faia ia o loo fau sasaga i ona luma-ae leai ma se mea e tasi o fai i ai? A faapefea la ona fai i le isi tagata e fai le mea tonu-ae tausolomua ia ona le faia le amiotonu?

O se faailoga lea o se ta’ita’iga lelei e tusa ai ma le finagalo o le Atua lea o loo faavae ai Samoa? A tuu foi i le aganuu ma le faa-Samoa-e mafai e le mafai o le isi nuu ona faatonu matai o isi nuu ina fai le a ma le a-ae o loo pi’ipi’i i ona lava foliga- le anoano o mea pi’opi’o ma le faaletonu?

A fua la i faiga pi’opi’o a le faigamalo lea e faitau miliona ma miliona tupe a le atunuu na maumau ai-aisea ua le vala’au ane ai se isi Minisita poo se Faipule i le Palemia- e fai muamua se tonu i faiga pi’opi’o a lana faigamalo ma taupulepulega leaga a tagata faigaluea o le Malo-ona faatoa tapā ai lea o isi matagaluega a le Malo e togafiti o latou faaletonu?  O le a sou taofi?

4. Ia-o lea ua toe si’i foi le tau o oloa ma le tau o le pesinisi, suau’u ma le kalasini. O le valaau la a le atunuu i le faigamalo-“O le a se manatu o le Malo i le aitalafu a le Faalapotopotoga o le Malosi Faa-Eletise lea e totogi e le atunuu-faatasi ai ma le suau’u lea e aumai e vili ai le eletise –toe totogi e le atunu pili o latou moli?

O se mea amiotonu lea lau Afioga i le Palemia ma lau faigamalo? Amuia outou o lena e maua le anoano o outou manuia-lava a outou tupe e tausi ai outou aiga-feoa’i solo i taavale taugata a le Malo toe utu e le malo le penisini-ae leai se mea faapena o maua e le atunuu! Faapefea le anoano o fanau ua le o i ni a’oga ae ua feoa’i solo i magaala e faatau atu oloa ona o le fia maua o se tupe e tausi ai o latou aiga?

Amuia lava outou tou te le o feagai ma nei tiga o loo sasa pala ai le atunuu i aso uma! Silasila i le faateleina o le fasioti tagata, talepa fale-gaoi ma le faomea-toso teine ma soligatulafono tau feusuaiga! Faamata e tulai mai nei faafitauli pe ana o taugofie le tau o le soifuaga! Silasila i le soona fai ma le faatautala i tupe o le afu maligi o le atunuu totogi lafoga mai o latou totogi- toe o atu i faleoloa mo se mea’ai-o loo ti’eti’e mai ai foi le isi Lafoga o Taumafa!

O afea ‘ea e mafai ai ona faaaoga e lenei faigamalo le suafa o le tamaitai Savaii- o “Faataualofa”  O le a sou taofi?

03 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>