LAUGA - “O le suafa malo”

By Rev. Petaia Setu 03 September 2017, 12:00AM

(I Samuelu.17:45)


I la tatou aga faa Samoa, e iloa le faasinomaga i le suafa. A fegasoloai foi le atunuu i ā latou aga masani faafaleupolu, ua iai lava suafa tulāfale iloga o sea alaalafaga ma sea afioaga e tauave. E pei o le Asiata i Satupaitea; o Lavea i Safotu; o le Tiatia i Gataivai; o le Fata ma le Maulolo a Tuisamau, ma le tele lava o isi suafa. E faamoemoe i le suafa lea e tiu mālo ai. E amana’ia ai ma aloa’ia lelei ai. E faamoemoe o le suafa poo faalagiga ia, e mau ai; e tamaoaiga ai; e maua ai mālo. E le iloa e Koliata poo ai Iese! E le popole foi Filisitia pe a ta’u atu o Sa Iutā e tupuga mai ai le tamaitiiti lea (f.33)! Ae ua iloa lelei e Filisitia ma lo latou toa le Atua o Isaraelu. Fai mai Tavita, “…a o a’u, ou te alu atu ia te oe i le suafa o Ieova o ’au, o le Atua o Isaraelu.” 

E le fou ona fai o Filisitia ma sasa ia Isaraelu. Na afua mai i ona po o faamasino (Faama.10:7). Ua malamalama lelei foi Filisitia i le mata’utia o le Atua o Isaraelu (I Sam.5:3-6:5). O Filisitia, o loo ta’oto i le talafātai i sisifo o Iuta, e feagai ma le Sami Tele (Metiterani). O ona tagata o ni tagata tino lelei ma le maualuluga. O Koliata, o lona toa lea i  lea foi vaitau. O se tagata tino ese ma le maualuga. E ono kupita (18 inisi i le kupita e tasi ma le aga e tasi (9inisi) lona maualuga. O lona uiga, e 9:9”. Ua maoa’e lea maualuga. O Tavita, ua na o se tamaitiiti sa leoleo i mamoe a lona tama o Iese. O le ui’i ia o le fanau e toavalu. O le sefulu valu o ona tausaga sa faauuina ai e Samuelu e fai ma tupu.

O se talavou e tele ona agavaa. E faamaoni, e faatuatuaina, e faamoemoeina. O se taulealea e talitonu ma faalagolago lona ola i le Atua o ona tamā. I le fesāga’iga ma le toa matautia o Filisitia, e le i fefe. E le i popole lava Tavita i se mea e tasi (Salamo.23:4). Ae aisea e popole ai pe afai e sa’o le loto i le Atua? E fefe i se ā pe afai e le luagia le suafa o Ieova? Samoa, o le manumalo, o le tutusa o le gutu ma le loto.

Aua o le loto e talitonu ai ma le gutu e ta’utino ai le Alii o Iesu, e faaolaina ai oe (Rom.10:9-10) E le i li’a Tavita i le maualuga ma le tino ese o le Filisitia. E le i faafefeina le taulealea Eperu i tao e lua ma le pelu. Ua ta’utino e Tavita lona loto, “A o a’u,” “A o a’u.” E le i faamaualuga i le ’a’u, a o le igoa na ta’u. E le i ta’ua e le tama iā Koliata sana ma’atā poo ni maa ālia; a o le suafa o Ieova o ’au e fasi ai le Filisitia. Se ā na mafai ai e lenei tamaitiiti, ae le mafaia e ō tatou tagata matutua? Afai ua fasioti e Tavita le toa mata’utia, ae faapefea o tatou olaga tuinanau, o ai na te faaumatia?

O le faafitauli lea ua pei ai o loo fai se maliu i le togālauapi a Isaraelu. Auā foi ua leai se tagata e mafaufau i le Atua. Mea ane, o le nuu o le Atua soifua e pei ona fagufagu atu ai Tavita (f.26,36,37). Ua leai lava manatu i le Atua, o lē na ia faia vavega e tele i lona nuu. Na ia tauina taua mo Isaraelu. Na ia faasaoloto le nuu mai ona fili. O le upu moni, e le i pā’ia le tino o Isaraelu ina o fai le Atua soifua ma ō latou tupu. Fasefulu tausaga mai Aikupito se’ia ā’ea eleele o Kanana. Nei la, ua le fesili i le Atua! Ua su’e i le togalauapi se lavea’i! Poo ai, a o ai e mafai ona fesoasoani ma faaola i le nuu (f.25)? E pei o le ata lea ua fai ma ma’i masani o ō tatou tagata, e see loa i tofiga ma tulaga faaeaina o aiga, nuu, o lau galuega, o le ekalesia ma le mālo, ona sesē atoa lava lea o ō tatou faiva. Ua na ona faaonomea lava o le suafa o le Alii, ae le faalogo i le Alii. Ua e manatu lava oe, o oe ua poto.

E te iloa mea uma. Ua e faapea ifo, ’a ua o’o loa i lo’u taimi, o lo’u taimi!’ E le fia faalogo i ni fautuaga. O au tonu e faia ai mea uma lava. Samoa, faalogo mai. O le taimi lava e pūlea ai oe e le “I am,” e fai ai oe ma taitai faalumaina (I Sam.16:15). E fai ai oe ma auauna faasalaina (I Tupu.21:21-24). E iloa ai lou tagata toilalo (I Sam.15:23,26). O fea nei la le poto faa – taitai? O fea le malosi faa – fitafita? La lea ua fiti solo; ae le maua i le togalauapi se suafa poo se mamalu e ola ai! Samoa e, e le tamilo le silisili ese ma le mamana o vavega ma galuega ua ta’ua ai le suafa o le Atua soifua. E le o mamalu o le nofoalii o le tupu o Isaraelu na ea ai le nuu! Leai! E le o la’ei o le taua ma teuga faafitafita; leai! E le i su’e mālo Tavita i le tao ma le pelu. Fai mai le taule’ale’a, “Ave ese ia o na mea, auā ou te le i masani ai” (f.39). O faapefea ona fai o lau tautua? ’O ’e taitaiina lou aiga ma lau fanau i le Atua o Tavita? A o oe, po ua tonu ea lou loto i le Alii lou Atua? E sa’o le taulealea Eperu. E le masani i le malosi lea o loo  faalagolago iai Saulo.

E le masani i le olaga lea e nanau iai le nuu. E le i a’oa’oina ai e Iese. E le i faamasania ai e lona tama. Na fofoa mai i uiga paia o le Atua. Sa fa’afailele mai i ala o le Atua. Ua ia iloa lelei ma malamalama lelei i le Atua o Isaraelu. Fai mai a ia “Ou te fasia lenā Filisitia lē peritomeina, ina ua ia faifai i le itu taua a le Atua soifua.”(f.36). E talitonu Tavita i le Atua. Auā e masani ai i le Atua. E le i tau Tavita i se ‘I am’ faa – taitai. Ae na manumalo i le “I am” faa – auauna “A o a’u, ou te alu atu ia te oe i le suafa o Ieova o ’au….” O lana tautua toto lea. E faavae i le Atua soifua. E tauave e Paulo faailoga o Keriso, ae tauave e Tavita le suafa o Ieova o ’au, o le Atua e soifua pea lava pea. O le suafa e maua iai le atoatoa. E maua iai le mautinoa. E saoloto ai. E ola ai. E maua ai le mālo.

Samoa o le faamanatu, ’Aua le faaaoga sesē e tatou le suafa o le Alii (Eso.20:7). Ia lē faaaogaina o se mailei, e māunu ai o tatou mana’o. ’Aua. E le tiu ai ni mālo usu pe ta’aa’iga ai ni aga masani faafaleupolu. E le o se suafa taufa’amata’u pe faa-lā-lā ai se pule malosi a le au failotu. O le suafa mālo. E mālo i ola. E mālo i le alofa. E mālo i saolotoga. E mālo i faamalologa. Faauta i le tagata na fanau mai o pipili (Galu.3:6-8). E lei mafaia e tupe maua o aso taitasi ona laveai o ia. Ua le o le toaga foi ile falesa na saoloto ai! A o le suafa mālo. “… ou te avatu lea ia te oe. O le suafa o Iesu Keriso le Nasareta, inā tu ai ‘ia i luga, inā savali.” O le mau a Luka, “ ua savali o ia, ma oso, ma vivii i le Atua” Ua mālo i ma’i. Ua mālo i ola.

Le au uso e, poo sa’o lenā igoa e te taumulimuli ai? Ae poo faautauta ona e tauave mamalu ma tamāli’iga o lo tatou Alii Faaola? Ua inosia e Tavita i latou ua faifai i le suafa o Ieova. Auā o Ieova, o lo tatou ’olo ia ma le malu. O le olataga ia. Fai mai Solomona, “ O le suafa o Ieova, o le ’olo malosi lea; e sola atu iai lē amiotonu, ona sao ai lea o ia.” (Fat.18:10). Selau pasene le talitonuga o Tavita. Toe faafoi le nuu i le Atua. “ E lē faaolaina tagata e Ieova i se pelu ma se tao” (f.47). A o ai tatou te faalatalata iai i itu aso faigata? 

Samoa e, talia nei loa Iesu ma faatuatua i lona suafa; ona tatou maua lea o faamanuiaga. I le, e tau ai foi i le niusina lo tatou gafa (Ioane.1:12).

 A o a’u, out e alu atu ia te oe i le suafa o Ieova o ’au, o le Atua o Samoa – o le suafa mālo.

Amene

 

By Rev. Petaia Setu 03 September 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>