O la’u tala fo’i

04 January 2016, 12:00AM

1. Matauina i Tala le anoano o sauniga faamanatu mo le Tausaga Fou 2016-e pei ona faatinoina i totonu o le atunuu. E le gata i totonu o nuu i le salafa o Samoa ia sauniga faamanatu- ae faapea foi i totonu o Ekalesia eseese i totonu o le atunuu!

A tatou tilotilo lelei la i lea tulaga-ona tatou iloa ai lea e ui lava ina po’ia le toatele o le atunuu i le mativa ma le le tagolima-ae o le loto faafetai ia i le Atua- e le faaitiitia! I le vaai la faale-mafaufau- e ala ona le atagia tele mai le mativa ua i totonu o le atunuu-ona o le finagalo finau lava o tagata latou!

E ui foi ina e le o maua e o tatou tagata faamanuiaga uma e tatau ai -e pei o isi atunuu-ae faamuamua lava le fiafia ma le faafetai i le Atua i o latou soifua!

O le vaai la i ia sauniga-o le toatele lava o aiga o loo fiafia ma sisiva faatasi ma nai a latou fanau! Ae a tatou tilotilo la i nai tamaitai ia o loo feoa’i solo e faatau atu oloa i luga o ala tetele I lenei vaitau-o le fesili pe faamata o latou maua se Kirisimasi fiafia faapea?

Ae afai lava ua siliga-ia o loo soifua le Atua na te silafia mea uma! E leai foi se faaletonu- ua faafogaina e le Atua la latou alaga o le fiaola-aemaise ai o le mativa ma le leai o se isi mea e tua i ai! Ae ui o lea-tatou te talitonu o loo silafia e le Atua o outou tiga-ma o Ia foi na te faia le fofō mo nei faafitauli uma!

O lea ua lata mai le Palota Lautele-ma o le upu moni -afai ua faafofoga le Atua i le oi ma le pologa o Samoa-‘aua le popole-o Ia foi na te faia le suiga e lavea’ina ai Samoa! O le a sou taofi? 

2. Ua matauina foi nisi o tamalii ma failauga o le atunuu ua faamavae mai a latou galuega ona o le fia tauva i le Faiga Palota Lautele o loo loma nei! Ia-e pule lava Sitafine ia i le La o lona vaa-e le faatonuina foi e le Matapia le Manaia-ae vagana ai sina tuu-a-lalo aua e le o po se lilo-ua matua pagatia lava Samoa i le mativa ma le le tagolima.

O faanaunauga la o le loto-ia tula’i mai ni ta’ita’i fou latou te mafai ona latou toe faaleleia le tulaga ua i ai nei Samoa.

O lona uiga-ia tulai ni ta’ita’i fou latou te faamuamua le manuia o le atunuu-ma o lea manuia- e le taitai ona maua pe a faaauau pea faiga pi’opi’o ma le faatautala ia o loo fai pea e le faiga-malo o loo i ai nei!

O le uiga la o se manatu-e le’i tofia e Samoa ni ona ta’ita’i e o atu e fai ni faiga pi’opi’o ma le faatautala i meatotino ma tupe a le atunuu-ae na tofia latou te vaaia ma faaaoga tatau tupe a le atunuu mo lona manuia-ae le mo so latou manuia ae malaia ai le atunuu!

Matou te le tau faailoa atu le anoano o miliona ma miliona a le atunuu na maumau i faiga a le Minisita o Tupe ma le SLC! Ae le tagata i lea-o taupulepulega leaga a le aufaigaluega a le Malo na maumau ai foi le anoano o isi tupe e tele a le atunuu!

Ana faapea la e leai nei faiga faatautala ma le le popoi- e matitiva faapenei le atunuu? Afai la ua taumafa palapala le atunuu talu ai nei faiga pi’opi’o a le faigamalo o loo i ai nei-o le a la le mea e o’o i ai pe a tumau ai pea?

O le mea lea matou te matua lagolagoina ni sui faatutu fou e tulai mai e fai se faiga alofa mo le atunuu! Silasila i fanau ua feoa’i solo i luga o ala tetele e faatau atu oloa ona o le fiaola ma ua aisi solo!O se tofi lea o Samoa mai le HRPP?

E le’i faia se Malo Tuto’atasi o Samoa ina ia pologa ai-ae na fai ina ia sa’oloto ai i ona manuia! Ia-o a la manuia pe afai e saunoa ma faatautala i ai le faigamalo? E mana’omia la ni faipule fou latou te mafaia ona sui le tulaga mata’utia lea ua i ai nei Samoa! O le a sou taofi? 

3. Matauina foi i Tala Fou le manaia o se fe’au faamanatu a se tasi o Faafeagaiga i lana ekalesia i le taimi o a latou sauniga faamanatu mo le Tausaga Fou 2016. O le manaia o lea fe’au taumolimoli-o le fetaui lelei ma le taimi o faafiafiaga o le Tausaga Fou.

Ia manatua foi- o taimi lava o le fiafia e masani ona o mai faatasi ma taimi o le faanoanoa-aua e mafai ona liua le fiafia i le faanoanoa pe a galo le aano moni o le sauniga faamanatu. O lona uiga la- e tofu i tatou uma ma le galuega e fai –ae o le itu e faasilisili-ia ‘aua lava nei sili atu le fiafia! O le uiga la o le fe’au tau molimoli o lea sauniga-‘alo ane e fai le fiafia e faamanatu ai le Tausaga Fou-ae ia sili ai ona manatua-e tofu i tatou uma ma le valaauina.

O le valaauina la e le faapea e faatino nei ae lafoa’i taeao. Afai o le valaauina mai le Atua-o lona uiga-o le olaga atoa e tatau ona manatua ai o tatou valaauina. Ia manatua foi- o soo se mea lava mai le Atua mo le tagata-e fiafia tele Satani e lu’i ma faaleaga! A sasi loa le tagata-ona ataata lea o Satani ae mataga ai na o oe! Mo lena la tausaga fou-ua tofu i tatou uma ma le valaauina-pe o se valaauina maoa’e poo se valaauina faatauvaa-ae o le valaauina e le Atua- e le o se mea faatauvaa!

O lona uiga la- e le o se mea tatou te ta’a’alo i ai-poo le a lava le itiiti ma le faatauvaa o le valaauina o le tagata-e tofu ma faamanuiaga uma mai le Atua! O le a sou taofi? 

Matauina foi le galulue ma le tautiga o nisi o le aufaigaluega a le Malo i nei aso fiafia. E fa’i o nai Leoleo i o latou faiva ma tiute i le ao ma le po-ae faapea foi tagata faigaluea o loo gafa ma auaunaga lautele e pei o feoa’iga i vaa i le va o Savaii ma Upolu- aemaise ai foi o nai avepasi ma taavale laiti i le fela’uaiga o le atunuu femalagaa’i!

E ui lava la ina faapea o loo maua totogi-ae afai o loo galulue e tautuaina le atunuu lautele- o lona uiga- e le faatauva’a o latou faiva aua o loo gafa ma le tautuaina o le atunuu! O le mea e tatau ai ona momoli atu la matou faamalo ma le faafetai ia te outou uma lava e tusa ai ma la outou tautua i le atunuu.

O le tatalo ia avea lenei Tausaga Fou ma tausaga o manuia mo Samoa i soo se itu-ae ia sili ai ona faafetaia le Atua Silisili Ese o loo faavae ai Samoa!

O le a sou taofi? 

04 January 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>