Pologa i le leai o se suavai
E sui tausaga ae le suia lava faafitauli o loo feagai ma le to’atele.
O le talitonuga lea a le tinā i a Fau Ropati, 65 le matua o le soifua mai le afioaga o Fasitoo Uta.
O lenei tinā e to’aiva o la alo ma le tamā o le aiga ma o le fa’afitauli ua leva ona feagai ma lenei aiga o le leai lea o se suāvai.
“Na ma nonofo mai ma le tamā o le aiga i le tausaga 1968 ma o le ma ulumatua fo’i ua 47 le matua ae o le aofaiga fo’i lena o tausaga o matou nonof iinei,” o le saunoaga lea a le tinā.
“O iinei foi na feola uma ai lava la maua fanau lenei ua fai fanau ma fanau a latou fanau o lenei lava e lei ea le pologa.
“Ua e taga’i mai e leai se matou vai ma o le fa’afitauli tele foi lena.
“E lei avea se matou talosaga i le malo ae na o le matou faipule lea e tu mai nei sa matou o i ai.
“Pau lava le tala sa fai mai ao lei faia le palota e tu mai loa toso mai le vai mai I Faleasiu ina ia mafai ai ona oo mai ai le vai mo matou ia e nonofo I uta nei.
“Ae na o le tu mai lava misi atoa ma faamatalaga na polomisi mai ai i tagata.”
Sa fesiligia le tinā pe faapefea ona maua mai latou vai pe a oo ina mugālā.
“I le taimi o mugālā pe a leai se timu e totogi le loli lea e oso mai i Aleisa e sau e utu matou vai.
“E $100tala le totogi o le loli lena ae a sau foi e le tutumu uma matou talone ma isi mea e faatali ai vai pe a sau e utu vai.
“O lea e i ai le tane o le meaalofa a le koluse mumu I le ma tama ma’i lea na maua ai le tane.
“A oo la ina sau le loli e pau lava le la o le mea e utu na o le tane ae le tumu foi le tane pe a oo ina utu e le loli.
“Ae a leai a se timu pe le lava foi le seleni e totogi i le loli ia ona matou savali lea i tai e utu mai ai vai.
“Ae ua e tagai mai nei i le matou nofoaga fai lava sina mamao ma tai i le aai ae o le manaomia tele o le suavai e fai ai lava.
“A oo ina mugala e sau faatolu le loli e utu le tane ia e $300 tala foi le na e alu i le totgiina o le loli.
“O le taimi nei e leai seisi o le aiga e faigaluega o le ma tama matua e ma’I e le mafai ona savali ia o maua foi ia ua ma matutua o nisi o le fanau o loo gafa ma le fatuaiga.
“A le aunoa lava ma nai fanau o loo I atunuu mamao e alolofa mai ia e le leiloa poo fea a maua se tupe.
“Ae tau musu foi e fai soo I nai fanau o loo aumau I atunuu mamao ona o tupe foi mea umai la atunuu.
“E i ai si matou faatoaga e pei o iina lea e maua mai le tupe e totogi ai le loli pe a oo ina manaomia le vai.
“O le vaitau lenei ua leai se mea o toe faigofie ua faigata mea uma e oo foi i le tau o le soifuaga ua matuai alu i luga ua leai ai se faamama avega.
“Pau lava lea o le mafatiaga lenei ua leva ona feagai ma matou o se suavai e patino lava i a matou.”