Pagatia i le oge vai

Tusia Ulimasao Fata ,

46 Hits

Mataiva Ki.

Mataiva Ki.

I le taumafai ai e atina’e aiga i le faigata ua iai le olaga i Samoa nei, a’o le faigata foi o le olaga i le leai ai o se Suavai taumafa.

O le saunoaga lea a le tinā ia Mataiva Ki 73 le matua o lona soifua mai le afioaga o Fasito’o-Uta. Na taua e Mataiva o lo’o manuia uma mea uma i lona aiga vagana ai le tulaga fa’aletonu o le leai lea o se suavai mo ia ma le aiga.

“O le faigata ia o le olaga ua iai nei ile leai ai o se suavai aemaise o le suavai o se vaega taua lea i le olaga o so’o se tagata.

“O lea e leiI leva ona matou fa’amautu mai iinei i lea nofoaga po’o le tolu ai nei o masina ae le’i fa’amanuiaina lava i se suavai.

“O le sailiga o le suavai o se mea faigata lava lea i lo matou aiga ona o le nofoaga foi sa matou fa’amautu muamua ai e le’i iai foi se suavai.”

E fa’atoa mae’a feau masani o le taeao a  Mataiva Ki ae taunu’u atu loa le vaega o le Fofoga o Samoa i lona laoa.

Na saunoa Mataiva e matagofie mea uma i lo latou nofoaga fou ua iai nei vagana ai le fa’afitauli o le leai lea o se suavai.

“Na matou me’i mai iinei ona o le fia maua pea o se suavai taumafa ona o le vai e gata lona au maiiI aiga e lua o lo’o i luma atu o lo matou fanua.

“Ua mae’a ona matou fa’amamaina la matou fanua aua le matou api ai iinei i lenei vaega ma lelei tulaga aua mea toto, ae o le suavai lava ua fai ma sasa I’a matou.

“O lo’o matou pu’eina mai le suavai mai vai e ki vai mai i aiga o lo’o nofo latalata ane i le matou fale, ia aemaise foi o le fa’atali lea i le vai timu.”

Na ta’aue e ia o lo’o latou nonofo ai nei ma lana fanau e to’afa ma isi ua fai a latou aiga.

“O la’u fanau e to’afa lea e matou te nonofo ai nei o lo’o faigaluega uma i latou aua le tausia ina lea o le matou aiga.

“O le isi vaega ua fai lava o latou aiga ma oatu lava iai, vagana aso malolo o lo’o matou feiloa’i ai nei.

Na saunoa foi Mataiva o le olaga o lo’o lelei pea i le latou aiga vagana ai le suavai maua.

“O lo’o lelei mea uma ma matagofie mea uma iinei, o lo’o lelei foi le tulaga i meaai ona o mea toto.

“Ma ou te talitonu lava o le suavai maua le fa’afitauli faigata lea o lo’o feagai pea ma i matou nei.

Na ia talosaga mai foi i le Fofoga o Samoa aua se Kalone Fa’atali Vai mo ia ma le aiga.

“Ua le ma lava le mativa ae talosaga atu ma le agaga vaivai mo se fesoasoani i le itu tau kalone e fa’atali ai vai ma a’u ma le fanau nei.”

© Samoa Observer 2016

Developed by Samoa Observer in Apia