O le alofa i lona tinā ua naunau ai e su’e se galuega

Tusia Deidre Fanene ,

22 Hits

Paulo Matagi.

Paulo Matagi.

E i ai itu lelei o le to’atele o le aiga ae e i ai fo’i ona itu e le lelei.

O Paulo Matagi, e mai le afioaga o Siuniu Falealili, e to’asefulufa i latou o fanau ao latou matua.

E malamalama lelei foi Matagi i le faigata o le tausiga o se aiga ae to’atele.

E pei o le mafuaaga lea ua naunau ai le loto o lea taule’ale’a e sa’ilia se galuega ina ia fesoasoani ai i si ona tina ma tausi ai lona aiga.

O lenei taule’ale’a e fa’atoa 20 ona tausaga ae ua malamalama lelei lava i le faigata o le olaga.

“Mai le to’atele o matou e na o le to’afa lava e faigaluega,” o le talanoa mai lea a Matagi i le Fofga o Samoa.

“Ua ou fia faigaluega lava. 

“E pei ona ou faiatu muamua e toatele le matou aiga o lona uiga o tupe lava mea uma.

“Ou te laofa tele i lo’u tinā e pei o le ala lena ua ou naunau ai e su’e se galuega ina ia ou tausi ai i a te ia

“E i ai foi fanau laiti a nisi o o’u uso ma o’u tuafāfine ma ou te manao e avea a’u ma fa’ata’ita’iga lelei mo nai o’u tei laiti.

Ua malamalama lelei Paulo i le tulaga o loo i ai le soufuaga i le vaitau lenei.

“O le tala moni lava, ua matua’i faigata lava nei aso aemaise lava ona o le tele o mea mana’omia i le itu tau a’oa’oga mo le fanau iti.

“O le tele ia o mea e fai e pei o le tapenaina o ofuaoga, o meaaoga ae sili ai lava pili aoga ma meaai a le fanau.”

Sa ta’ua e lea taule’ale’a le faigata isi o latou tinā ona tauave to’atasi le avega talu ona maliu si latou tamā.

“O le telē ia o le avega a le matou tināo lo’o tauave  i totonu o le matou aiga fa’apea ai ma le va’aaiga lelei o le fanua mo matou uma.

“Afai ae maua sa’u galuega ou te iloa o le a tau māmā ai le avega a si o’u tina ma o lo’o tauaveina ma o le a ou fesoasoani ai fo’i i a te ia i mea fai a le aiga.”

Sa ia ta’ua fo’i le taugatā tele o le tau o le soifuaga o lo’o ua i ai nei.

“E le’o toe i ai ni mea o toe taugofie i le vaitau lene ma o lo’o ta’amilomilo fo’i le lalolagi i le mea o lo’o solo ai le tupe.

“E fai o le tausiga o le aiga, ae i ai foi matafaioi e pei o meafai a le nuu faapea ma le ekalesia ae o lona pona e le’o lava le seleni e fa’atinoina ai nei mea uma.”

Sa ta’ua foi e Paulo i le Fofoga o Samoa o le tele o taimi e fesoaosani ai i le galueina lea o le fanua.

Sa fa’aalia fo’i e le tinā i a Tumua o se lagona fiafia pe afai ae maua se galuega si ana tama.

O lona talitonuga fo’i afai o i fo’i o le a malamalama atili ai Paulo i le mea e tatau ona fai.

Afai o e fia fesoasoani i a Paulo Matagi fa’amolemole fa’afeso’otai le numera o lana telefoni, 7754046.

© Samoa Observer 2016

Developed by Samoa Observer in Apia