Falepuipui se tinā i Ausetalia i le gaoi

Tusia Deidre Tautua – Fanene ,

281 Hits

E 31 tausaga o se tinā Samoa mai Ausetalia ua falepuipui nei mo le lima ma le afa tausaga i lona gaoia lea o se tinoitupe e AUS$341,000 (SAT$647,000) mai kamupani e lua sa faigaluega ai i le tausaga ua mavae.

O nei kamupani ua ta’ua o le Electrolux ma le Toll Holdings.

O Christine Tupu na ia ioeina le tu’uaiga sa fa’asaga ia te ia i le tausaga ua mavae.

O lenei tinoitupe sa fa’aaogaina e lea tama’ita’i e totogi ai pasese o ana uo ma lona aiga e auai uma mai ai i lana fa’aipoipoga sa faia mai i Samoa nei ia Novema, 2016.

  I le fa’amatalaga o lea matāupu e fa’apea ua leva ona fai e lea tama’ita’i nei gaioiga.

 Sa ia ta’ua fo’i o lana gaioiga na fai o lona fai lea i tagata ua sui le numera o le faletupe e fai ai latou peimeni, ae ua ia tuuina i tagata le numera o le la’ua faletupe.

O le fa’aiuga o le mataupu a lenei tama’ita’I sa lauina i le Aso Faraile.

O lo’o fa’aipoipo atu i le ali’i o Hekeai Piutau mai Tonga.

O lenei tama’ita’i e i ai ona pi’itaga i Saipipi ma Si’uniu Falealili.

I ripoti mai le 9 News e fa’apea o le taimi nei ua uma ona fa’aaogaina e lea tama’ita’i lenei tinoitupe i le vaitaimi o le la fa’aipoipoga sa faia mai iinei i a Novema i le tausaga 2016.

Sa fa’apea fo’i ona faia e lea tama’ita’i ni risiti sesē ina ia mafai ai ona ia aveina se microwave, vacuum pusa aisa ma ea malulu lea sa kilivaina i le fale o mātua o lona to’alua e aunoa ma se tupe na fa’aaluina ai.

Sa ta’ua fo’i e le loia a Tupu o lenei tama’ita’i e i ai lona fa’afitauli i le itu tau ta’aloga faitupe (gambling addiction).

I totonu o le potu fa’amasino i le Aso Faraile sa tumutumu uma ai le aiga o lea tama’ita’i e lagolagosua ai.

O lona to’alua o Hekeai Piutau sa fa’amaonia mai e le’i i ai sona malamalamaaga i gaioiga uma a lenei tama’ita’i sa fai.

E agava’a lea tama’ita’i i le palola i a Mati i le tausaga fou.

© Samoa Observer 2016

Developed by Samoa Observer in Apia