73, tausaga a’o loo’o galue pea i le fa’atoaga

Tusia Deidre Tautua-Fanene ,

50 Hits

O le talitonuga o le tamā iā Faoasau Moke, 73 le matua o le soifua mai le afioaga o Vailele e le sau le mea’ai e su’e le tagata e ao ina galue malosi.

O lea tamā o lo’o nonofo fa’atasi ma lana fanau.

E le mafai ona nofo nofo a se tagata sau aumai se mea’ai i lou lima,” o lana saunoaga lea i le Fofoga o Samoa.

“O le vaitau lenei o le lau’ele’ele lava ua tua i ai le to’atele.

“Mai o tatou lau’ele’ele e mafai lea ona fa’atau atu fua o fa’aeleelega ina ia maua ai tupe ma o i foi tatou te iloa ai o lo’o sue lava e le tagata le auala e maua ai seleni e tausi ai le aiga.

“Ae le na’o le au fai fa’atoaga.

“E o’o lava i le au faifaiva, e asā le sami i aso uma auā le tausiga o aiga.”

Sa ia fa’ailoa mai fo’i o lona aiga o lo’o fa’alagolago tele i le fa’atoaga mo sina seleni.

“O maua ma le tinā o le aiga o le ma galuega matua lea e fai i aso uma o le usu mai lea i le fa’atoaga e fai atu meamata e fa’atau ina ia maua se tupe.

“E leai sesi o le aiga e faigaluega, ona e le laiti uma le fanau, a’o le ma tama matua o lo’o aoga i le Iunivesite.

“O le matou alagātupe o le fa’atau atu lea o talo.

“O lea ua ma toe omai i uta o le fa’atoaga ona ua taulia uma meamata sa fa’atauina i le aso ananafi o lea la ua ma toe omai e toe fai atu nisi ato talo e toe fa’atau atu.”

Sa ia fa’aalia fo’i o lea ua toe amatalia a’oa’oga a le fanau ma o le la’ua matafaioi o le fanau.

“O le ala lea e mate usu mai ai i aso uma i uta i le ma’umaga ina ia maua ai sina seleni e totogi ai pili o tamaiti i le aoga aemaise lava se tasi o le fanau o lo’o ua i luga i le Iunivesite.

“A le galue le tagata o le a mafatia foi.

“O lenei vaitau ua taugata ma faigata mea uma.

“Pau lava le mea’ai taugofie lea e i ai o le moa, ae a ‘ai sau mamoe o lona uiga o oe o le milionea.

“O lo’u talitonuga e leai se tatou mea e toe mafai ona fai i le tau o le soifuaga.

“Pau le itu e mafai ona tatou faia o le galue lea ina ia manuia aiga aemaise le fanau.”

Sa fa’ailoa mai fo’i e le tamā o le auala i lona malosi o lona galue malosi lea.

“Ou te le’o faiatu o sesi itu, ae o le ala lena ou te malosi ai ona o lo’u galue ma fa’agaioi lo’u tino.

“E iai nisi o la’u augatupulaga ua le mafai ona toe faia ni galuega fa’apenei ae ou te fa’afetai i le Atua ona o le malosi ua ia foaiina.

“O lesi lea itu lelei o la’u galuega e te fa’alagolago lava oe i ou lima aua le manuia o lou aiga.”

© Samoa Observer 2016

Developed by Samoa Observer in Apia