Pai Mulitalo Ale

Faaliliu e Seagaitumua Tupuola

Ua tauaao e le Tautua Samoa Party le anoano o viiga mai le Samoa First Union mo lana folafolaga na te siitia le totogi aso aupito itiiti mai le $2.30 i le $3 pe afai e manumalo taeao i le Faiga-Palota Lautele.

O lea folafolaga o se tasi lea o folafolaga autu tau faatosina a le Itu Agai o loo i totonu o lana manifeso lea na faalauiloa i le masina talu ai. Ae peitai-o lea fuafuaga na muamua lava ona faalauiloa e le Samoa First Union Coordinator, o Jerome Mika i le amataga o le tausaga.

“O le Siitia o le totogi aso aupito itiiti e faasino lea i le faimea tonu ma sootaga e tutusa lelei,” o le finauga lea a Mr. Mika.

“Ua matou fiafia e auai i le faateleina pea o leo o le aufaipese ia o loo talosaga atu i le Malo ina ia siitia le totogi aso aupito itiiti.” E tusa ai ma Mr. Mika, e ui lava ina siitia tupe mama faasiili poo polofiti mo le tele o kamupani, ae le o faapea totogi aso.

 “O se vaega o kamupani maumea o loo faamautu i fafo o loo inu i le kulimi ae o le vaai a tagata Samoa i le fita o a latou galuega, finau ma le onosa’i- e le o tauia e tusa ai ma le faiga e tatau ai,” o lana faaaliga lea, ma na toe taua ai e faapea o le totogi aso aupito itiiti  e tatau ona atagia ai se tupe talafeagai e tatau ona maua mo galuega faatino.

“O loo ia Samoa le anoano o galuega lelei e ao ona faatino, auala ina ia toe faaleleia, le aoaoina o tamaiti, talimalo i turisi,” o lana faaaliga lea.

 “Ae a o’o loa ina le lava totogi o tagata e tausi ai o latou aiga ma nuu, poo le faatonu e galulue mo ni mea se tele pe itiiti, ona le lelei loa o le faagaoioiga o le nofoaga o galuega ma le atunuu.  E le mafai ona galo ia i matou le faiga faavae tau sootaga tutusa. 

E le mafai ona matou faatagaina se tasi ina ia totogi i se totogi e itiiti ifo i lo le totogi latou te manaomia ina ia mafai ai ona soifua i se soifuaga lelei ma tausi o latou aiga. O le galuega fita a tagata e tatau ona aloa’ia ma tauia.”

O ananafi na fai mai ai Sio Suluape Kasipale o le Iuni-o le tala ua maua mai sui o tagata lautele e matua taua tele.

Ma e pei foi o Mr. Mika, e talitonu o ia e tatau ona maua e tagata Samoa se mea e sili atu ona lelei.

“Ou te le talitonu o loo gaoi e nisi o tatou tagata o tatou lava tagata,” o le faaaliga lea a Sio.

Talu mai ona latou amata tilotili i lea mataupu, fai mai Sio ua latou maua e faapea o nisi o tagata faigaluega o loo totogi i se totogi itiiti e pei o le $1.50 i le itula. O le toatele lava o loo totogi i le $2 i le itula.

“O se mea e matua uiga ese lenei mea,” o lana faaaliga lea. E talitonu Sio o le siitia o le totogi aso aupito i maulalo o se tulaga lea e mafai ona manumalo ai i totonu o Samoa. 

Afai latou te siitia le totogi aso aupito i maulalo, o le a tele tupe e maua e tagata e faaaoga,” o lana faaaliga lea. O se tulaga lea tatou te manumalo uma ai .

E lagolagoina foi e Mark Muller, o le isi alii ofisa lea o le Samoa First Union. 

“Ua o’o i le taimi e fai ai se suiga,” o lana faaaliga lea.

“O le siitia o le totogi aso aupito itiiti e faasino lea i le tuleia o mea uma lava i se tasi maualuga.”

E talitonu le Samoa First Union e toatele tagata faigaluega e le o malamalama ia latou aia tatau faa-tagata faigaluega. Mo se faata’ita’iga, o nisi o tagata faigaluega latou te le o mautinoa e faapea o le totogi aso aupito itiiti i lalo le tulafono o leipa e $2.30.

Ae mo le una’iga ina ia siitia totogi aso i le $3, fai mai Mr. Muller- e faasino lea i le fai o le mea tonu ma le faia ia mautinoa e le o gaoia tagata Samoa e le fetuleni mai o kamupani mai fafo o loo fai o latou faleoloa i Samoa nei. 

“Ua faaalia le matua faafetai tele a le Samoa First Union i le Tautua Samoa Party-ina ua aofia le siitaga o le totogi aso aupito i maulalo i le $3 e avea na amataga mo tatou tagata i Samoa nei.”