Fa’amanatu le fa’ai’uga manuia o Taga-polo Fa’ava-o-malo a Samoa

By Sarafina Sanerivi 04 July 2016, 12:00AM

O le Aso To’ona’i talu ai na fa’ai’uina ai le ta’amilosaga o taga-polo – SIFA Samoa Open, i se tufatufaga-fa’ailoga na faia lava i le Kalapu Ta-polo, le Royal Samoa Country Club i Fagali’i.

O le ta’amiloga aupito tele lea i Samoa nei ma o se fa’amoemoe fo’i fa’ava-o-malo na maua ai le avanoa o ali’i ma tama’ita’i ta-polo i Samoa nei e tauva ma ai ma tama-sasa’o, o  porofesa o le ta’aloga mai atunu’u i fafo. 

O le Minisita o Feso’ota’iga ma Fa’amatalaga Tau Tekonolosi, le Afioga a ‘Afamasaga Rico Tupa’i na saunoa e avea ma sui o le Ta’ita’ifono o le Kalapu Ta-polo a Samoa, le Afioaga a le Palemia, Susuga Tuila’epa Sa’ilele Malielegaoi, e momoli le fa’malo i e na manumalo i le ta’amilosaga o lenei tausaga. 

Sa ia fa’amalo fo’i i le Pulega o Tupe Fa’ava-o-malo a Samoa (SIFA) mo le lagolaoina o lea fa’amoemoe. 

Ae mo le ‘au-ta’a’alo, na ta’ua e ‘Afamasaga: “Fa’afetai tele atu mo la tou filifiliga e ‘auai i la matou fa’amoemoe i lenei tausaga ma asiasi mai ai i si o matou atunu’u. Talosia ia maua so tou taimi e asia ai nisi o vaega matagofie o lo matou nei si’osi’omaga ma saga fa’afiafiaina ai pea.” 

Na matua fiafiaina le susuga a Peter Wilson, le na manumalo aoao i le Ta’amilosaga.

 “O se fiafiaga tele mo a’u nei,” o lana fa’aaliga lea. “O se ta’amilosaga manaia tele ma finau ma ‘ou te naunau lava e malaga mai i Samoa e ‘auai.

“Ua fa’afitu pe fa’avalu ona ‘ou ‘auai ma tauva i le ta’amilosaga lenei ma o se taumilosaga manaia tele.

“’Ou te matua fiafia lava lava i le aganu’u fa’aSamoa ae maise ou laufanua matagofie, o matafaga ma le tele o va’aiga manaia…O a’u o se tagata fa’ase’e-i-galu ma ‘ou te fiafia lava i taimi uma e malaga mai ai i Samoa, ma e masani lava ona ‘ou nofo i fale-Samoa i matafaga matagofie o Samoa.” 

Na amata ta’alo ta-polo lava le ali’i o Wilson ina ua fitu ona tausaga ma avea ai o se porofesa o le ta’aloga i le 15 tausaga talu ai. 

Na ta’ua, o lona tama na fa’amasania o ia i le ta’aloga ma le toe tu’ua ai lava e o’o mai i le taimi nei. 

“O se lu’itau ia a’u le ta-polo,” o lana fa’aaliga lea. 

 “O ta’aloga o le ta-polo, e una’ia ai ‘Oe ina ia lava lou onosa’i, ‘aua le fiu-gofie pe a le-maua le mea o mana’o iai, e lu’itauina ai fo’i ‘Oe ina finau pea ma taumafai e fa’aleleia atili i aso ta’itasi.” 

Na matua fa’atumulia le Kalapu Ta-polo i Fagali’i i le aso fa’ai’u, e le gata o tama’ita’i ma ali’i ta-polo a Samoa lava, ae fa’apea fo’i le anoaoa’i o porofesa o le ta’aloga mai atunu’u i fafo sa ‘auai i le ta’amilosaga o lenei tausaga.

By Sarafina Sanerivi 04 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>