Tautuanā fanau teine
O le malu puipuia ai o fanau teine o se itu taua tele lea.
O lea le finagalo o Aiga Ese’ese i le Fofoga o Samoa i le aso ananafi.
Na ia fa’ailoa o le nofoia ai o Nu’u Fou mo le valu tausaga, e moni o lo’o sologa lelei mea uma ae o le fa’aete’etega lava o fanau teine laiti ma le ono lamatia ai o lo latou ola.
“Ia o a’u e to’alima la’u fanau ma o se itu faigata tele ua i ai le taimi lenei i a te a’u lava ia, o se itu e ao lava ona silasila lelei i ai, aua le aga’i atu ai le lumana’i.
Na ia fa’aalia o le tele o fa’asalalauga i luga o televise ma nusipepa i fanau teine ua ‘a’afia lo latou ola ona o nei faiga mataga.
“Ua avea lea ma popolega i a te a’u lava ia, o se itu le lelei tele pe a o tatou mafaufau i ai le taimi lenei.
“O la’u fo’i lea tala i lo’u to’alua , ia aua aua lava nei tu’ulafoa’ia mai la’u fanau i luga o le auala aemaise lava pe a ou alu ou te faigaluega ona o tulaga lava nei.
“Ua matua’i leaga lava o lenei vaitau i lo’u iloa i ai, ma o se itu e ao ona silasila lelei i ai aua le aga’i atu ai le lumana’i.
“O le itu lava ia o le va’ava’ai lelei ai o fanau teine, e ao lava ona fa’amuamua i matua, o le mea lea e i ai ua i ai lava le popolega i le taimi lenei.
“Afai e popole, ia tatou va’ava’ai lelei i itu e mafai ai ona fa’atino o so’o se tulaga e malu puipuia ai lo tatou ola aemaise lava nai fanau teine.
Na ia ta’ua o se tulaga lava ia ua i ai le taimi lenei o le taumafai ia va’ava’ai lelei i auala mo lelei alu i luma o le atunu’u.
“Ia e pei o vaega nei e ao lava ona tulimata’ia o le saogalemu o fanau, aemaise o fanau teine ma e ao ona ave i ai le fa’amuamua.