E mativa Samoa

By Deidre Tautua-Fanene 05 January 2018, 12:00AM

O le talitonuga a le mālō e leai se mativa i Samoa.

Ae peita’i o le tamā i a John Alofa Sauvao mai le afioaga o Faleasiu-Uta ua ia ta’utino mai lava o loo i ai le mativa i Samoa.

I le  faatalatalanoaga ma le Fofoga o Samoa i le aso ananafi sa  fa’ailoa mai ai e Sauvao le faigatā o le olaga o loo ia ola ai ma si ana fanau ma lona aiga.

O lenei fo’i tamā o loo faigaluega o se leoleo po i se tasi o faleoloa i le nuu ma o lona totogi e maua i le lua vaiaso e $150.

O se tulaga pitosili ona faigata i a Sauvao o le nonofo lea e aunoa ma se suavai ma se eletise.

“O se itu pito i sili lea ona faigata o le leai o se vai ma se eletise ma ua uma fo’i ona matou talosagaina le matou faipule ae peita’i e oo mai lava i le taimi lenei e leai lava se mea ua tino mai.

“E seāseā fo’i oo mai i uta nei.

“Out e fa’alogo soo pea lava i le malo faimai e leai se mativa i Samoa ae o lea ou te tautino atu o loo i ai le mativa i Samoa.

“Ou te iloa ailoga ua oo mai nisi e asiasi mai i nuu ma afioaga i tua nei ma silasila toto’a i le tulaga o loo i ai le soifuaga i lenei vaitau.

“Ua matitiva ma pologa tagata ona o le taugatā o le tau o le soifuaga ma ua le gafatia ai lava e nai o tatou tagata ona tausi aiga ma fanau.

“E faigofie lava ona latou faimai e leai se mativa auā foi o loo nonofo i fale mananaia ma feoai i taavale taugata ma ea malulu.

“E le’o i ai se latou taimi e omai ai e asiasi mai I tagata o latou itumalo ina ia latou iloa le pagātia o le olaga o loo matou ola ai.

“E tau faasoasoa le seleni i lea aso ma lea aso ma taumafai ina ia aua nei ola falolo fanau.”

O le itu faamomoi loto o le tulaga o loo i ai le nofoaga o le tamā ma si ona aiga.

“Ua e silasila mai o loo matou nonofo pea lava i le faleoo, ma ou te iloa ailoga o toatele ni aiga o loo nonofo pea i faleoo.

“O apa foi o loo ato ai le fale e maua mai lava ii ma o ae e tutulu foi a oo ina timuga matou te faaofiofi uma lava ma lo’u tamā ma lou toalua ma le mafanau I le tulimanu ona e tutulu uma lesi itu o le fale.

“E leai foi se tapoleni e punipunia le fale pe a oo ina timu.

“E oo foi i le fale lē ta’ua o fale lava i aso ua, o fale eli o le tulaga lea o loo i ai le matou nofoaga.

“E momomo lo’u loto ae pagā lea e leai se mea e mafai ona fai e le a’ua’u le faasoa ina ia fai ai se tulaga lelei mo le aiga.

“O le itu pito i sili lea ona faigata ae talosia ia i le malo ina ia avea ia le augani atu ina ia maua mai ai se fesoasoani mo matou aiga tau atia’e.”

 Afai e te fia fesoasoani i le aiga o Sauvao faafesootai le numera o le telefoni 7225310/7520057.

By Deidre Tautua-Fanene 05 January 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>