“Aitalafu ia Saina o lo’o i miliona ae le piliona,” Sili Epa

Tusia Deidre Tautua – Fanene ,

37 Hits

Minisita o Tupe, Sili EpaTuioti

Minisita o Tupe, Sili EpaTuioti

Ua fa’amautinoaina mai nei e le Minisita o Tupe, Sili Epa Tuioti i le mamalu o le atunu’u o le tauaofa’i o le aitalafu a Samoa ia Saina o lo’o i miliona ae le piliona.

Ae ui i lea e le’i mafai ona fa’aalia manino  mai e le Minisita pe fia le tauaofa’iga o le aitalafu.

 Sa ia fa’amausalīina mai fo’i e leai se tulaga e fa’apopoleina ai le atunu’u i lea tulaga ona o lea lava e mafai e le mālō ona totogi.

  Sa lagolagoina fo’i e le Minisita le mana’omiaga o le mālō e nōnō mai tupe auā le fa’atupeina o atina’e tetele e pei o le fa’aleleiga o auala tetele.

 “A aunoa ma tupe fa’ameaalofa ma nonōgatupe, e le mafai ona tatou taunu’u mai i se tulaga lelei ma le mausalī,” o le saunoaga lea a Minisita.”

Ina ua fesiligia e le Samoa Observer e tusa ai ma le popolega i le tele o nonōgatupe ia Saina na tali le Minisita, “O lea ou te faiatu o lo’o i miliona tatou nonōgatupe e le’o piliona.”

Ina ua fesiligia fo’i le minisita e tusa ai ma le saunoaga a le alii Palemia e uiga i le tulaga tautupe sa ia saunoa o mea uma lava tau tupe e tatau ona uia i le Minisita.

 “O a’u o le Palemia, ou te le o toe Minisita o Tupe ou te iloa ai ni fuainumrea,” o lana saunoaga lea e tusa ai ma le fa’atalatalanoaga e uiga i aitalafu a Samoa.

Ae sa fa’aalia e Sili, “E le’o ia te a’u se fuainumera maumaututū ia te a’u i le taimi nei, ae pau la’u tali e mafai ona avatu e pei ona ou faiatu muamua e leai se mea e fa’apopoleina ai i tulaga o aitalafu o lea lava o lo’o sologa lelei peimeni.

 “O peimeni ia e aofia ai peimeni o nonōgatupe uma a Samoa e aofia ai le Faletupe o le Lalolagi, A.D.B. fa’apea ai ma Saina.”

Sa ia fa’aailoa mai se’i silasila i le paketi ona e fa’amautinoaina ai le a’ofaiga sa’o o nonōgatupe.

 “E leai sa’u kopi o le paketi o i ai ia te a’u i le taimi nei, ae tago e imeli mai ona out ago lea e avatu le tauaofa’i o aitalafu a Samoa ia Saina,” o lana saunoaga lea.

Sa tu’uina ai le imeli ae peita’i e le’i tali mai lava le Minisita e o’o mai lava i le taimi nei.

Ae sa lagolagoina e Sili le finagalo fa’aalia o le alii Palemia o lo’o mafai lava ona totogi e le malō nonōgatupe i tausaga uma.

 “E ui i le maitau atu i le tetelē o nonōgatupe ae a tatou silasila toto’a i ai o lo’o mafai lava ona totogi, o peimeni o nonōgatupe o vaega ia e muamua lava tu’uese i tausaga uma.

“Ae ui lava i le tulaga lea o lo’o gafatia lava ona totogi e tatau ona silafia o lo’o mana’omia lava ona fai nonōgatupe.

“Auā a leai o lona uiga se’iloga e tu’u i luga tatou lafoga i le 100 pasene ona fa’atoa mafai lea ona tatou le toe aitalafu.

“O nonōgatupe la mai i le malo a Saina ma le A.D.B. o lo’o mana’omia tele mo galuega tetele, e aofia ai galuega i luga o auala, eletise ma fa’atupeina ai isi polōketi.

 “E pei o le fale lenei (Fale i Tuanaimato) sa fa’atupeina e le malo o Saina.

 “O le mea lea e le’o fa’apopoleina ai a’u i le tulaga lea ona o lea ou te iloa o lo’o mafai lava ona totogiina, o lesi itu ia fa’aaogaina nonōgatupe mo atina’e.”

Sa ia toe fa’amanatu mai i le atunu’u a leai nonōgatupe ma tupe fa’ameaalofa, e le o’o mai Samoa i se tulaga ua i ai nei ma o le a le mafai ona fa’atupeina polōketi tetele e pei o le malae vaalele i Faleolo.

“O lena polōketi o lo’o fa’atupeina i se nonōgatupe sa mafai ona auala mai i le malō.

 “O isi polōketi e aofia ai le eletise, fausiaina o faleaoga fa’apea ai ma le soifua maloloina o nonōgatupe o lo’o fai ai nei.

“O le tele o vaega o lo’o mafai ona fa’atupeina polōketi mai nonōgatupe e fa’atino ai atina’e.

“Ae a nonō mai fo’i e le fa’apea o polōketi uma lava se’iloga lava o polōketi ua silasila atu le malo e tatau ai ona saili se nonōgatupe ona fa’atoa fai lea.”

Sa fa’aalia mai fo’i o nisi nonōgatupe mai Saina ua fa’aliliuina i tupe fa’ameaalofa. 

E le’i fa’amautuina mai e le minisita po’o a tupe nei.

 “O le tele o nonōgatupe mai le Faletupe o le Lalolagi ma le A.D.B. o lo’o tului uma lava peimeni ma isi tupe ua mafai ona maua mai i tupe fa’ameaalofa.”

Sa ia fa’aailoa mai le lē talafeagai pe a fa’apea e fai nonōgatupe ae le totogiina.

 “O le a’afiaga o le lē totogiina o tatou peimeni e aofia ai le ta’uleagaina ai o le igoa o le atunuu i isi atunuu, ma o le a le toe i ai nisi e toe fia nonō mai ni tupe pe toe fia fesoaosani mai ia tatou.

 “O le faletupe o le lalolagi ma le A.D.B. fa’apea ai ma le malo o Saina o lo’o fiafia lava e fesoasoani mai i le malo o Samoa e ala lea i le fa’atagaina mai o Samoa e fai mai nonōgatupe ia i latou auā atina’e mo Samoa.

 I le masina na se’i mavae atu nei sa te’ena malosi ai e Tuilaepa tu’uaiga e fa’apea o le aofaiga o le aitalafu a Samoa i Saina e faitau piliona.

“E sese, matua’i sese lava,” o lana saunoaga lea i le Samoa Observer.

Sa ia fa’ailoa fo’i o fa’aupuga o lo’o fa’asalalauina i luga o upega tafa’ilagi e le sa’o lea.

“O le matua’i sese lava,” o lana saunoaga lea.

“E leai se mea o le a alo ai i le ataata o le la’au e tusa ai ma le aofa’i o aitalafu a Samoa ia Saina.

  “O le aofaiga o lo’o aofia i totonu o le lipoti fa’aletausaga ma i totonu o lea lipoti o lo’o aofia ai ma le aofaiga o le tupe e toe totogi.

“O lesi itu e leai se mea e fa’apopoleina ai fua i le aofaiga o le aitalafu ona e lē tāua.

“O le tulaga e taua o le totogi fa’aletausaga o le itu pitosili lea ona taua ma e ao i le atunuu ona iloa.”

© Samoa Observer 2016

Developed by Samoa Observer in Apia