O le fa’ai’uga a le Kapeneta, e leai sa’u tala e fai iai

By Pai Mulitalo Ale 05 May 2016, 12:00AM

E le’i finagalo le Pule o le Kolisi o Avele, o Lesaisaea Reupena Matafeo, e fa’aali sona finagalo e uiga i le fa’ai’uga a le Kapeneta, lea ua tapunia ai le kolisi, ona o vevesi lata mai nei, i le va o tamaiti-a’oga.

“O le fa’ai’uga na fai e le Kapeneta ma e leai ma se tagata-faigaluega a le malo e toe fa’aali iai sona manatu,” o le fa’aaliga lea a Lesaisaea. 

Na fa’aopoopo mai fo’i, o le Afioga a le Ali’i Minisita, o Loau Keneti Siuo, o lo’o fai ma sui o le Matagaluega o A’oga i totonu o le Fono a le Kapeneta,  ma e na o ia lava e mafai ona saunoa iai. 

 “O le matou minisita le tagata tonu lava e saunoa i le mea lea,” o lana fa’aaliga lea. 

E le’i avanoa le Afioga a le Minisita ananafi, mo sona finagalo i le mata’upu.

Sa fa’afeso’ota’i e le Samoa Observer le Pule o Avele mo sona finagalo, ina ua fa’alauiloa mai le fa’ai’uga a le Kapeneta, e tapunia ai le a’oga ma fa’amalolo ai fo’i faia’ogfa – e aofia ai ma le Ali’i Pule o Lesaisaea.

“O le asō (Aso Lua lea) na fa’amaonia ai e le Kapeneta lana fa’ai’uga, ia tapunia le Kolisi o Avele, a’o fa’atali le taunu’uga o su’esu’ega o lo’o faia, ona o le fa’aauauina pea o faiga fa’avevesi ma misa a tamaiti-a’oga,” o le fa’aaliga lea mai le Kapeneta.  

 “O faiga tau-fa’amata’u talu ai nei a tamaiti-a’oga mai le Kolisi o Avele aga’i i isi a’oga, o tamaiti-a’oga ma faia’oga, ua mafua ai le popole o le to’atele ma va’aia ai fo’i le vasega o leoleo i la’ei-fa’a’aupegaina i le amataga o lenei vaiaso. 

“Ua fa’atonuina nei le Matagaluega o Leoleo, ina ia fa’agasolo fa’anatinati a latou su’esu’ega; e sa’ili tonu i latou o lo’o faia lea gaioiga o le una’ia ma ‘auai i faiga fa’atupu-vevesi tau-fa’amata’u, ua mafua ai misa ma fa’atupu le ita i isi a’oga ma le lautele o le atunu’u. 

“Ua tonu nei fo’i i le Kapeneta, e amata atu i le tausaga fou, 2017, ona le toe fa’amatu’uina atu fesoasoani a le malo mo A’oga a Ekalesia, i a latou Komiti A’oga, a o le a tu’uina atu sa’o lava, i a’oga ta’itasi.  

 “O lea faiga, o le a mautinoa ai, le le-toe tu’uina atu o ni fesoasoani tau-seleni mo a’oga uma o iai tamaiti ua fai ma a latou masani, le fa’aauau pea ona le-amana’ia o le pulega galuega ma le malosi’aga fa’aLeoleo.

“Ua fa’atonuina fo’i e le Kapeneta le Ofisa o le Loia Sili, ina ia tapena se tulafono e fesoasoani e taofia ai ma puipuia ituaiga amioga-manu fa’apea e tutupu ai misa ma ‘ese’esega i le va o tamaiti-a’oga, ma fa’atupu ai manu’aga ma se si’osi’omaga e tumu iu le popole ma le fefe mo tamaiti-a’oga, o faia’oga, matua ma le lautele o le atunu’u. 

 “O lea tulafono, ia atagia ai tu ma aga fa’aSamoa e fa’avae i le soifua fa’aKerisiani, o tu ma aganu’u masani ma ni fofo fa’anei-ona-po o lo’o fa’aaoga e isi fo’i malo fa’atemokalasi, pei fo’i o Samoa i totonu o Aiga o Malo o le Taupulega ma Malo ‘Aufa’atasi.”

By Pai Mulitalo Ale 05 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>