Faigata lava soifuga ua iai nei
O So’oletai Taivale e 56 tausaga le matua le soifua o Eva ma Lauli’i.
Na maua le fa’atalatalanoaga ma le Fofoga o Samoa a’o fa’atali auala e malaga ai le tualaga.
I totonu o si ona aiga e leai se suavai ma e le’o na’o le pau lea le tulaga.
Sa ia taua foi e le lava foi le fa’asoa mo vaega o lo’o manana’o ai ma o lo’o mafatia lava i le le lava o le fa’asoa ae maise ai le tausiga o le fanau.
O So’oletai o lo’o faigaluega i le pisinisi a Toleafoa ma nofo e va’ai le lafu manu.
“O maua e to’alua si a ma fanau, ia o lo’o mama’i foi le taimi nei,” o lana le tala.
“Ia o le ala foi lena o lo’o sauna atu le taulaga e su’e se seleni aua fuala’au a tamaiti."
“Ia ma te faigaluega ma nonofo i nei e va’ai le fanau, ia a e maua mai le tupe i le lua vaiaso ia ma alu lava i ma aitalafu."
“O le faigata ia o ni feau o le aiga pe a leai se suavai e le gata i meaai e fa'aaoga ai le suavai ao le tausiga o le ola i aso uma e pei o le vai inu ae le gata i lea o so’o se itu e mo'omia ai le vai,” o lana tala mai lea.
“Ua leva ona tupu mai lea fa'afitauli ma o lo’o la’u mai lava le suavai pe a leai se suavai."
“E faigata tele i lo matou aiga aua ou te nofo e vaai fanau a a’u fanau ae e faigaluega uma la’u fanau o lo’o latou taumafai foi ina ia vave maua se suavai mo le aiga nei."
“O le suavai a lo’u tuagane o lo’o matou nonofo fa'afesagai lea o lo’o maua mai ai le matou suavai ma o lo’o fa'aaogaina i mea fai a lo matou aiga."
Na tauia e le tamā e mafia ona maua mea uma ae a leai loa se suavai e faigata lava ona faia se feau se tasi i totonu o le aiga.
“A tu'u foi i le tau o mea e fai ai le galuega e le’o ni mea taugofie e fia selau e alu ai e le’o se mea taugofie foi ae o lo’o taumafai lava i le mea e gata mai ai le taumafai latou ia."
“E moni lava e alu ai le tele o tupe ae o le mea aoga toe taua aua a leai se suavai e leai se ola i totonu o se aiga."