O le vai lava ia i lona fa’atulaganana i le tagata o le ola ma le malosiaga. 

A leai se vai ua leai foi se ola. 

O lea le manatu o Solomona Amosa o Fasito’o Uta.

“Ou te fa’afetai lava a’u ia ona o le ola alofa ma le agalelei o le Atua e aulia ai le isi aso,” o lana lea tala. 

“O le uiga o la’u tala, o nei e leai se suavai maoti, e le’o o’o mai le paipa i uta nei i aiga. O le mafatiaga sili lea i aiga i uta ona o le leai se suavai mautu. 

“Na ave foi talosaga, na fa’afia lava talosaga ia ae le’o maua mai lava se tali mautu. Fa’atali tali lava le Malo i se tali mai. 

“Ua laki lava o tane na fa’atau o lo’o maua ai nei le suavai ia ma le fesoasoani malosi o le timu o lo’o ola ai nei si o matou aiga. 

“Na ou ola mai lava i nei e leai se suavai e o’o mai lava lenei tausaga e leai foi se vai. 

 “Afai ae tele le aoga le suavai ia te outou e fa’apena foi le tele o se aoga ia te i matou foi.

“E mana’o mai lava si o matou aiga le suavai. 

“Ia o le tulaga la tau suavai e la’u mai lava i tai le aai. 

 “O si o matou aiga foi e ova ma le to’a 7 tagata e nonofo ai, ia e mana’omia lava le vai i aso uma e nei tagata. 

“O le ala foi le ao lo’u fa’apea atu ua le toe uma le vaiaso i se tane vai. 

“O si o matou aiga foi e leai se tasi e faigaluega, o le maumaga lava o lo’o tua ia. 

“Pei ona taga’i atu o le afa o le fanua nei e tōtō ai talo ma fa’i. 

“O le ala faigata foi lea o le leai se suavai, aua e leiloa po fea le tupe e fa’atau ai le suavai ao fea foi le tupe e tausi ai  le aiga. 

Mo se tasi e fia fesoasoani me iloa ina se tasi e maua ai se fesoasoani o Solomona ma lona aiga fa’afeso’otai le numera 7231136 po’o le 7283890