O lo’o matua pogisa pea le Minisita Lagolago o le Matagaluega a le Palemia, le Afioga a Peseta Tevaga Vaifou, i le tulaga ua o’o iai sana tagi na fa’aulu i le Matagaluega o Leoleo e fa’asaga i se tasi fo’i Minisita o le Kapeneta.

Le talosaga lea na ia fa’aulu i le tausaga talu ai, e fa’asaga i le sa avea ma Fofoga Fetalai o le Maota talu ai, a ua avea nei ma Minisita o Fa’ato’aga ma Faigafaiva, o La’auliolemalietoa Leuatea Polata’ivao Fosi.

O ananafi na saunoa mai ai Peseta i le Samoa Observer, e fa’amautuina lona tu’uina i le ofisa, o fa’amaumauga uma e mo’omia mo le faia iai o su’esu’ega. 

 “Na o le fesili atu lava ae fai mai, o lo’o fa’aauau pea a latou su’esu’ega,” o le fa’aaliga lea a Peseta. 

“O le mea lea ‘ou te matua le-malamalama ai, o lea ua ia latou uma fa’amatalaga ma fa’amaumauga tusitusia latou te mo’omia, e pei o tala o tupe ma isi mea, ua uma ona tu’u-a’ao iai, a ‘ou te le le-iloa la le mafuaga ua fa’atuai ai.” 

O lagona le-fiafia fo’i ia sa fa’aalia e le loia a Peseta, le Afioga a Leulua’iali’i Olinda Woodroffe.

Saunoa Leulua’i, o le mata’upu ua “te’a atu ma ua le-toe o’o iai se ma malosi ma Peseta”.

“E matua le-talia lava le tuai, e le-talafeagai, e fesiligia pe aisea, ae leai se tala ua ‘aumai,” o le le-fiafia lea a Leulua’i.

“Ua savali nei i le 18 masina talu ona fa’aulu le talosaga a Peseta i Leoleo, mai lena taimi sa fa’atino ai su’esu’ega lea lava e fa’apea o lo’o fa’aauau pea e o’o mai i le taimi nei. O la’u fesili, ‘aisea ua ‘umi na’ua ai le su’esu’ega a’o le isi itu, o le talosaga a le Minisita o Fa’ato’aga na faia i le taimi fo’i lea, a’o lea na fa’atino e le’i faia le palota.” 

Na toe fa’amanatu mai e Leulua’iali’i, e iai le aia-tatau a lana sui (Peseta) e fesiligia ai le fa’atinoga ma le fa’agasologa o mea fa’apea.

Na fesiligia fo’i le Fa’atonu o le Ofisa Aoao mo Moliaga, o Precious Chang e uiga i le talosaga a Peseta, ae saunoa, e le’i mae’a lava su’esu’ega o lo’o fa’agasolo.

“O lo’o galulue fa’atasi le Ofisa o Leoleo ma le Minisita Lagolago fa’apea le matou Ofisa,” o le fa’aaliga lea a Precious Chang.

“Sa talosaga le matou Ofisa isi mea fa’aopoopo e fia fa’atino ae maise o nisi fa’amaumauga ma fa’amatalaga mai le Minisita Lagolago ma lana loia, ae le’i faia iai se fa’atatau, pe iai se soligatulafono ua faia pe leai. Ao le taimi nei, ua na o se su’esu’ega e fua i le talosaga na tu’uina atu i leoleo, o se tu’ua’iga.” 

O lo’o fa’atali le Faipule mai Fa’asalele’aga Numera 4, mo le fofogaina o se mata’upu fa’asolitulafono o lo’o molia ai i le faia o faiga fa’amalosi ma le isi moliaga o le taufa’asese i  fa’amaumauga lea e tu’ua’ia na ia faia.

O le mata’upu lea ua toe tolopo nei i le masina o Setema. O lo’o te’ena e Peseta tu’ua’iga ia. 

I le taimi nei, o lo’o iai lana fa’asea fa’asaga i le Matagaluega o Leoleo, ona o le latou tagofia ma le fa’atinoga o le mata’upu ua mafua ona iai o moliaga fa’asaga ia te ia