Faamuamua e Lagi aoga a le fanau

By Deidre Tautua-Fanene 05 December 2017, 12:00AM

O Lagi Ale o se tina mai le afioaga o Toamua Uta.

Ua 31 le matua o le soifua ma e toalima nai ona alo.

i le la faatalatalanoaga ma le Fofoga o Samoa i le aso ananafi sa ia faailoa ai le taugata tele o le tau o le soifuaga ua i ai nei.

“Ua taugata tele le tau o le soifuaga i lenei vaitaimi,” o le saunoaga lea a Lagi.

“Ae a fua atu i totogi o galuega lea ua i ai e le taitai o gatusa ma le tau o le soifuaga.

“E fai o le pili o le eletise, o le suavai, o mea fai a le nuu, o mea faalelotu aemaise lava o fanau i aoga e le taitai gafatia.

“Tuu atu i le tau o oloa o le matua’i taugata lava ae mai nei mea faafitauli uma e ave lava le faamuamua i aoga a tamaiti.

“E toalima le ma fanau e aooga le toalua i le Apia Primary ao lesi e aooga i le Aso Fitu.”

Sa ta’ua e Lagi e le’i atoa se tausaga talu ona latou nofoia le latou nofoaga fou i Toamua Uta.

“Fa’atoa matou omai i le ogatotonu o le tausaga.

“Mai i lena taimi e le’i i ai lava se matou eletise pau le itu lea e ola ai matou o se tasi o matou aiga i le isi itu o loo ta’i mai ai le matou uaea ina ia matou ola ai i po.

“Sa ave lava le faamuamua i aoga a le fanau ao lea la ua lamalama faaiu aoaoga a le fanau o le mea muamua lava lena o le a fai o se eletise. 

“Pau lesi tulaga sa ave ai le faamuamua o le suavai ona e pei o le suavai lava mea uma lea la ua ola le vai ae toe o le matou moli lea e fia faagaioi.

“O le taimi nei nao le tama o le aiga o loo faigaluega na o le pau foi lena o le alagatupe lea e tausi ai le maua aiga o isi taimi e alolofa mai ai foi nai aiga i atunuu i fafo ae pei lava o le tama o le aiga o le alagatupe lena o le aiga.

“O si ou toalua e faigaluega i le ofisa o vaai tau e tai lua vaiaso ma totogi e maua lava lana tupe mama e $500 i le lua vaiaso.

“Ia o lena tupe e maua mai fesoasoani ai i le pili o le matou vai faapea ai foi se fesoasoani si matou aiga o loo alolofa mai e ta’i mai le matou uaea e ola ai le matou moli mo lenei taimi.

“E na o maua lava ma le ma fanau le matou fale ae o le taimi nei o lea foi e vaavaai atu i se fale ona o nofoaga nei e matou te nonofo ai ua na o sina mea e tau ina mapu ai ae o loo vaavaai pea i luma ma taumafai e faaputu se seleni e fai ai se fale lelei e nonofo ai.

“O au ou te le faigaluega ae e fai la’u toga kapisi e fesoasoani ai i si ou toalua.

“O le taimi nei ona o lea e faaletonu mai le tau o le ala lena ua le faia ai se mea ae se lelei le tau ia ona toe fai foi lea o le toga kapisi.

“O tupe uma e maua mai i au kapisi ia e fesoasoani lava isi ou toalua i le ma aiga ma mea e fai i le nuu ma le ekalesia.

“E le mafai ona misi nei mea ona o mea e tatau ona fai e faamanuia mai ai foi le Atua i le fanau ona o lae silasila mai e le tagolima ae taumafai lava e fai mea faalelotu.”

By Deidre Tautua-Fanene 05 December 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>