Alagā tatau le toe faatagaina o le sasa i totonu o aoga

By Deidre Tautua-Fanene 05 December 2017, 12:00AM

 “E ao i fanau ona amio pulea.”

O le finagalo fa’aalia lea o le taulealea i a Eneliko Aveau, 34, mai le afioaga o Solosolo.

O le manatu o Aveau o lona lagolagoina lea o le finagalo o le malo o le a toe faafoi mai le tulafono lea sa i ai muamua o le faatagaina o le sasa i totonu o potu aoga.

“O le sasa e le o se mea leaga.

“Sa tatou ola mai foi lava i le sasa ae e le’i afaina ai lava pe lamatia ai tatou ola.

“O lea foi ua manuia ai lo’u ia olaga ona o le sasa e le gata I totonu o potu aoga ae faapea foi o’u matua.

 “E le’i i ai foi ni fusuaga e tupu mai i le va o aoga i la aso ona o le matou fefefe i le mea e tupu pe a toe usu mai i le aso e sosoo ai i le aoga.”

Sa fesiligia e lea taulealea le malo I le mafuaaga na ala ai ona aveesea lea tulafono i le taimi muamua.

Ae na ia taua o se fiafiaga tele i a te ia ona o lea ua toe a’ea se finagalo I le malo ina ua toe aumai le tulafono lenei.

“I lo’u ia lava manatu na’o a’u o le mafuaaga tonu lava lea ua tele ina taaalo ai tamaiti aoga ma fa’aalia amio le pulea i nofoaga faitele ona ua leai se tulafono lea.

“I lo latou manatu e leai se mea e mafai ona fai e le faiaoga pe sasa foi latou auā o lea ua fai ma latou tali pupuni le tulafono lenei.

“Ae ua fiafia le loto ona o lea ua silafia e le malo e pau lava lenei o le fofo o le faafitauli lea o le sasa.

“E le oti ai lava se tamaititi pe a sasa e le faiaoga ma e le valea foi le faiaoga o le a sasa ai lava le tamaititi ia faaletonu.”

Sa ta’ua foi e Lagi e le na o se galuega faitoatasi e faiaoga, e ao ona galulue faatasi uma matua faapea ma sui o nuu ina ia fo’ia lea faafitauli.

“O lea ua tatou oo mai i le vaitau ua televave ai le faatekenolosi ma o lea foi e alu alu i luma le olaga.

“E faigofie lava ona tosina gofie le mafaufau o le tupulaga laity I suiga fou ia ua ofi mai i totonu i le vaitau lenei ma e ao la i a tatou ona tatou puipui ma mataala i tatou fanau.

‘E pei ona ou ta’ua o le galuega fai faatasi a matua, sui o nuu ma faiaoga.

“O le galuega lava ia a le faiaoga o le a’oa’o o le tamaititi, o matua o le aoa’i ma faatonu ma faasino le fanau i ala e tatau ona uia

“O sui o nu’u e tatau ona latou aumaia ni faasalaga e faasala ai le tamaititi e n ate solia le tulafono pe le usitaia foi tulafono.

“A galulue uma vaega ia e tolu e talitonu le manatu o le a le toe i ai se tamaititi e faafitauli auā fo’i o lea ua fefe ona o lea ua i ai le faasalaga mai le nuu, o le a sasa fo’I e ona matua ona o ona uiga le taupulea ia ua faaalia.

“O lo’u talitonuga o le tali lava lea o le sasa auā fai mai le Tusi Paia e tatau le ta i le tua o le vale.”

By Deidre Tautua-Fanene 05 December 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>