Tatala aloa’ia le ta’amilosaga alogāva’a a le Samoa Outrigger

Tusia Deidre Tautua – Fanene ,

17 Hits

O le aso To’ana’i na se’i mavae atu nei sa fa’atautaia ai le ta’amilosaga amata o lenei tausaga a le vaega o le alogāva’a ale Samoa Outrigger.

E to’alima ni kalapu sa mafai ona latou tausiniō ai i lenei ta’amilosaga, o le Laumei, Tautai, Nafanua, Va’ai lau Foe ma le Alyia i le vaega o alii ma tama’ita’i.

Sa fa’atautaia lea fa’amoemoe i luma o le Faletalimalō o le Sheraton i Vaisigano. 

O le ta’amilosaga a tama’ita’i sa va’aia le mata’ina ma o le ‘au a tama’ta’ia le Tautai lea sa manumalo ma muamua tini i le taimi e 25.25 ae le’i taulia ona sa alo ai ma se ali’i i lea ‘au va’a.

O le ‘au a le Laumei sat u lua i le latou taimi fa’atulagaina e 25.33 ma le Nafanua sa tulaga tolu i le latou taimi e 25.39.

O le au alo a alii o le Laumei na manumalo i le ‘au a ali’i.

O le latou taimi fa’atulagaina e 18.45 o le ‘au a ali’i o le Tautai sa tu lua i le latou taimi fa’atulagaina e 19.40.

Va’ai lau Foe sa tula’i mai i le tu tolu ma le Nafanaua sat u fa ae o le ‘au va’a a le Alyia sa soso’o mai ai.

Sa saunoa le failautusi o le S.O.C.A. Moana Schrenkenberg o lenei ta’amilosaga o vaega uma lava o sauniuniga mo le ta’amilosaga fa’avāmalo o lo’o loma i se taimi o lenei tausaga.

“O le ta’amilosaga muamua lenei e amatalia ai lenei tausaga 2018,” o lana saunoaga lea.

“O vaega uma lava nei e tapenapena atu ai mo le ta’amilosaga fa’avaomalo e pei o le World Sprints o le a fa’atautaia lea i Tahiti fa’apea ai ma le ta’amilosaga o le Alo Paopao lea o le a faia i le fa’aiuga o le tausaga nei.”

Sa ia fa’ailoa mai fo’i vaega uma lava o le a alo atu ai le asosi mo lenei tausaga.

“O le matou ta’amilosaga o le V6 lea ua uma ona fa’ata’oto e ta’i lua masina ma fai, ae o le ta’amilosaga o le V1 e ta’i masina lava ma fa’atautaia.

“O lea fo’i ua i ai le matou ta’amilosaga fou e ta’u o le Sheraton to Sheraton, o le ta’amilosaga lea e amata alo atu lava i le Sheraton o lo’o i le taulaga aga’i atu i le Sheraton o lo’o i Mulifanua.”

Sa ta’ua fo’i e le failautusi o lo’o telē le avanoa mo so’o se tasi lava e fia ‘auai i le ta’amilosaga e talia ma le aloa’ia.

“O lo’o matou vala’auina so’o se tasi lava e fia ‘auai i lenei asosi aemaise lava nei ta’amilosaga ina ia susū mai ma tala mai a’ao tatou te fiafia fa’atasi ai.

“O le vaiaso nei o le a toe fa’atautaia ai le isi ta’amilosaga o le V1.”

FA’AIUGA O LE TA”AMILOSAGA:

Tama’ita’i:

1: Tautai Mix (le taulia) 25.25, 2: Laumei 25.33, 3: Nafanua 25.39

Ali’i

1: Laumei 18.45, 2: Tautai 19.40, 3: Vaai Lau Foe 19.57, 4: Nafanua 20.00, 5: Alyia 22.43

Vaega Feololo

Vaai Lau Foe

© Samoa Observer 2016

Developed by Samoa Observer in Apia