O mafatiaga o lo’o feagai ma Ioane

Tusia Deidre Tautua – Fanene ,

17 Hits

Ioane Le’ana mai Faleasi’u

Ioane Le’ana mai Faleasi’u

O le soifuaga o lo’o ola ai Ioane Le’ana mai Faleasi’u e fa’apea nisi o tatou ua le toe i ai nisi o ola ai.

Ae pe’ita’i o Le’ana o le fa’amaoniga lea o lo’o i ai lava tagata o lo’o ola i se olaga pologa ma le mafatia.

Sa fa’aalia e Le’ana o le mafatiaga tele o lo’o feagai ma ia o le leai lea o se suāvai ma se eletise ae o ia fo’i e o lo’o i ai se fa’aletonu i lona soifua maloloina.

E le’o faigaluega fo’i.

Sa ia fa’aalia i le Fofoga o Samoa o le fale fo’i o lo’o nofo a o’o ina timu e pei lava o lo’o nofo i fafo.

“A o’o ina timu ou te fa’aaogaina atigi pusa fa’asunamu ma pepa atigi pusa e poloka ai le tutule o luga o lo’u fale,” o lana saunoaga lea.

“I le 16 o o’u tausaga i le tausaga e 1985, sa ave ai ai a’u ou te faigaluega i Niu Sila.

“O le taimi lea a’o o’u laititi lava ae sa ou lavea mai ai a’o o’u faigaluega.

“Sa taofia a’u i le falema’i ae ina ua ou toe maua le malosi e le’i toe tutusa lava aso e pei o le ala lea ua le mafai ai ona ou toe faigaluega.”

Ae le gata ai i’i fa’afitauli o Le’ana.

Sa ia fa’aalia le faigata o le savali lea i le fale o lona tuaoi ma paelo e la’u vai mai ai ona e leai fo’i se tane vai o lo’o i lona fale auā e le’i o’o atu lava le vai i le nofoaga o lo’o i ai.

“Ua ou mana’omia lava se fesoaosani ona e i ai taimi ou te fa’alogo atu ai ua sau lava le vaivai o le tino.

“E to’afitu matou o a’u e lona ono ma e le’i faia se aiga e pei o le ala lea o lo’u nofo lava o a’u ia.”

E leai fo’i se eletise o lona fale.

E i ai le fa’atoaga o lo’o i le fanua o lo’o nofo ai lea taule’ale’a.

“O le fanau a lo’u tuafafine e omai e fai galuega i le fanua o lo’o nofo ai.

“Pau lava la’u galuega e fai o le va’ai lea o nai o’u tei ma le latou galuega pe a omai ona e le mafai fo’i ona ou alu ou te galue.”

O lona talitonuga o le soifuaga o lo’o lelei lava i le itu o atina’e ae ua fai lava si taugata ma ua le mafai ai e le to’atele ona gafatia le tau o le soifuaga o lo’o ua i ai nei.

© Samoa Observer 2016

Developed by Samoa Observer in Apia