Fa’aalia e se tamā le faigata o le olaga pe a leai se suāvai

Tusia Deidre Tautua – Fanene ,

38 Hits

Andrew Ailima.

Andrew Ailima.

O Andrew Ailima e mafai lava ona ia fo’ia le tele o fa’afitauli e feagai ma ia ae peita’i e tasi lava le fa’afitauli e le mafai ona ia fo’ia o le lē lava lea o le suāvai.

O le taule’ale’a e 36 le matua o lona soifua ma o lo’o malamalama lelei fo’i i le faigata ma le taugata o le soifuaga o lo’o ua i ai nei Samoa.

Ae a ola e aunoa ma se suāvai i le tele o aso ona o le tele o taimi e le ola ai le vai o se tulaga pitoisili ona fa’anoanoa ai.

“O le tele o taimi a pe le vai e au lelei lava i le lua vaiaso fa’atoa toe ola mai fo’i lea,” o lana saunoaga lea i le Fofoga o Samoa.

“Se’iloga lava e vilivili e tagata le Ofisa o le Suāi fa’atoa toe mafai fo’i lea ona toe ola mai.

Sa fa’aalia e Ailima e le na’o lona aiga o lo’o feagai ma lea fa’afitauli.

O le mafuaaga tonu lava lea o lo’o tausa’ilia ai se latou tane vai. 

Sa fa’aalia fo’i e lea taule’ale’a e na o ia o le latou aiga e faigaluega.

O lana matāfaioi muamua lava o lona aiga. O lona mana’oga fo’i ia maua e lona aiga se ola fiafia.

 “O le taimi nei o lo’o ave o’u aso ma’i ona ua fa’alogoina lava le ma’i o le tino ma ua le gafatia ai ona fa’atinoina galuega,” o lana saunoaga lea.

 “Ua fa nei tausaga talu ona matou nonofo i’inei i le aiga o lo’u to’alua, ae sa matou nonofo muamua lava i Savai’i.

 “O le taimi lenei o lo’o matou nonofo fa’atasi ma lo’u to’alua, o la’u fanau to’atolu o le tinā matua o lo’u to’alua.

“E tasi le lesona lea ua ou iloa nei, afai ae le galue le tagata o le a feagai ma mafatiaga o le olaga fa’apea ai fo’i ma lona aiga.”

Sa ta’ua Ailima o le sini autu lava o ia o lana fanau.

“O lo’u fa’amoemoe lea o lo’o i ai o la’u fanau ia latou maua se olaga manuia ma ia I’u manuia fo’i a latou taumafaiga i le itu tau a’ao’aoga.

“Ou te le mana’o e ola falōlō la’u fanau o le mafuaaga fo’i lea o lo’u galue malosi auā o lea ua ou iloa a i’u ma le manuaia aoga a le fanau o le ola manuia fo’i lea o lo’u aiga aemaise ma’ua matua.”

Ae mo le taimi nei o lo’o talosagaina pea e le tamā le ofisa o le suāai ina taga’i ane i le mafatiaga o lo’o feagai ma latou.

Sa ia talosagaina fo’i le mamalu o le atunuu mo sina fesoasoani i lo latou fia maua lea o se tane vai e fa’afaigofie ai ona sefe ai le latou vai pe a o’o ina sua atu le paipa.

Afai e te fia fesoaosani pe fia foa’i fo’i se tane vai mo le aiga o ailima fa’afeso’ota’i le numera 7667142.

© Samoa Observer 2016

Developed by Samoa Observer in Apia