Fa’ailogaina le Aso o le Kanesa i le lalogai i Samoa

Tusia Deidre Tautua – Fanene ,

21 Hits

Aso o le Kanesa i le lalogai i Samoa

Aso o le Kanesa i le lalogai i Samoa

O le vaveao o le Aso To’ana’i sa fa’amantuina ai e Samoa ma le lalolagi atoa le aso fa’amanatu o le Kanesa.

O lea fa’amoemoe sa amatalia i se “Fun Run” sa fa’atauataia i le vaveao amata mai i le Ofisa o Tagata Tafafao mai fafo fa’asolo atu ai i Vaiala toe fa’ai’u mai ai i luma o le Ofisa o Tagata Tafafao mai fafo.

 O tausaga uma lava i le Aso 4 Fepuari o le aso lea e fa’amanatuina ai le Kanesa i le lalolagi e ala lea i le tutuina o ni moliga’o e toe manatua ai e aiga uo ma e masani o latou tagata ua maliliu i lea fa’ama’i o le kanesa.

O le fa’amoemoe i le Aso To’anai o se fa’amantu taua lea i a Samoa, o le toe fa’amanatu lea a le sui Minisita o le Soifua Maloloina salausa Dr. John Ah Ching.

Sa ia fa’ailoa fo’i o le fa’amoemoe autu o le aso o le toe fa’amanatu lea i le atunuu ma le lagolagosua i o tatou tagata ua manumalo mai i lenei fa’ama’i oti aemaise o i latou o lo’o tauaveina pea lea fa’ama’i.

 “O le fa’amantuina o leenei fa’amoemoe o le fa’amautinoaina lea ia to’a laiti i latou e maua i lea fa’ama’i, ma ia to’atele nisi e manumalo mai i lenei fa’ama’i auā le ola soifua maloloina o tagata,” o lana saunoaga lea.

“O le tamoega lea sa fa’atautaia sa tu’ufa’atasia e le matāgaluega o le soifua maloloina ma le Asosi o le Kanesa i Samoa sa tatala i so’o se tasi o le atunuu e fai auai i lea fa’amoemoe.”

E ova atu ma le selau i latou sa mafai ona si’i o latou lima i le fia auai atu i lea tamoega i le vaveao o le aso To’ana’i sa fa’atautaia i Apia e lagolagoina le fa’amanatuina o le Kanesa i le lalolagi.

O lenei tamoega sa amatalia mai i le Ofisa o Tagata Tafafao mai fafo fa’asolo atu i Vaiala ui atu ai Fa’atoia toe fo’i mai i le Uati i Apia ma toe fa’ai’u atu ai i le ofisa o tagata tafafao mai fafo.

O se tasi sa auai atu i lea fa’amoemoe o le tamā i a Sapa’u Lolesio Vitale, 93 le matua o le soifua mai Sale’imoa.

Sa ia ta’ua na alapo lava i le taeao ona o lona fia auai i le fa’amoemoe.

E le gata i lea o se fa’amalositino manaia lea mo ia ina ia malosi ai lona tino.

Ae o le fa’amoemoe sa fa’aauauina mai i le aso ananafi.

E tusa ai ma le saunoaga a Salausa o nisi o ekalesia sa valaauliaina o lo’o fa’atautaia a latou faigalotu e tusa ai ma le autu o le aso fa’amanatu.

 “O le a fa’aaogaina e fa’afeagaiga lenei avanoa ina ia talatalanoa ai i le lautele e tusa ma ala e tatau ona ola ai i le itu fa’aleagaga ma ia ola maloloina ai.

O nisi o nei ekalesia e aofia ai le Ekalesia metotisi a Tufulele ma le Ekalesia E.F.K.S. a Vailele.

Sa ta’ua e le Sui Minisita o le kanesa o le mataupu e fa’asino i le lautele ma o se fa’afitauli e ono a’afia ai so’o se tasi.

 “O le kanesa o se fa’ama’o oti ogaoga lea i totonu o Samoa ona o avanoa fa’atapulaa o lo’o tulai mai i totonu o le soifua maloloina.

“O le ala lea e manaomia ai le ave o gasegase i atunuu i fafo mo togafitiga .

Sa fa’aaogaina fo’i e le sui minisita le avanoa e fa’amantu ai i le lautele ina ia galulue fa’atasi e fo’ia lea fa’afitauli ma lenei avega.

“So’o se galuega lava tatou te faia, ia tatou faia ma le mautinoa ia i ai sona aoga e tetee atu ai i lea fa’ama’i o le kanesa.”

© Samoa Observer 2016

Developed by Samoa Observer in Apia