Ia fautua lelei matua

By Ilia L Likou 01 October 2017, 12:00AM

O lea le talitonuga o le tamā i a Lealaitagomoa Moa o Siufaga Falelatai i le Fofoga o Samoa i le aso ananafi.

Na ia fa’ailoa o le tulaga lea ua faigata ai lava nei aso ona o le mafai ai lea e le to’atele e le fanau ona malamalama i le fa’aaogaina o auala televavave e pei ona i ai facebook ma telefoni.

“Ia e pei o le tele lava o le tulaga o lo’o ua i ai nei o fanau i le le mafai ai lava ona va’ava’ai i tulaga fo’i ia mo le lelei alu i luma, ae na’o le aga’i i tua."

“Ou te tu’aia lava e a’u ia matua i lea tulaga, o le itu mautinoa o so’o se tamaititi lava na ola i Samoa, o lona aiga lava le mea e mafua mai ai lona olaga atoa."

“O lo’u ia lea iloa i ai, ma o se tulaga lelei tele lea mo le aga’i atu ai le lumana’i o le galulue fa’atasi lea o matua ina ia fa’amalamalama lelei i fanau le fa’aaogaina tatau o le telefoni."

Na ia ta’ua o nisi o ata le talafeagai ua faigofie ona maua e fanau ona  o telefoni.

“Ia e ao lava ona toe silasila toto’a i vaega nei ina ia tau taofiofia mai ai le fanau i le fa’atinoina o amioga le tatau."

“O lo’u iloa i ai o se itu faigata tele mo le to’atele o i tatou o lo’o i Samoa i le taimi lenei, ona fai se suiga vave."

“Ae o vaega nei i lo’u iloa i ai, o mea lava e mafai ona fo’ia pe a o tatou va’ava’ai lelei lava i ai."

O lona finagalo e ao ona faia se tulafono e lapata’ia ai fanau i vaega nei.

“Ia ou te iloa o lo’o i ai tulafono ae le’o i ai se tulaga fo’i lea e fa’amalosia ai."

“O le tulaga lelei lava, o le mafai lea ona o’o ma musumusu i fanau le itu lelei e ao ona fa’atino ina mo le aga’i ai le lumana’i."

“E leai se i si e nofonofo lava iloa se mea o fa’aletonu, e ala ona iloa e fanau o latou fa’aletonu ina ua o tatou fai i ai."

“O le faufautua lava o le a fesoasoani le tulaga  o lo’o ua i ai nei...o lea lava le tulaga e ao ona o tatou silafia ma iloa."

By Ilia L Likou 01 October 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>