O LA’U TALA FO’I

06 March 2016, 12:00AM

1. Matauina i Tala Fou se ulutala fai mai ua matua pule aoao le H.R.P.P.-ma o lea ulutala e faasino i le suipi aoao o le H.R.P.P. i le Faiga-Palota Lautele a le atunuu-lea faatoa mavae atu!

O lea la pule aoao a le H.R.P.P. e mafua mai le matua faato’ilaloina o ta’ita’i o isi Vaega Faa-Upufai-ia sa faapea o le a matua tula’i mai pe a mavae le Faiga-Palota Lautele i le faaiuga o le vaiaso ua mavae atu.

O le itu la ua manino mai-sa matua tapenapena le HRPP mo le faiga-palota-ae o isi vaega-e matua leai lava ni tapenaga na faia. O le tulaga la ua manino mai –o le Malo o Samoa-o se Malo lea e pulea e se Pati e to’atasi-ma o le tulaga la ua tatau ona i ai-ua tatau loa ona o uma faipule o le Palemene  i le HRPP -aua o lea ua pine mai i le taimi nei-e le mafai lava e nisi faipule ona faatu se isi Vaega Faa-Upufai- e ese ai mai le HRPP. O le manaia la o le tulaga ua i ai nei-o lea lava o le a tatou toe foi i le mea na amata mai ai le Malo o Samoa-o le “tasi o le taupulega ma le faaiuga e fai e faipule uma o le atunuu!” O le a sou taofi? 

2. Ua matauina foi nisi o sui faatutu ua filifilia e o latou itumalo e avea ma o latou sui i le Palemene o Samoa- o nisi o i latou o tagata aoaoina lelei ma e tulaga maualuga foi galuega sa galulue ai.

O nei la sui fou ua tulai mai- e talitonu le faamoemoe o le a tele so latou sao i le  faaleleia atili o le soifuaga o le atunuu-aemaise ai –o le Tau o le Soifuaga i le taimi nei. E tele foi isi itu- e matua tele ma aoga i ai o latou sao! Ae o le itu e sili ona taua-ia latou silafia lelei ma talitonu i le tulaga pagatia ua i ai nei le atunuu, aemaise ai lava o le matitiva o tagata! O le a sou taofi? 

3. O lea la ua mae’a le Faiga Palota Lautele sa alo atu i ai le atunuu ma o lea lava ua ta’u mai e filifiliga a itumalo ta’itasi uma- o latou finagalo moni! E ui lava la ina le mautinoa ia finagalo o itumalo ta’ito’atasi-ae afai e mafai ona tatou mate’ia  ia finagalo- o le talitonuga la-ailoga e sese pe a matou faapea atu e moomia e itumalo uma o Samoa so latou manuia!

Atonu o le pogai lea sa una’ia ai tagata palota uma ina ia faaaoga ma le tatau a latou palota-o le fia manuia! Ae o le fesili tele lava e ono tulai mai-“A faapefea ona tatou maua ia manuia pe na o lea ua savali I le 40 tausaga o pulea e le HRPP le atunuu-ae le o maua lava ni o latou manuia?  O le tali-e tele ma anoano auala a le Atua e maua ai o tatou manuia!

O lona uiga-afai ua siliga ni o tatou manuia i tausaga e tele ua mavae talu ona tulai mai le HRPP-e leai se mea e faigata i le Atua! Manatua foi- o lo tatou Malo lea e faavae i le Atua-ma afai la o lea-o le Atua na te pulea Samoa ma i tatou uma lava! O le mea lea-e leai se mea tatou te popole ai-aua o le Atua o lo tatou malu-a-papa-ma o soo se suiga na te faia- e mo lo tatou manuia! O le a sou taofi? 

4. Ia –ua mavae le Faiga-Palota ma ua mou atu- faatoa tatou toe feiloa’i foi i le isi lima tausaga o lumana’i-ae mo le taimi nei-o le a se’i o tatou mata’itu pe o le a faapefea ona tiu le Malo i le vasa  loloto o faafitauli tatou te le o iloa! Tatou te le o mautinoa foi poo a ia faafitauli e pei lava o le suiga o le Tau ma uiga o aso ua i ai nei-talu ai ua fesuisuia’i le natura o mea na faia –talu ai faiga a le tagata! Ae ui o lea-afai lava e talia sa matou tuu-a-lalo-o se faamanatu la i le faiga-malo-“E ese le silasila mai le tumutumu mauga-ese le silasila mai le tumutumu la’au! Ia alo ane ia i outou faiva-manaia –ae o le a matou tu’i atu le muli papaga ma tatalo! O le a sou taofi?

06 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>