O LEA UA SILI MEA LE SEUGA A SAMOA!

06 March 2016, 12:00AM

O lea ua tini ma taunuu ma le manuia le faamoemoe o Samoa e tusa ai ma lana Faiga-Palota Lautele sa feagai ai-ma o lea foi ua maua lupe o le seuga mo le isi 5 tausaga.

Ae pei lava ona momo’o Malietoa e tusa ai ma le la Seuga ma Mageafaigā- e fia maua ni lupe o le vanimonimo-ae o lea ua aumai le finagalo o le atunuu-ma ua latou filifilia foi o latou sui Faipule-mo le isi Paeaiga o lumana’i nei.

E ui lava la ina tatou le mautinoa pe o ni lupe o le laufanua pea o ni lupe o le vanimonimo ia ua filifilia e le atunuu-ae fai mai Malietoa ia Mageafaigā- e lelei lupe o le vanimonimo aua o loo i ai le silasila mai le tumutumu mauga-ae le na o le silasila mai le tumutumu la’au! Afai la e moni le filosofia a Samoa e lua vaaiga-o le tumutumu mauga ma le tumutumu la’au-o lona uiga- e tatau foi ona faatauaina le vaai a le anufe mai le eleele!

O le finagalo la o Samoa ua aumai nei- o le HRPP na te toe faafoeina le Malo o Samoa! Afai la ua savali i le 40 tausaga talu ona faafoe e le HRPP le Malo o Samoa-o lona uiga la-o le a faaauau pea lava le pule a le HRPP.

Ae o le fesili taua la i lenei vaitau-a’o foufou le HRPP na te toe faafoeina le atunuu-“O le a tonu lava le mea e igoa o le Manuia?  A toe faaupu- o le a le fua e fua ai le manuia o tagata o se atunuu? Ia pule lava oe ma lau tali-ae o la’u fesili- e te manuia pe a maua sou vaipaipa? Se manuia le maua o le eletise? Se manuia le i ai o se telefoni-le faata o auala-le fai o fale tetele-le fai o vaalele ma le isi anoano? O taumafa sosisi, fasi povi ma isi mea le atunuu atoa? O gafatia e le atunuu le tau o ia mea?

O la’u tali- ua matitiva ma le tagolima le atunuu atoa! Ia taatia la isi mea e tele-ae afai o le a toe faafoe e le HRPP le malo o Samoa mo le isi 5 tausaga-o le fesili- faamata e ono i ai se suiga? Afai la ua tulai mai nisi faipule fou o le Palemene-o le fesili- o le a sa outou faiga e mafai ai ona faaitiitia le pologa ma le mativa o le atunuu o loo i ai nei?

Ia manatua foi- o le pologa ma le mativa o loo i ai nei le atunuu -e le o se mea na tupu mai tagata o le atunuu-ae o le mea na afua mai le faiga-malo. O le mativa la o loo i ai nei le atunuu- e mafua mai i faiga pi’opi’o a le faigamalo. Ae o le itu e sili ona pagatia ai le atunuu-o le faasala lea o le tagata i le gaoi o le $20-ae a tuu ane i le faitau miliona ma miliona o tupe a le atunuu ua maumau i faiga pi’opi’o a le malo ma taupulepulega leaga a tagata faigaluega o le Malo- e le o mafai e le faiga-malo a le HRPP ona fai i ai le amiotonu ma le faamasinoga!

Afai la sa le mafai e le HRPP ona fai le amiotonu ma le faamasinoga i tausaga e tele sa na faafoeina ai le malo o Samoa- e faapefea la ona latou faia le amiotonu i lea mataupu-ae o lea ua savali i le 40 tausaga o ona pulea le malo o le atunuu. Afai la o i ai ni lupe o le vanimonimo e pei ona manaomia e Malietoa na filifilia e le atunuu i le faiga-palota lautele talu ai nei-o le fesili tele lava-o le a sa latou vaaiga mai le tumutumu mauga ma le tumutumu laau i nei faafitauli? O se mea tatau ona faaauau pea nei faiga e aunoa ma le faatinoina o le amiotonu?

Afai o ta’ita’i o le atunu latou te faata’oto le fua-aisea ua le mafai ai ona faatino le amiotonu ma le faamasinoga? Afai e musu le faigamalo e fai le amiotonu ma le faamasinoga i nei mataupu-o le fesili la-o ni tupe ma ni meatotino a le HRPP?

A toe faaupu-o ni tupe a itumalo o faipule o le HRPP? E ui lava ina leai ni aso o le faigamalo fou ua filifilia nei e le atunuu-ae o le aano moni o le filifilia o outou- ia mafai ona outou faia se lavea’i mo le atunuu ua lailoa!

O le faamanatu la- atonu e le afaina le fetu’u a le atunuu-ae ia matau i le finagalo o le Atua lea o loo faavae ai le Malo o Samoa! Ia alofa le Atua ma ia liligi atu ana faamanuiaga i sui faipule uma ua filifilia e le atunuu mo le faafoeina o lona Malo e faavae i le Atua. Ia manuia tele Samoa lenei Aso Sa ma ia faamanuia atu le Atua!

06 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>