LAUGA - “Ia iloa lelei lo tatou Alii o Iesu Keriso.”

06 March 2016, 12:00AM

(II Peteru.1:8)


Tatou te faia mea uma ma le loto iai pe afai tatou te malamalama lelei ma talitonuina lē o loo tatou auauna iai. Pe faigofie pe faigata e le mafai ona tatou ‘alo ese ai pe mamā ai auā ua tatou iloa lelei ma faatuatua iai. O le faamamafa lea a le Tusi nei, ia tutupu ma soifua faatasi i le alofa tunoa ma le iloa lelei o lo tatou Alii o Iesu Keriso.

Se a se tiga e sili atu nai lo le manu’a i fale? O le Tusi nei, o le tau fofoina o faafitauli tau lotoifale o le ekalesia. Ua osofa’i e le tiapolo le fealofaniga ma le maopopoga o le faatuatuaga kerisiano.

Sa muai faamalosiau le aposetolo ona o le sauāina o le au kerisiano mai ona tuaoi ma fafo atu o le talitonuga faakerisiano a o lea ua totolo mai i totonu lava o le ekalesia le fili. O le faamalosi a Peteru, ua uma ona foaiina mai ia te i tatou ai lona mana Atua o mea uma, e oo ai i le ola ma le amio Atua, i lo tatou iloa lelei o lē na valaauina i tatou i lona lelei silisili.

O le iloa o loo tatutala ai le aposetolo, o lou mautinoa lelei ma talia Iesu Keriso i lou loto e pule i lou olaga. E le mafai e le tiapolo ona toe lue oe pe afai ua e talia mau Iesu i lou loto ma faataga Keriso e pule i lou olaga o aso uma. Poo le a lava le ogaoga ma le tiga o lu’i ma faafitauli e fetaia’i ma oe, e te lagona lou mafanafana ma lou manumalo, auā ua e iloa lelei ma talitonuina Iesu Keriso.

Fai mai Paulo, O le mea lea ua tigaina ai a’u i ia mea; a ou te le mā lava, auā ua ou iloa o ia ua ou faatuatua iai (2 Timo. 1:12). Lea foi e masani ona ou faamanatu atu le talitonuga o Matini Luteru, Ou te le iloa poo fea le ala o loo Ia taitaiina ai a’u, ae ou te iloa lelei lo’u Taitai. A maua Keriso, se a se isi mana’o? Auā o mea uma i lou siomaga ma lo tatou lalolagi o mea a le Atua (Iopu. 41:11).

Samoa, o lou soifua ma lo tatou ola o aso uma e le o tuuaunoaina e le fili. O loo tulituliaupu lava oe e Satani i mea uma i taimi uma. O taimi o lelei, o itu aso e maopoopo ma fealofani ai, o vaitau e fesilafa’i ma feofoofoa’i ai, o taimi e solo mili ai mafutaga ma vaaia ai faamanuiaga, o taimi sasamu na o le kama (I Pet. 5:8). Ia faautauta ma mataala. Auā o nei aso, e le o toe taamilomilo mamao mai Satani. Ua oso mai lava i lou lotoifale. Ia e mataala. Auā ua ui mai i lou to’alua, ua ui mai i matua, o fanau, ma tagata e sili ona latalata ia te oe.

O le fautuaga a le toeaina, ia outou faaeteete ia te outou, auā ua mua’i iloa e outou, ne’i taitaieseina outou i le sesē o ē faaletaupulea, tou te pauu ai i le mea sa outou tumau ai (f.17). O le upu a Paulo i le ekalesia i Efeso, ia outou lototetele i le Alii ma le malosi o lona mana (Efeso. 6:10). Ia e iloa uso e, e iai foi taimi e faataga ai e le Atua faafitauli i o tatou olaga. Ioe, e iloiloina ai lou tagata pe se a lou faatuatua (Iakopo. 1:2,3; I Pet. 1:7-9). Ioe, e le i toilalo ai Iopu, ae ua faatuputeleina ai manuia o le auauna.

 E iai laasaga taūa ua faataoto mai e le aposetolo nei e tamau ma saga faamausaliina ai lou iloa lelei o lo tatou Alii o Iesu Keriso. Fai mai Peteru, e fitu sitepu mai le faatuatua e agai atu i luga i le alofa.

O lau laa, e faitaulia sitepu taitasi uma ma faaopoopo atu agai i le isi laasaga. O sitepu nei, o tamaliiaga nei e tatau ona iai i tagata kerisiano uma. Ia faaopoopo i le faatuatua le amio lelei; faaopoopo le poto i le amio lelei; faaopoopo atu iai le le gaoiā; o le onosai i le le gaoiā; faaopoopo atu iai le amio Atua; faaopoopo i le amio Atua le alofa i le au uso; ae taualuga i le alofa. O le alofa lea e le faatuaoia i lanu ma gagana eseese.

O le alofa e tasi ai tagata uma o le Atua. E suamalie ai tiga ma faigata uma e fetaia’i ma oe i aso uma. Le alofa e te vaai tino ai ma molimauina le mamalu o le Atua i taimi faigata o lou olaga. O le malosi la lea o loo tautala iai le aposetolo na te faatoilaloina tofotofoga ma mailei eseese a le tiapolo. Fai mai Peteru, a maua la e outou kama ia, ia ua uma mea uma. Auā o foliga ia o lo tatou Alii. O natura paia ia o le Atua o loo faavae ai Samoa. O le mana tatou te manumalo ai i mea uma ma mafaia ai mea uma lava. Amata mai i le faatuatua ae taualuga i le alofa.

Samoa pele e, o foliga na o lou iloa lelei o Iesu Keriso. A o tamaliiaga na o lou faatuatuaga. Poo mafai ona iloa mai e nisi tagata lou kerisiano i ou foliga vaaia ma mea e te faia? Poo faamalieina lou faatuatuaga kerisiano e taliaina ai mea lelei atoa foi ma mea ua le lelei? Poo mafai e lou fiafia ona faamatala ma faailoa atu lou iloa o le Alii o Iesu Keriso i lou loto? A o fea e gata mai ai lena iloa? Uso e, e lelei le Alii. Fai mai Paulo, o le mea lea matou te le faavaivai ai; auā e ui lava ina tauau ina uma lo matou tagata i fafo, ua faafouina le i totonu i lea aso ma lea aso. Auā o lo matou puapuaga mamasagia ma le vave mavae, e tupu mai ai mo i matou le manuia mamafa e matua silisili ese lava ma le faavavau. (II Kori. 4:16,17).

Poo fea o saisaitia ai ou lagona, a o a foi manu’a ua lepetia ai lou faamoemoe, ia e iloa o taimi o le Atua, o lana lava fuafuaga ma lana Tofa mamao. Auā o le tagata ua na iloa lelei le Alii, e manino lana silasila mamao. E le manatunatu mo nei, a o mea e le vaaia; auā o mea e le vaaia e faavavau ia (II Kori. 4:18). E le mafai ona lagona e tagata uma lea upu a Paulo vaganā le tagata ua iai tamaliiaga o le talitonuga faakerisiano, ma ua ia iloa mamao atu le fuafuaga a le Atua mo oe ma lou lumanai, ina ua e savali ma le mata’u ma le faautauta lava i sitepu ia e fitu ua fofola e Peteru i lana tusiga nei. Manatua, e fanau uma mai i le faatuatua seia mătua i le alofa.

O lea ua taoto ataata o Taulelei i le faatofala’iga a le atunuu sa fau i le ao fau i le po. Faafetai i le filemu o le Alii i sou finagalo malamalama Samoa. Auā e taūa tele le upu lea a Paulo sa faamalosi ma faasinoala ai i lona atalii faaleagaga o Timoteo, “ua ou iloa Le ua ou faatuatua iai” Uso e, it is not what you believe that gives you strength, but WHOM you believe. Ua iloa lelei e Peteru le tele o leo sesē e ono taitaiina ai le ekalesia i se olaga sesē. Ua manaomia e Samoa kerisiano se faamau faailoga mautu pe a faamautinoaina lana amio tausaafia.

Ioe, Samoa, o a foliga o lou iloa lelei o le Alii o Iesu Keriso? E tupu mai fea se atoatoa ma le moni o lou taliaina o Iesu i lou loto ma lou olaga kerisiano? E te le maua se saolotoga i mea ua e talitonu iai. E le tu foi sou malosi i le lalolagi matalasi ua e faalagolago iai. A o Iesu Keriso, o le tumutumu ia o mea uma; o le atoaga o mea uma; o le ola o mea uma.

E te talitonu i se mea e te le i malamalama ai? E te faatuatua i se tagata e te le iloa? O le faamanatu Samoa; ia faaopoopo i le faatuatua le amio lelei, le poto, o le le gaoiā, o le onosa’i, o le amio Atua, o le alofa i le au uso, i le ma le alofa. O fua na ma le mautinoa o lou iloa lelei o lo tatou Alii o Iesu Keriso. O iina e faatonu ma pulea ou tiute ma ou faiva o lenei paeaiga. E taitaiina ou manatu ma au faaiuga fai i sau auaunaga ma sau tautua i le atunuu, ae a le Atua e ana Ia mea uma lava, ua fai ma Faavae o Samoa. 

O le tatalo a le aposetolo, Ia faateleina ia te outou le alofa tunoa ma le manuia i lo outou iloa lelei o le Atua, atoa ma lo tatou Alii o Iesu Keriso.

 

Amene.

 

7737063/7783782

E-mail: [email protected]

06 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>