Manatu o le Fa’atonu - Ua lē lava le tuliloaina o le amiotonu

By Mata'afa Keni Lesa 06 May 2016, 12:00AM

O le Lua aso talu ai, na faasala ai ma sala tupe se sui faatu i le taimi o le Faiga-Palota Lautele-ona o le faia o se ta’utinoga sese i le taimi na ia tuuina atu ai pepa o lona avea ma sui tauva i le Ofisa o le Komesina o Faiga-Palota e le Faamasinoga Faa-Itumalo.

O Ofoia Nomeneta Ofo’ia, o se sui tauva mo le Itumalo o le Vaa o Fonoti, na faasala e le Alii Faamasino o le Faamasinoga Faa-Itumalo, o Vaepule Vaemoa Vaai.

E tusa ai ma faamatalaga na faailoa mai ia i matou, na faaulu e Ofoia le pepa o lona filifilia ia Fepuari i le Ofisa o Faiga-Palota lea na ia faia ai se ta’utinoga sese e faapea e leai ni ona faasalaga muamua.

Ae peitai-o le taimi lena na tuuina atu ai e le Sui Usufono o le Palemene mo le Vaa o Fonoti-o Tialavea Tionisio Hunt, ni ata o le lipoti a leoleo i le Komesina o Faiga-Palota, lea na faamaonia ai e faapea o lea sui faatu-e le tasi sona moliaga, ae lua.

“O le faasalaga muamua o se moliaga lea o upu tau faamata’u lea na faasala ai o ia ma sala tupe e $80  i totonu o le Faamasinoga Fesoasoani, “e pei ona faailoa atu i le Faamasinoga. “ O le faasalaga lona lua –o le faao’o-lima matuia lea na faamaonia ai lona nofosala ma sala tupe ai i totonu o le Faamasinoga Sili ia Tesema 2015.”

I totonu o le Faamasinoga-sa tuuina atu e le Faamasino o Vaepule se avanoa ia Ofo’ia e fetalai ai. O ia o le tamā o se fanau e to’alima e pei ona faailoa atu i le Faamasinoga ma e ese lana faauigaina o le ta’utinoga ma le tulafono. 

“E tusa ai ma lo’u iloa o lena vaega, sa ‘ou manatu o le faasalaina e faasino ia i latou ua uma ona faasalaina mo le olaga atoa i le falepuipui,” o le faaaliga lea a Ofo’ia.

 “Faatoa ‘ou malamalama mulimuli i ai ina ua fesoota’i atu le Ofisa o Faiga-Palota ia te a’u ma ‘ou sailia ai loa se loia na te faamatala mai ia te a’u….Ou te le teena le itu e faapea (Na ‘ou faia se ta’utinoga e le moni), O lea ua ‘ou malamalama nei ma ua ‘ou talia lea tulaga.”

Ae peita’i-sa le faamalieina le Alii Faamasino o Vaepule ma o lea na ia faasalaina ai Ofo’ia.

 “O le le malamalama atoatoa i lea tulaga e le o se tete’e lea,”o le faaaliga lea a le Faamasino. “O oe o se tausitusi, ae le o oe o se tagata e leai sona tomai tau le poto faapitoa-e le afaina poo le a le galuega.

E i ai le pogai na faatulaga ai e le Ofisa o Faiga-Palota nei (pepa) mo le suesueina o sui faatutu ina ia taofia ai faasalaga ua mavae mai le avea ma sui tauva.”

Ua matua fetaui lelei lea tulaga ma o le faaiuga a le Alii Faamasino o Vaepule e faavae atoatoa i faamatalaga molimau na tuuina atu i ona luma. Ae peitai-o lenei faamasinoga ua lāgā ai nisi o fesili taua e le mafai ona tatou fulitua i ai.

Ua matou fai atu faapena talu ai- o Ofo’ia e le ona pau lea o le sui faatu na toso faatātā atu i le Faamasinoga ona o le Faiga-Palota Lautele talu ai. O loo i ai foi isi sui faatutu-e aofia ai Le Tagaloa Pita, Taula Simi ma Tuula Kiliri Tuitui-ia o loo faatalitali lo latou taunuuga e tusa ai ma ia lava tuuaiga. 

Tama’ita’i e ma alii, matou te talitonu e faapea o se itu taua tele le faataga o le tulafono e faagasolo lona taualumaga. Ma afai ua soli e nei alii le tulafono, e pei ona tuua’ia ai, e tatau ona faapena ona fai. Ae peitai- a pa’ia loa le faimea tonu, tausisi ma i se tasi itu, le amiotonu, ona matua tatau lea ona e manatunatu i nisi taimi. 

Ua matou fai atu faapena ona e le’i mamao tele atu se taimi na tuua’ina ai nisi o Sui Usufono aupito i sinia o le Palemene ona o faiga pi’opi’o ma le tau faasese i faasino i lea lava faiga-palota-mai le nofoaga na faasalaina ai nei alii – na faamagalo ma toe faatagaina e faatino o latou tiute e tusa ai ma le tausia o le tulafono-e ui i le ituaiga o tuuaiga e faasaga ia i latou.

Ma a pa’ia loa le mataupu tau faasalaga ua mavae, ona avea loa lea ma le isi o lalolagi pogisa, a ‘ea? I aso ua alu, sa i ai o tatou tagata ua i ai o latou tala faasolopito tau solitulafono –ia na uosi mai i totonu o lo tatou Palemene, e aunoa ma le iloa.

Mo se faata’ita’iga, o le Sui Usufono muamua o le Palemene lea na faamaonia lona nofosala i le fasioti tagata tulaga muamua ma na faa-falepuipui mo le fa tausaga i fafo atu o Samoa-ae ua mae’a ana paeaiga e lua i totonu o le Palemene talu ai nei.

Na faasala o ia? Na ia ta’utino lona faasalaga tau pagota i luga o lana pepa o le avea ma sui faatu? Aisea na le faia ai e se tasi se gaoioiga i lena taimi? Ae faapefea isi lava Sui Usufono o le Palemene?  Na siaki e se tasi o latou faamaumauga tau solitulafono? 

A toe ki la faanatinati mai i luma i le taimi nei, o loo i ai lava se Minisita o le Kapeneta-o ia lea o loo mana’omia e le pulega a Amerika Samoa e tusa ai ma le tele o ni tuuaiga matuiā.

Ua uma ona faailoa mai ia i matou e faapea o le tusi saisai mo le saisaia o ia, lea ua leva ona taatia talu mai le 2008, o loo tumau pea ona aloa’ia. I le taimi nei la-na ia ta’utino lenei tulaga i luga o lana pepa tau le avea ma sui faatu?  

Ma i le taimi nei- o lea tusi saisai ua uma ona faamaonia, o le a se mea ua fai e uiga i lenei mataupu? O se mea tatau ‘ea ia i matou ona faamanatu atu ia te outou o lea matou te talanoa atu e uiga i se Minisita a le Kapeneta? 

O le itu lea e tau faailoa atu e faapea o se mea lelei le vaaia o loo tausisia le tulafono i taimi uma ma faatinoina i nisi o mataupu. Ae peitai-e leai se mea matou te mafaia vagana ai le faanoanoa o le leai o se tulaga faifai pea ma le leai o se amiotonu pe a tatou mafaufau i nisi o mataupu ia e foliga mai ua matua soli le tulafono ma fulitua i ai ma le loto atoa.

O le a so outou taofi? Tusi mai ma faasoa mai outou finagalo ia i matou!

By Mata'afa Keni Lesa 06 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>