O LA’U TALA FO’I

06 July 2016, 12:00AM

1. Mata’uina i le Televise se fono a faia’oga sa fai –ma e tusa ai ma Tala Fou a le Televise-o lea fonotaga-o le fia faaleleia lea o le aoaoina o mataupu tau aoaoga-ona e tusa ai ma le molimau a le Matagaluega o A’oga, Taaloga ma Aganuu-“ua matua pa’ū maulalo lava i lalo togi o tamaiti mai ia mataupu.

O le matau la i lea fonotaga-e peiseai e aliali mai e le o lelei le aoaoina o ia mataupu- fua ina maulalo tele togi o tamaiti a’oga. E faafetaia ai  la le agaga tau lagalaga o le Matagaluega o A’oga, Taaloga ma Aganuu-ae peiseai e aliali mai-afai e le o lelei le aoaoina o ia mataupu i fanau a’oga-o lona uiga-ailoga o lava le iloa o faia’oga e a’oa’o atu ai ia mataupu? O le uiga o se faamatalaga-‘ailoga o lelei le aoaoina?

Afai la e le o lelei le aoaoina atu-ua sala la ina le malamalama tamaiti! E mafua-ona afai e le’i a’oa’oina ia faia’oga i se Kolisi Faa-faia’oga-e faapefea la ona iloa a’oa’o ia mataupu i le fanau? A tatou toe tilotilo la i tua-o le upu moni-sai i ai le Kolisi o Faia’oga-ma o lena Kolisi-sa a’oa’oina ai Faia’oga-ma o le pogai foi lena- sa lelei ai ona latou aoao atu soo se mataupu! O le fesili la-o le poto o ai na mafua ai ona aveese le Kolisi Faa-faia’oga-lea sa aoaoina ai faaia’oga uma o Samoa?

Afai la e le o lelei ona aoaoina ia mataupu e faia’oga o loo i ai nei-o lona uiga-e le o lava lo latou poto faa-faia’oga e aoao atu ai ia mataupu. Afai la ua tuu le Kolisi Faafaia’oga-ona o le manatu ia o faia’oga i le Iunivesite ona o mai ai lea avea ma faia’oga-atonu o se mataupu lea e tatau ona toe tilotilo lelei i ai le Matagaluega o A’oga, Taaloga ma Aganuu! Aise? Leaga foi e le faapea a alu i le Iunivesite ona fo’i mai ai lea ua poto e faia’oga!

O le faia’oga o le tagata e aoaoina faapitoa mo le aoaoina atu o mataupu i tupulaga aoaoina! Afai la ua faoa i le Ta le finagalo o le Matagaluega ona o le leaga o taunuuga o suega a le fanau-o le taofi la e faapea-“Aoao lelei muamua faiaoga-ona faatoa o ai lea o faia’oga –e aoao le fanau! O le a sou taofi? 

2. Matauina foi ma le faanoanoa i Tala Fou le mata’utia o faiga tau fasioti tagata-ua i Samoa nei. O le mea ua matauina ma le manino-o le ituaiga lenei o fasioti tagata-o loo fai i totonu o atunuu faatupu faalavelave-ae o lea ua i Samoa nei! Afai la o lea ua tatou vaai tino i ai- aemaise ai lona faateteleina-o le fesili-o le a le pogai? Pule lava oe i lau tali-ae o lona pogai atoa-ua matua leai lava ma se mea o fai e matua ia latou fanau

! O lona uiga-afai o inu pia i aso uma ma faatupu faalavelave-o fea o i ai matua? Afai foi o i ai matua-o le a le la mea o loo fai i nei faafitauli? Afai ua tupu so’o lenei mea o le fasioti tagata-ia manatua la-o lea e ta’u ai matua-aiga ma le nuu! Afai la o lea-o se mea lelei le tusitusi lima o tagata ia ta ita? O se mea lelei le talanoa o tagata i lota aiga ma le nuu? Ae o le mea e sili ona faanoanoa ai-o le Atua e ana le tulafono-“Aua e te fasioti tagata.” Afai la o lea-faamata e le o mea faatupu mala lea? O le a sou taofi?

Matauina foi i Tala Fou-o lea foi ua fai mai le Palemia-“O Olo e ‘faavalevalea’! Afai la o lenei Tulafono Tau Faaofi o Sitiseni-e le o se ‘faitoto’a lea i tua mo tagata mai fafo e teu faafaigaluega a latou tupe-o le a la le mea na fai ai- a’e o lea foi e i si isi tulafono faapea?

Afai la o se tulafono mo tagata e i ai o latou piitaga i Samoa ma e manana’o a latou fanau e taaalo mo le Manu Samoa-o le a la le pogai e tau faa-sitiseni ai muamua? Afai la ua lau e le Palemia le faavalevalea o Olo-o le tuu-a-lalo i le Faipule o Olo-malie ae taatia ai faapena.

E tatau lava ona e silafia-o tagata Samoa uma lava e valelea (tulou), ae na o le toatasi lava le tagata Samoa e poto-na o le Palemia! Ia silasila foi i le poto tele o le Palemia-e mana’o e usita’i le atunuu atoa i le tulafono-vagana ai le Palemia. Silasila foi i le faitau miliona ma miliona o tupe a le atunuu na maumau i faiga pi’opi’o a lana faigamalo-ae musu e fai le amiotonu ma le faamasinoga! O le a la le ta’u o lea ituaiga o tagata? O se tagata poto poo se vale ‘ai-‘aile? O le mea lea-e na o le Palemia lava le tagata poto maoa’e o Samoa! O le a sou taofi? 

06 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>