Soifua i le olaga faigofie
Na ta’ua e le tamā i a Saveatama Atina o Siumu i le fa’atalatalanoaga ma le Fofoga o Samoa ananafi e ala ona mativa Samoa o le ola fa’apalapala.
O Saveatama ua 58 le matua o lona soifua, ma o ia o se tamā galue to’atasi aua le tausiga o lona aiga aemaise le fa’atupeina o aoga a le fanau.
“O lena ua outou taga’i mai i si o matou aiga, e le’o faapea ua mautu lelei le fale e nononfo ai ma o lea lava e tausaili.
“O le aoga tele o se fale ona e fa’atatau i taimi leaga aemaise lava pe a o’o mai afā.
“O le agaga lava ia, ia o’o mai taimi leaga o lo’o mautu lelei se fale e nonofo ai.
“Ae o le tamaoaiga lea e maua mai la matou maumaga ma faatoaga fuala’au aina, kapisi ma mea faapena o lo’o fa’apea ona fesoasoani tele.
“E leai se isi e faigaluega o le aiga, na o matou lava e to’afa lo matou aiga, o a’u, o lo’u to’alua ma la ma’ua fanau e to’alua.
“O le tausaga e 1970 na o matou nofo’ia ai eleele nei, ma e tusa ma le 60 eka le tele o le ‘ele’ele ae e le silia ma le eka o lo’o o’u fa’aaogaina.
“E le’o mafai ona kava uma, ae o le fanua ia o le fanua na ou taumafai mai i le taimi a’o soifua si o’u tamā, ua uma atu lo’u tama , ia lea ua i a te a’u lava le fanua.
“O Siumu e ona ‘ele’ele nei.
O le tulaga faigata o lo’o feagai ma Saveatama o le galue to’atasi lea.
“E pei o le tulaga lena o lo’o i ai i le taimi lenei o le galue to’atasi, e fia mana’omia ni mea foi ia e maua ai se fesoasoani , e totogi ai tagata e omai e fesoasoani mai le faatoaga.
“Aua e le mafai e lima e lua ona fai le maumaga, oso atu i lea feau, e uma ane le aso e le tino mai lava i sona tulaga lelei.
“E le avea lava se talo mo containers, e faatau lava i luma le fale ma e le fa’ataua i aso uma ae na o le aso Faraile lava e mafai ona faatau ai meamata i luma o le fale ma e masani ona maua le $200 faasolo mai lalo le $180.
Mo Saveatama lava ia, o lo’o ia lagolagoina le finagalo o le Palemia e fa’apea ‘e ala ona mativa le tagata , o le le galueaina o le lauelele’ele.