Fa’amanuiaina se tinā i se masaga tolu, teine

Tusia Deidre Tautua-Fanene ,

90 Hits

Jacinta Siaosi ma lana masaga tolu teine.

Jacinta Siaosi ma lana masaga tolu teine.

Sa fananau mai se masaga tolu, teine i le vaveao o le Aso Gafua i le falema’i o le Tupua Tamasese Meaole i Moto’otua.

Sa ta’ua e se tasi o tama’ita’i tausi soifua i le Samoa Observer o lenei fa’amanuiaga e seāseā tupu.

Sa ia ta’ua fo’i le loto toa o le tinā o lenei masaga tolu o Jacinta Siaosi mai afioaga o Matāutu Lefaga ma Sataua ona sa mafai e ia ona fanau sa’o e aunoa ma ni fa’afitauli.

 “O le ulumatua sa fanau i le 2.32am, o le lona lua o le 2.36am ma le ui’i sa fanau i le 2.40am,” o lana saunoaga lea.

 “O le mamafa o le ulumatua e 1.9kilo, o le lona lua e 2.3kilo ma le ui’i e 2.5kilo. E foliga mai e ‘ai uma e le ui’i mea’ai i le taimi a’o mamafa ai le tinā.

 “O lo’o malolosi uma pepe e to’alua, ae o lea e tu’u i’inei mo sina taimi e va’ava’ai ai ne’i te’i ua tula’i mai ni pefea ae mamao fo’i le nu’u e omai ai le tinā.”

Sa fesiligia fo’i lenei tama’ita’i tausi soifua pe fia ni masaga ua mafai ona fananau mai, ae na tali le tama’ita’i e na te le’o manatuaina.

“Ua le manatuaina pe to’afia ni masaga, ae pau le itu ou te iloa o tulaga fa’apenei e masani lava ona ave i fafo.

“Ae fa’afetai ona o lea ua mafai ona ola le tinā ma lana fanau, ma sa fanau sa’o lava. E ese fo’i le toa o le loto o lenei tinā.

 I le fa’atalanoaga a Jacinta Siaosi ma le Samoa Observer i le afiafi o le Aso Gafua sa ia fa’ailoa ai lona loto fa’afetai i le Atua ona o lona auai ma ia i taimi o ona tigā.

“E to’alua le ma fanau matutua o teine fo’i a lea ua toe fa’aopoopo mai ma lenei fa’amanuiaga o le masaga teine fo’i,” o lana saunoaga lea.

 “Sa ou taofia mai lava i le Aso tofi o le vaiaso na te’a nei.”

Sa ia fa’ailoa mai fo’i e na te le’i iloaina o lo’o ia tauaveina se masaga.

“E fai lava a’u siaki masani i tuā ma e pau lava le tala o lo’o lelei lava le tātā o le fatu o le pepe,” o le tala lea a Jacinta.

“Ae o le vaiaso na te’a nei na ou sau ai i le Family Health lea o lo’o i savalalo e fai la’u faata ona o lo’u fia iloaina po’o se teine po’o se tama.

“O i’ina sa fa’ateia ai a’u ina ua faimai le foma’i e to’atolu tagata ia ou te tauavea.

“Sa fa’ate’ia au ae sa fa’atonuina a’u ou te alu i Moto’otua.”

 Sa fa’ailoa mai e Jacinta ina ua alu atu i le falema’i sa taofia ai lava ia i lea aso ma sa ia logoina loa lona to’alua ma lona tinā.

“Pau a le tulaga lea e i ai o le agaga fa’afetai i le Atua ona ua mafai ona fa’asaoina uma matou ma si a’u fanau,” o lana saunoaga lea.

“O lea ou te iloa o tulaga fa’apenei e i ai lava mea tutupu ai ae fa’afetai i le Atua ona o lea e malolosi uma matou.

“O le taimi nei e le’i maua ni igoa ae pau le tulaga lea e i ai talosia ae lata mai se taimi e matou te vave o ai I le fale.” 

© Samoa Observer 2016

Developed by Samoa Observer in Apia