Fa’amaonia Moliaga o le Peresetene o le Fa’amasinoga o Fanua ma Suafa

Tusia Deidre Tautua-Fanene ,

105 Hits

Peresetene o le Fa’amasinoga o Fanua ma Suafa: Fepulea’i Attila Ropati.

Peresetene o le Fa’amasinoga o Fanua ma Suafa: Fepulea’i Attila Ropati.

O le Peresetene o le Fa’amasinoga o Fanua ma Suafa, Fepulea’i Attila Ropati ua fa’amaonia mai nei ona moliaga.

O nei moliaga e aofia ai le fa’ao’olima, umia o se ‘a’upega malosi ma le fa’ao’omanu’a.

O lenei mataupu sa fa’amaonia mai e le So’oupu a Leoleo, Auapa’au Logoitino Filipo i le afiafi o le Aso Gafua.

“O moliaga nei ua mae’a ona fa’amautinoaina ina ua logoina Fepulea’i e susū mai i le Ofisa i le aoauli,” o lana saunoaga lea.

“O le Aso 7 o Fepuari o le a vala’auina ai lenei mataupu i lalo o le Fa’amasinoga Fa’aitumalo.”

E tusa ai ma le fa’amatalaga a se tasi o leoleo i le matagaluega o lenei mataupu o lo’o fesiligia sa tula’i mai i le fa’aiuga o le tausaga na se’i mavae atu nei.

“O le taimi tonu lava o fiafiaga o le fa’aiuga o le tausaga a fa’amasino lea sa faia lava i le lotoā a le fa’amasinoga,” o le saunoaga lea a lea ali’i.

“O i sa fa’apea na fa’ao’olima ai le o lo’o tu’ua’ia i se sikulatī o lo’o galue i le lotoā.

“E ala i lona taina fa’alua o le ulu o le o lo’o a’afia i se atigi fagu pia.

“E le’i ripotia lenei mataupu i le ofisa o leoleo i lea taimi ae peita’i ina ua mavae ni aso talu o tula’i mai lea mataupu sa fa’alogoina ai e le na a’afia le tiga o lona ulu.

“O lea sa aveina ai loa lea o na a’afia i le falema’i e va’ai le foma’i.

“Ina ua taunu’u atu i le falema’i  le na a’afia sa va’aia loa e le foma’i ma sa maua ai ni tama’i atigi fagu i le ulu o le na a’afia ma o i sa ripotia ai loa lea mataupu i le ofisa o leoleo.”

Ina ua fesiligia e le Samoa Observer Fepulea’i i le vaiaso na se’i mavae atu nei e tusa ai ma le mataupu o lo’o fesiligia ai e le’i fia tali mai i fesili.

E o’o fo’i i le Ofosa Sili o le Matagaluega o Fa’amasinoga, Papali’i John Taimalelagi e le’i fia tali mai fo’i.

© Samoa Observer 2016

Developed by Samoa Observer in Apia