Tolopō fa’amasinoga o Filipaina ma Ovaleni

By Ilia L Likou 07 March 2018, 12:00AM

Ua toe tu’u atu nei i tua  i le aso 12 o le masina lenei le valaauina o le mataupu i a Filipaina ma Ovaleni i le fa’amasinoga.

E pei ona i ai ripoti na tu’uina atu talu ai nei,  o i la’ua nei  o lo’o ua i ai nei le fa’amasinoga nisi o fetusiaiga a lo la loia ma le Fa’amasino Sili e fa’atatau i lo laua saogalemu.

E pei ona silafia o Filipaina ma Ovaleni lo’o ua masalomia i se soloaga mai le falepuipui lea  ele’i mamao atu nei.

I le falepuipui i le vaitau lava lea, o le taimi tonu lea na amata su’esu’ega a le Matagaluega o Leoleo e fa’atatau i mariuana na maua i le falepuipui i Tafa’igata.

O lea le saunoaga a le So’oupu a le Matagaluega, Auapa’au Logoitino Filipo i le fa’atalatalanoaga ma le Samoa Observer i ripoti talu ai.

O lenei su’esu’ega ua fa’ataunu’uina ina ua mae’a se sailiga a leoleo i  le falepuipui ma maua ai mariuana ma tupe i le nofoaga.

Na taumafai ai e fa’afeso’otai le Komesina Lagolago o le Falepuipui i a Ulugia Numia ma le Minisita Tialavea Hunt ae le’i mafai ona maua mai se fa’amatalaga e fa’atatau i lea mataupu.

Aepeitai , o  la’au fa’asaina lava po o mariuana o lo’o fa’aauau pea le fa’asa ma tapu lona fa’aogaina i totonu o le atunu’u.

I le fa’aaogaina lava o le mariuana na vala’au ai  Unasa Iuni Sapolu se mataupu e fa’apea e tatau ona taliaina ma fa’atagaina i Samoa nei le fa’aaogaina ai o le mariuana.

O le tali fuaitau lenei a le Palemia, Afioga Tuilaepa Dr. Sailele Malielegaoi; i le polokalame o le 2AP ma le Palemia, ina ua fesiligia sona finagalo i le sosola soo ai o pagota i Tafaigata, o lona atoaga lenei;

2AP: Lau Afioga ua faateleina le paogata sosola??? O le a ea le mafuaaga???

PALEMIA: O le laki a o le vaena lea na toe sosola atu ananafi, la ua toe maua uma a. Ae ua uma ona fai le talanoaga foi ma le isi vaega, e le lafi se isi i le ata o le laau. O le mea mo’i a, e faatamala le pulega. a?

Ia o le isi vaega lea na toe sosola lea na toe pu’e, o le faamatalaga na oo mai i a te a’u, o le alii lea na kuka a’o lea e fa leoleo ia e i ai, puga mai a i le va o leoleo sola; a?

O le mea la lea, o la’u fautuaga i le Komesina o Leoleo o loo nafa ma Tafaigata; e sili ona o ifo e avane uma a le aualii ia, e fai ni a latou exercise. Usu mai i le taeao i le ta o le fitu, aumai lea tuu i Apia ae faatamomoe atu a ia tau i uta i Tagaigata.

Na o le pau a na o le auala; ia ua iloa foi isi leoleo, i le mea na sola ai le isi pagota. Ua fai le faaiuga i i faasala; o loa i uta e ave le paogata, leoleo ia ma le paogata, na ona o atu a, fai mai leolei ia muamua atu i fafo.

Na o na laa a o le paogata lea alu loa i le atoa e taufetuli atu ia le aualii ia; ia e vaai mai tagata, se pei mo mea ni tagata pii foi ia sumo, a? ua e vaai i tagata pii sumo?

2AP: Sapani?

PALEMIA: Sapani, ia pei ni; o tagata nei ua leva na tatau ona ave e faalitaea, a ou te ofo i le Komesina la e i ai ma le avatu o nei lola. O tagata nei ua tatau ona litaea; i lo le avatu i uta o lona uiga o le tele o taimi e o ane ia paogata e tuitui vae.

O le matua le aoga a o nei ituaiga leoleo. Ia le a la o le lu’i i le Minisita, toe tilitilo i le au peva ia; kilia ese. a?

E le moomia e le atunuu nei ni peva ma ni au sumo e o atu i uta e vaai ia pagota.

2AP: Ia ona o le manatu foi lelei i ai, o nisi o leleo e lapopoa e faigata ona latou puipuia i le taimi o le a manatu ai le pagota e sola ese, ae o le manatu e le o iai se mea e malu lelei ai, aua e au ina oo i le tulaga o le tofu o le pagota ma le leoleo e vaaia.

PALEMIA: Leai o le taimi nei pau a le mea lea e agaga i ai i le Minisita o Leoleo onosa’i, lele toeitiiti uma le; ia o le ala foi lena e le’i faigofie le faaiuga lea.

E le’o se faaiuga faigofie; ma o le tele o atunuu o le toe ave o le falepuipui i se isi nofoaga e le’o se mea e taugofie toe faigofie.

Ae ou te faafetai i le lototele o le Minisita lea e i ai nei; a? i le mamao o lana faatofalaiga, faafetai foi i le Matagaluega o Tupe i le faaavanoa o tupe e sii ai le falepuipui i o.

E leaga o i i totonu i i, o lea a ua avea o le vaega o le taulaga, ma o se mea e le matagofie le lotolotoi i o pagota i totonu o mea e alala ai le mamalu o le atunuu ma o latou fale nofo.

Aua o le mea na e i ai na ona oso a i tua o le pagota ia sau loa fai ma faafitauli i aiga o loo nonofo i. O le puipuiga la o tagata lea na ave mamao i o, aua ou te leiloa poo ua tou oo i ai. E toe maua mai a i le mamao i uta o Mauga Folau, e toe maua mai a e leoleo la e le’i taitai oo i tai.

A e faigofia a la ma o le fausaga foi la; o le matua fausaga faafalepuipui o nei ona po. E te fiu fo’i e eli lalo sau tano e te molu mai ai, na’o o ālā ālā mea la e, ia se’i vagana la le oso i luga, ia ae a tuu i luga ma mea o pa uaea tetele, ua atili ai ona faigata; a?

E sili atu la ona maoa’e le fausaga lea laa fai nei, ua a la ona fai le mea lena ua lelavava foi le malo e faafeagai pea ma nai ne’i tama’i faafitauli. Aemaise a mo mea o paogata ua i ai lava lo latou agaga e sola.

Ia se’i vaai i le isi kokemi lea toe tasi le aso magalo ae alu a; o lona uiga o le faiai, o le faiai o le tama’i pusi lea e fealuai ma le na pagota, o lona uiga na o le pau a le mea la e i ai i le faiai o le na paogata, o….

2AP: Fianofo ai pea i Tafaigata???

PALEMIA: E le ai; o le fia maua o se avanoa e fia sau ai e fai isi solitulafono. E le’o tatai ona faatauaina le tulaga o lea laa magalo.

A o iina foi, e mafai ona faapea; a? e aumai a e le Atua auala o le iuga o le tagata; a? o lona uiga ana se’i nofo le alii lea se’i magalo i le tasi o le aso, o lona uiga e sili atu, o ana mea uma i nan a sau nei fai e sau loa a alu toe fai.

O lona uiga la, ua e iloa foi le pese lea a le Taiti; E le tutupu fua mea faapena. a?

Mo le galuega o le falepuipui i Tanumalala ua faamaonia e le Kapeneta le tuuina atu o le konekarate mo le fausia o le Tane Vai ma le Fa’atanoa mo le Falepuipui i Tanumalala, i le Kamupani o le King Constructon Ltd i le tau aofai e SAT$505,252.50 e aofia ai lafoga.  

O lenei tauofoga sa tatalaina e le Komiti o Tauofoga i le Aso 16 o Oketopa, 2017 ma e na o le King Construction lava le kamupani na tuuina mai le latou tauofo.  Na faamalieina e le King Construction aiaiga uma o le tusi tauofo, peitai na sili atu lana tau i lo le tau fuafua mo lenei galuega.  O le mae’a ai o feutanaiga ma le King Construction lea sa faaitiitia ai le tau o lenei galuega mai le SAT$646,070.00 i le SAT$505,252.50.  

Mo le silafia, o le soa komiti sa iloiloina lenei tauofoga e aofia ai le sui mai le Matagaluega o Tupe, Ofisa o le Loia Sili faapea ma le sui mai le Pulega o le Suavai.  

O le lauga lenei a le Palemia i le Suaina o le Ele’ele o lea galuega tele e pei ona o lo’o ua fa’agasolo ne ii Tanumalala.

“E faatalofa atu i lenei taeao fou iō outou pa’ia faale-talalelei, mamalu faale-malo ma pa’ia faale-atunuu. “O lenei taeao fou, o se tasi o aso e faitauina i aso tāua o galuega ma ālafua fa’ata’atitia a lo tatou Malo mo le puipuiga ma le saogalemu o Samoa.  “O lenei sauniga faapitoa ua faailo ai le amataga o le fausia o le nofoaga fou lenei mo le Falepuipui i Tanumalala nei.

‘O le asō ua tatala aloaia ai le faamoemoe o lo tatou Malo o Samoa e auala i le Matagaluega o Falepuipui ma le Toefuataiga, i le fausiaina lea o nofoaga e ono (6) e nonofo ai pagota e avea o se vaega o le nofoaga fou o le Falepuipui i Tanumalala nei. ‘O le 30 eka o lenei 550 eka, o le a faaogaina mo le fausiaina o le falepuipui fou ae o le isi vaega o le fanua, o le a fuafua lea e faaogaina mo atina’e faa-faatoaga ma lafumanu faapea nisi o polokalame e faa-faigaluega ai pagota o loo tuli o latou fa’asalaga fa’afalepuipui. Ma le faamoemoe ia o'o atu i le taimi e magalo ai, ua i ai nisi tomai faaopoopo latou te fo'i atu i aiga e faatino ae na afua atu i le nofoaga nei.

“O lenei galuega o se atinae o lo’o faatupe mai e le tatou MaloTutoatasi o Samoa auā le malu puipuia ma le saogalemu o lo tatou atunu’u ma le mata’itūina o le vaaiga o tatou pagota o lo’o tuli o latou fa’asalaga. “Ma o le isi lea faapogai taua ua tupu le tatou taulaga. ‘Ua tala mai le taulaga agai i Tafaigata, ae le se mea matagofie le tu ogatotonu o se toese i le mea e nonofo ai tagata i totonu o le taulaga. “E le gata i lea, ae ua faaletonu foi fale o lo o i ai nei, ma e itiiti foi le laueleele.  

“O lenei galuega ua fuafuaina i le aofa’i atoa e 720 pagota e nofoia.  “E 480 le aofa’i o pagota ua tuli latou fa’asalaga i totonu o lenei nofoaga; 120 le aofa’iga o pagota tamaita’i e mafai ona nofoia totonu o le Falepuipui, ma le 120 le aofa’i o latou ua taofia e fa’atali ai le i’uga o latou faamasinoga. O nei pagota o le a taofia e tusa ai ma le fa’avasegaina o lo latou puipuiga auā le malu puipuia o lo tatou atunu’u i tulaga o puipuiga aupito maualuga.

“Avea lenei avanoa e momoli ai le fa’afetai i le Malo o Iapani e tauala atu i lona Amepasa,Afioga Shinya Aoki, mo le fa’atupeina o le pa ina ia malupuipuia ma saogalemu le atunu’u.

‘Ou te talitonu e anoanoa’i nisi o tagata faigaluega mai le Auaunaga o Falepuipui ma isi Matagaluega a le Malo ma FaalapotopotogaTuma’oti e i ai o latou tomai ma agava’a sa fesoasoani tele i lenei atinae. “E momoli atu le fa’afetai tele ia te outou uma.

‘E malosi lo’u lagona e mafai ona i ai se so’otaga lelei tatou te faia i soifua ma ola o le toatele o i latou ua fa’afalepuipui ina ia toe fuata’iina ma ou te matuā fa’afetai ma fiafia ona o lea o le a fausia lenei galuega fou tatou te maua ai avanoa e tele e fa’ataunu’u ai lenei faamoemoe.

“Ua ou talitonu o le galuega ua fa’ataoto i le asō o le ma’atulimanu lea o le atina’eina o se vaitau fou mo le puleaina ma le fa’afoeina o pagota i totonu o Samoa a o avea ai i tatou ma taulamua i le Pasefika i le malupuipuia ma le toefuata’ina o pagota.

“E momoli faafetai faapitoa i le Afioga i le Minisita faapea le lagolagosua a le Minisita Lagolago i le unaina malosi o le atinae. ‘O laua tauau ua lafo i ai le galuega lenei, ma le faamoemoe o le Kapeneta, e tatau ona uma lelei le galuega lenei, ae le i uma le paeaiga lenei.

By Ilia L Likou 07 March 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>