E lē malōlō se tagata malosi

By Vatapuia Maiava ma Ilia L Likou 07 October 2016, 12:00AM

O le talitonuga lea o le tinā i a Losa Siaosi o Salelologa i le fa’atalatalanoaga ma le Fofoga o Samoa i le aso ananafi.

“Ia e pei o le fe’au masani lava lea o lo’o faia i aso uma e a’u nei, o le usu mai iinei e fa’atau nai vaega  nei, ia  maua sina tupe mo le aiga aemaise ai lava si a’u fanau i le aoga.

 “O lo’u loto o le a lava le taleni ua aumai e le Atua, ia o le talia lava ma le loto fa’afetai ma le fiafia.

“Na aumai e le Atua le ola ma le malosi e fa’aaoga tatau i aso uma. “O le tele o taimi ia ou te naunau lava e galue aua lava se pasese o le fanau o le aoga ma mea’ai mo si o’u aiga.

 “O lo’o fesoasoani tele si a’u tama teine i a te a’u ma ou te fa’afetai i le Atua mo  so’o se itu ua ia saunia mo tagata uma.

Na ia fa’ailoa e le tele se tupe o lo’o mafai ona maua , ae o lo’o ia taumafai lava i le mafai e fa’asoasoa ai tupe o lea aso i lea aso.

 “O le taimi lenei e to’afa si a’u fanau o lo’o i le aoga.

 “Ia o le suka lava, masima a maua ua lelei, aemaise ai lava le tau fa’aao’ogaina o si  a’u fanau, ma o le va’ai  alofa lava i aiga e mafua ai lava ona sau e fa’atau atu vaega nei.

O lona naunauta’iga ia maua pea e ia le malosi e fa’aauau pea fe’au ma tiute i aso ta’itasi.

“Ia o le fa’amoemoe lava i le Atua e fesoasoani mai i le tele o tiute o lo’o feagai ai nei, i aso uma o le tele lava o aso ua fa’avaivai , ae out e fa’afetai ona o le malosi.

“Ia o le taumafaiga lava o aiga, ia aua nei fa’alōlō.

“Ia aua o le olaga nei ia e pei o le ‘ai lava o lo’o tele ina fa’aalu ai le tele o tupe maua a le tele o aiga i totonu o le aiga i aso uma.

“Ia mau pea le loto ma finafinau le vaega e pito sili ona taua.

 “O le to’atele lava o tagata e fai mai i a te a’u ou te malolo ona ua ou matua, ae o le olaga e mana’omia lava le galue.

“Ia o le mafua’aga lea ua to’atele ai tagata e matitiva i Samoa nei, ia o le le galulue lava.

By Vatapuia Maiava ma Ilia L Likou 07 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>