“O matua lava le fa’apogai,” Lanu

By Sarafina Sanerivi 08 January 2017, 12:00AM

“O le olaga lea ua tatou iai, ua tele lava le suiga o Samoa aemaise lava i tupulaga.”

O lea le finagalo o le tina ia Lanu Ponifasio mai le afioaga o Levi Saleimoa, ina ua fesiligia e le Fofoga o Samoa i le tulaga o lo’o ua iai le olaga i Samoa i lenei vaitau.

Na ta’ua e Lanu, o lo’o filogia lava suiga lelei ma suiga fa’alē-lelei. 

“Ua manaia lava le atina’e o Samoa ua iai i lenei vaitau i fuafuaga a le malo. Ua tele poloketi ma atina’e lelei ua tatou va’aia i totonu o Samoa i le vaitau lenei. “Ae na pau lava sina fautuaga i le malo, ina ia va’ai ma le toto’a i fanau ma amioga a le tupulaga o lo’o fa’aalia i nofoaga faitele. 

“E tatau ona iai ni nai polokalame e ave iai fanau o lo’o faia solitulafono ma fa’atupu fa’alavelave solo i nofoaga faitele, aua o lo’o a’afia ai nisi o le mamalu o le atunu’u ma o lo’o ta’uleagaina ai foi le igoa o si o tatou atunu’u. 

“O la’u tilotilo ai foi, ua tele lava ina a’afia ai ma nisi o fanau laiti i ia faiga le manaia. O le isi tulaga ua tatau ai ona faia se fuafuaga, ona o lo’o taumafai ma le malosi le malo ina ia fa’atosina mai tagata maimoa mai fafo i si o tatou atunu’u. 

“Se tasi lea o alagātupe o lo’o fesoasoani tele i le tamaoaiga ma le atina’e o si o tatou atunu’u. Ae afai o le tulaga lea o lo’o iai amioga fa’aalia e nisi o fanau a le atunu’u, ia e faigata lava ona toe fia o mai ni turisi i Samoa pe afai e omai ma va’ai i ia aga.”

E le gata i lea, na ta’ua e Lanu, o le isi tulaga o lo’o va’aia pea le fa’atuputupula’ia i le taulaga o Apia, o le to’atele lea o le fanau iti o lo’o ua feoa’i ai i le taulaga e fa’atau oloa e maua mai ai tupe a o latou aiga. 

“Ou te tu’uaia lava e a’u ia matua ona o le fa’afitauli lea. O a’u foi o le matua, e fai foi la’u fanau. Po’o le a lava foi le matitiva, e sili lava ia te a’u le fa’aupuga foi lea, “O le matitiva fa’afesaga’i.”

“Pe ai lava le fa’alifu ma ti, ua lava ma totoe lena ae o le mea sili lava ia manuia ma maloloina fanau. Ou te ofo foi au i matua o nei fanau i mafai ona tutuli a latou fanau e fa’atau oloa ia i le maketi.  “Ua tatou va’ai ai e amata mai lava i le ta’i 7 tausaga agai i luga i le 15 tausaga le matua lae e iai nai tamaiti o lo’o savavali solo i le taulaga e fa’atau mea ia. 

“O le tiute lava o le matua o le tausi lea o fanau ma saili auala e maua mai ai seleni e fa’aaoga ma fafaga ai fanau. A o’o foi la ina manuia fanau ma maua ni o latou lumana’i manuia, e toe selesele lava i latou ia latou fanau.

“Aemaise lava nai fanau teine, ua tele lava ina vaaia nai fanau teine e fa’atau foi oloa i le taulaga, ae o le tiute lea o le tina o le va’aia lelei lea o fanau teine, aua e sasi loa, tutupu loa ma fa’afitauli. 

“Ua tatou va’ai foi, ua tele lava fanau laiti ua gaoi i le taulaga ma ua fasi tagata i le taulaga. Ua fa’atamala lava matua i la latou pitola’au.  “E fa’apogai mai lava o matua, famai le upu, o au o matua fanau. O lona uiga, o i latou e tatau ona aputiputi i fanau ma tausi lelei.”

By Sarafina Sanerivi 08 January 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>