Mana’omia se galuega

Tusia Deidre Tautua-Fanene ,

34 Hits

Sefo Fulisia mai Levi Sale’imoa.

Sefo Fulisia mai Levi Sale’imoa.

18 tausaga o Sefo Fulisia ma Levi Sale’imoa ua le mafai ona toe fa’aauauina ana a’oa’oga ona o le itu tau seleni.

O le taimi lenei pau le naunautaiga lea e i lenei taule’ale’a o le fia maua lea o se galuega ina ia fesoaosani ai i lona aiga.

E to’aiva tagata o le aiga o lenei taule’ale’a ae sa ia fa’ailoa i le Fofoga o Samoa i le aso ananafi e na o le to’alua lava tagata o lo’o faigaluega i lona aiga.

“E na’o lo’u tamā ma lo’u uso matua e faigaluega o le ala lea ua ou fia maua ai se galuega ina ia ou fesoaosani ai ia laua ma fa’amāmā ai le avega a si o’u tamā.

 “E le taitai gafatia e tagata e to’alua ona tausi le aiga atoa. 

“O lo’u tamā o lo’o galue i Vaimoso a’o lo’u uso matua e faigaluega i se tasi o leitiō ma e to’afa o’u suo ma nisi o o’u tausoga o lo’o matou nonof fa’atasi.

“O le taimi nei e to’alua nai o’u tei o lo’o ao’oga ae le gata i lea o le totogiina o pili ma mea fai a le aiga.”

Sa ta’ua e Sefo o ia sa aoga i le Kolisi maualuga o Levaula.

“Ou te fia alu pea e fa’auma la’u aoga, ae leai se mea e mafai ona fai, ma o lea lava ou te fa’atali. 

“Sa fa’amutaina a’u a’oa’oga i le vasega 12.

“O le tau o le soufauaga ua alu alu i luga le taugata. 

“E le lava se seleni a si o’u aiga e fa’auma ai a’u aoga ona e toa’tele matou ae na o le to’alua tagata faigaluega.

Sa ia fa’ailoa mai fo’i ua fai aiga le to’alua o le latou fanauga ma o lo’o latou nonof o fa’atasi i le fale e tasi.

Ae o le taimi lenei o lo’o fesoaosani lea taule’ale’a i lona aiga e ala lea i le faigaluega i le latou fa’atoaga.

 “O ufi ma fa’i e fa’atau atu lea ina ia maua mai se tupe e feosoasoani ai i lo’u aiga,” o lana tala lea.

“E fa’atau ta’i $5 pe ta’i $10 fo’i i le aufa’i po’o le ufi.

“O la’u galuega lenei e fai e fesoaosani atu ai i lo’u uso ma lo’u tamā i le tausiga o le matou aiga.”

Sa ia ta’ua le faigata o le galue i le fa’atoaga aemaise lava i le la ae peita’i o lona malosiaga o nei mea uma o lona aiga.

“Talosia ia maua se galuega ina ia ou fesoaosani malosi ai i lo’u aiga.

“Afai e te fia fesoaosani i a Fulisia fa’afeso’ota’i le numera o le 7256939.

© Samoa Observer 2016

Developed by Samoa Observer in Apia