Ripoti mai le Ofisa o Leoleo
(PEPA FA’AMATALAGA) 1. Na ripotia mai i leoleo mai le falemai i Motootua se maliu i le aso faraile 2/3/2018 o se alii 13 tausaga. O lenei alii e faapea se faamatalaga i uluai suesuega a leoleo o lo o masalomia ai na pule o ia i lona ola. O lo o taoto nei lona tino maliu i le falemai i Motootua ma o lo faia i ai suesuega a leoleo i le taimi nei.
2. Na ripotia mai foi i leoleo i le aso Faraile lava foi 2/3/2018 se pepe e 3 masina le matua na maliu ina ua taunuu atu i le falemai. O se faamatalaga o lenei mataupu sa taofia lenei pepe i le falemai i Motootua mo le sili atu i le lua vaiaso talu mai le masina o Fepuari.Na tea o ia i tua ae e lei malosi lelei lava ma saili fofo ai loa i taulasea Samoa.
Peitai ane e lei i ai lava se suiga i le aso tofi 01/03/2018 ma toe faatelevave ifo ai loa i le falemai ma maliu ai lava i lea taeao o le aso Faraile. O lo o faia nei i ai suesuega a leoleo i lea mataupu i le taimi nei.
3. O le aso faraile 23/2/2018 na faaoo mai se tagi a se alii e faiaoga i Avele e faapea na faaoolima i ai nisi o tamaiti aoga ia te ia i le aoga a Avele. O lenei mataupu o lo o faia nei i ai suesuega a leoleo i le taimi nei ma e lei moliaina ai se tasi.
4. O le aso Sa foi na ripotia mai ai i le ofisa o leoleo e se tama ave taxi 64 tausaga le matua e faapea na ave faamalosi lana taxi e ni alii se toafa. E faapea se faamatalaga o lenei mataupu na piki mai e lenei taxi ni alii se toafa mai Malifa mo Vaoala.
Peitai ane ina ua oo i Vaoala na faapea ona faaoolima ai loa nei alii i lenei ave taxi ma tuu o ia i tua o le keli o lana taavale ma feoai solo ai loa i lana taxi i lea po.
Na maua lenei taxi i le afioaga i Toamua e se tasi o tama o lo o tu ai ma ia tatalaina ai loa lenei tama sa i tua o le keli ae ua leai nei alii. O lo o faia nei i ai suesuega a leoleo i le taimi nei.
5.O le aso 1 foi o Mati na oo mai se tama 42 tausaga o Siusega ma ripotia mai lona fale ina ua talepe e se tagata ma ulufale faamalosi i ai ma toesea mai ai ni oloa e tusa lona tau ma le $1,400 tala Samoa. Olo o faia nei i ai suesuega a leoleo i le taimi nei i lea mataupu.