Ave lava le fa’amuamua le tausiina le aiga
E faigata lava le olaga pea fai lou aiga ma o le tiute lava o le tama, o le galue lea ia maua le fiafia ma le filemu i totonu o lona aiga.
O se manatu fa’alia lea mai ia Iapela Matiu mai Lauli’i ma Vailoa Palauli Savaii.
E 48 le matua o lenei tama ma e to’avalu lana fanau.
Na maua le fa’atalatalanoaga a le Fofoga o Samoa ma Iapela a o fufuluina fanu mo le faiga o fanu’u Samoa.
“Ia o lo’o faia lena itu aua le su’eina o se seleni.
“O a’u sa ou faigaluega mo le au Saina ia sa fausiaina le paka ae ua leva ona mae’a.
“O matou lava o se aiga e fa’amoemoe i le ma’umaga aua le tausiga o aiga, aua e leai sesi e faigaluega.
“O lo’u atali’i matua e 20 le matua ma o ia la lea e fesoasoani i le faiga o le ma’umaga aua se seleni.
“O lo’u afafine matua e fesoasoani i le tina o le aiga aua le va’aiga o le fanau.
“O ia e momoliina tamaiti a’oga ma toe aumai i le taimi e tu’ua ai.
Sa ta’ua e Iapela i le Fofoga o Samoa le faigata o le olaga mo ia ma lona aiga.
“E $200 le matou tupe maua pe a fa’atau atu a matou meamata.
“E fa’aaoga uma lena seleni i le totogiina o pili aemaise a’oga a tamaiti.
“E leai a se mea e faigofie i lenei olaga ma o le tele a o taimi e tautua ma ola fa’atasi ma le oi.
“E tele a o taimi matou te mana’omia ai fo’i se fesoasoani aua e le lava se seleni ia na o le pau a le mea e ola ai o le ma’umaga.
“Aua e leai ma nisi o le aiga e faigaluega.”